قانداي سورلى، بەيشارا ەلمىز؟ كومسومولدىڭ 100 جىلدىعى ەندى اۋىل-اۋىلدارعا كوشتى. تويلاپ جاتىر، تويلاتىپ جاتىر. سەمەيدە، اتىراۋدا، باسقا ايماقتاردا...
قارتايعان اعا بۋىن جاس ۇرپاقتىڭ ساناسىن ۋلاپ جاتىر. سۇمدىق قوي. قالاي ەل بولامىز؟ بولاتىن ەل بولاشاققا قاراۋشى ەدى؟! ءبىز ارتىمىزعا قارايمىز. قازاقتى قان قاقساتقان كوممۋنيستەردىڭ بەل بالاسى كومسومولدىڭ 100 جىلدىعىن تويلاۋ ءالى جەر-جەردە جالعاسىپ جاتىر. بۇل رۋحاني جاڭعىرۋ ما؟ ءبۇيتىپ، جاڭعىرماي-اق قويايىق.
كەڭەستىك جۇيەگە ادال قىزمەت ەتكەن اعا كوممۋنيستەردىڭ بۇگىنگى تىرلىگىن قالاي اقتاپ الامىز؟! قايتپەك كەرەك؟
♦و، كومسومول، سەن ءالى ءتىرى مە ەدىڭ؟!
♦تاعى دا كومسومول، تاعى دا لەنين!
بيلىك باسىنداعى بۇرىنعى كوممۋنيستەردەن قۇتىلماي، سانا تازارماي، ءجۇزجىلدىقتاردى تويلاۋ جالعاسا بەرەدى. وسىلاي قۇلدىق پسيحولوگيادا جۇرگەنىمىز جۇرگەن! مەملەكەتتى دامىتۋداعى ۇلتتىق يدەولوگيا جوق جەردە قاجەتسىز ۇراندى ۇلتقا قاتىسى جوقتار كوتەرەدى.
بۇگىنگى ءبىزدىڭ بيلىككە وزىنە ەشقاشان قارسى شىقپايتىن وسىنداي كوممۋنيستەر كەرەك. ولارعا كوساريەۆ پەن احمەتبەكوۆتىڭ قىزىل جالاۋى جاقسى. بۇيرەكتەن سيراق شىعارماي، ماسەلە كوتەرمەي، قارسى كەلمەي، ەسەپتەگى پارتيا بولىپ پارلامەنتتە جۇرگەنى دۇرىس!
نامىسىڭ كەلەدى. ءبىز قاي ەلدە تۇرىپ جاتىرمىز؟ كەڭەس وداعىنىڭ مۇراگەرى رەسەيدە، ءپۋتيننىڭ ەلىندە مە؟ جوق، قازاقستاندا ما؟
ۋكراينا بۇكىل كوممۋزيمنىڭ ەلەسىنەن، كۇن كوسەم لەنيننەن قۇتىلدى. ەلدەگى مىڭداعان ەسكەرتكىشتەردى الىپ تاستادى.
كەڭەستىك كەزەڭدە وقىعان ازاماتتار جاقسى بىلەدى، باياعىدا «انا ءتىلى» وقۋلىعىندا:
«موينىمدا – قىزىل گالستۋك،
مەكتەپكە قاراي جۇگىردىم»، –دەگەن ولەڭ جولدارى بار ەدى.
...ال تاۋەلسىزدىك العان قازاقستاننىڭ بۇگىنگى بالاسى 27 جىلدان كەيىن كومسومولدىڭ 100 جىلدىعىندا موينىنا تاعى قىزىل گالستۋك بايلادى. ءبىز اۋىلداعى مەكتەپتە ساناسى تازا قازاق بالاسىن ۋلاپ، موينىنا قاننىڭ تابى قالعان قىزىل گالستۋكتى بايلاپ جاتىرمىز.
...قىلقىندىرىپ جاتىرمىز!
قۇرالاي قۋات (فوتو)
