قازاقستاننىڭ حالىق ءارتiءسى، قازاق ەستراداسىنىڭ جارىق جۇلدىزى روزا رىمبايەۆا ت.جۇرگەنوۆ اتىنداعى قازاق ۇلتتىق ونەر اكادەمياسىنا قاراستى ۆيتراج ونەرى تۋىندىلارىن دايىندايتىن شەبەرحاناسىندا «ساندىك جانە قولدانبالى ونەر» ماماندىعى ستۋدەنتتەرىمەن كەزدەستى. شىعارماشىلىق كەزدەسۋ بارىسىندا ۆيتراجدى لابوراتوريانىڭ مەڭگەرۋشىسى، قازاق رەسپۋبليكاسىنىڭ تۇڭعىش پرەزيدەنتى قورى گرانتىنىڭ يەگەرى جاننا تىنىبەكوۆا حالىقتىڭ سۇيىكتى انشىسىنە فيۋزينگ پەشىندە اينەكتى پەشتە ءپىسىرۋ تەحنولوگياسىمەن جۇزەگە اسىرىلاتىن كۇردەلى ۆيتراجدى ونەردىڭ قىر-سىرلارىمەن كەڭىنەن تانىستىردى.
شىنىدان جاسالاتىن ونەر تۋىندىلارى ەرەكشە فيزيكالىق جانە دەكوراتيۆتىك قاسيەتتەرگە يە تابيعي ماتەريالدان دايىندالادى. الايدا اسقان شەبەرلىك پەن قاجىرلى ەڭبەكتىڭ ارقاسىندا دۇنيەگە كەلەتىن ونەر تۋىندىلارى كورسەڭ كوز تويماستاي ەرەكشە كوركەم. مۇنداي عاجايىپتاردى شىعاراتىن ۇلكەن ەكى پەش قازاق رەسپۋبليكاسىنىڭ تۇڭعىش پرەزيدەنتى قورىنىڭ قولداۋىمەن ساتىپ الىنعان.
ساندىك قولدانبالى ونەر ماماندىعىندا ءتالىم الىپ جۇرگەن 4 كۋرس ستۋدەنتى دانا اليلايەۆا «قازاقستان تاريحىنداعى كورنەكتى تۇلعانىڭ پورترەتى» اتتى شىنىدان جاسالعان كەسكىندەمە كۋرسىنىڭ شىعارماشىلىق تۋىندىسىندا ءوزىنىڭ سۇيىكتى ءانشىسى، ونەر قايراتكەرى روزا رىمبايەۆانىڭ پورترەتىن سومدادى. بۇل وقۋ تاپسىرماسىنداعى ەڭ كۇردەلى كەزەڭ. ونداعى ماقساتى تۋىندىعا ۇلتتىق كولوريتكە باسىم سيپات بەرە وتىرىپ، پورترەتتىك ۇقساستىقتى شەبەر ورىنداۋعا قول جەتكىزۋ بولاتىن. جۇمىستى دايىنداۋدىڭ العاشقى كەزەڭى ءمولدىر اينەكتە پورترەت سالۋ، سودان سوڭ ءارتۇرلى تۇسپەن وڭدەۋدەن تۇرادى. ەكىنشى كەزەڭدە كوركەمدىك ەرەكشەلىگىنە قاراي قاجەتتى تۇستەرگە ەنبەيىنشە قايتا-قايتا 800 گرادۋس ىستىق پەشكە سالىپ وتىرادى.
ستۋدەنتتەردىڭ شىعارماشىلىق جۇمىستارىنا ءتانتى بولعان ءانشى: «ەلباسىنىڭ "مادەنيەت – ۇلتتىڭ بەت-بەينەسى، رۋحاني بولمىسى، اقىل-ويى، پاراساتى. وركەنيەتتى ۇلت، ەڭ الدىمەن، تاريحىمەن، مادەنيەتىمەن، ۇلتىن ۇلىقتاعان ۇلى تۇلعالارىمەن، الەمدىك مادەنيەتتىڭ التىن قورىنا قوسقان ۇلكەندى-كىشىلى ۇلەسىمەن ماقتانادى" دەپ ايتقان قاناتتى سوزدەرىن ءارقاشان جادىدا ۇستاڭدار. ءيا، قازاق ەلىنىڭ ارداقتى ۇلدارى اقىن اباي، حان ابىلاي، سۋرەتشى ءابىلحان قاستەيەۆ سىندى دارا تۇلعالارىنىڭ جالعاسى – بۇگىنگىنىڭ قازاق ونەرىن قاستەرلەيتىن جاستار! وزدەرىڭدەي دارىندى جاستارى ەلىمىزدىڭ رۋحاني جاڭعىرۋىنا ۇلەس قوساتىنىنا سەنىمدىمىن»، - دەپ جىلى لەبىزىن ءبىلدىردى روزا قۋانىش قىزى.
كەزدەسۋدىڭ سوڭىندا كەسكىندەمەشى ستۋدەنتتەر ءانشى روزا رىمبايەۆاعا شەبەرلىكتىڭ عاجايىپ ۇلگىسىمەن نازىك ءارى ءتۇسى قانىق شىنىعا بەينەلەگەن پورترەتىن سىيعا تارتۋ ەتتى.
