25 قازان پارلامەنت سەناتىنىڭ پلەنارلىق وتىرىسىندا قازاقستان، تۇركىمەنستان جانە وزبەكستان مەملەكەتتەرى اراسىنداعى شەكارانىڭ ءتۇيىسۋ نۇكتەسى بەكىتىلدى، دەپ حابارلايدى Qamshy.kz اقپارات اگەنتتىگى.

وتىرىستا «قازاقستان رەسپۋبليكاسى، تۇركىمەنستان جانە وزبەكستان رەسپۋبليكاسى اراسىنداعى ءۇش مەملەكەتتىڭ مەملەكەتتىك شەكارالارىنىڭ ءتۇيىسۋ نۇكتەسى بويىنشا شارتتى راتيفيكاسيالاۋ تۋرالى» زاڭ قابىلداندى.

كەلىسىمگە سايكەس ءۇش مەملەكەتتىڭ مەملەكەتتىك شەكارالارىنىڭ ءتۇيىسۋ نۇكتەسى ءۇستىرت قىراتىنىڭ اۋماعىندا ورنالاسقان. ءبىر ايتا كەتەرلىگى، كەلىسىمنىڭ مەرزىمى شەكتەلمەگەن جانە كۇشىن جويۋعا كەلمەيدى.

«راتيفيكاسيا مەن كەلىسىم كۇشىنە ەنگەن جاعدايدا قازاقستاننىڭ تۇركىمەنستان جانە وزبەكستانمەن شەكاراسىنىڭ ءتۇيىسۋ نۇكتەسىن انىقتاۋ پروسەسى اياقتالادى؛ ءتۇيىسۋ ايماقتارىندا تۋىنداۋى مۇمكىن داۋلى جاعدايلاردىڭ الدىن الادى؛ مەملەكەتتىڭ ۇلتتىق قاۋىپسىزدىگىن قامتاماسىز ەتەدى»، - دەدى ق ر سىرتقى ىستەر ءمينيسترى قايرات ءابدىراحمانوۆ.

ءمينيستردىڭ سوزىنشە بۇل كەلىسىم قازاقستاننىڭ مەملەكەتتىك شەكاراسىن بەكىتەتىن سوڭعى قۇجات بولماق.