جەتىنشى سىنىپتا عوي دەيمىن، قولىما ورالحان بوكەيدىڭ «ءبىزدىڭ جاقتا قىس ۇزاق» دەگەن اڭگىمەلەر جيناعى ءتۇستى. كىتاپتى وقىپ شىقتىم. جاي عانا وقىمادىم، ەسسىز عاشىق بولىپ وقىدىم. كىتاپتاعى «قار قىزى»، «سايتان كوپىر»، «مىناۋ اپپاق دۇنيە» مەن ءۇشىن الەمدەگى تەڭدەسسىز تۋىندىلارعا اينالدى. سوناۋ ءور التايدىڭ، اسقاق التايدىڭ باۋرايىنداعى شاعىن اۋىل مەنى وزىنە قاراي تارتتى دا تۇردى. ەشقاشان كورمەگەن، بىلمەگەن ورالحاننىڭ ءور التايىنا عاشىقتىعىم سولاي باستالعان. ول ىنتىزار مەكەندى ايتەۋىر ءبىر كورەتىنىمە سەنۋشى ەدىم ☺
راسىمەن، بيىل جازدىڭ سوڭىندا شىڭعىستايعا جول ءتۇستى. ورالحان سۋرەتتەگەن اياداي عانا اۋىلدى كوردىم، ونىڭ "اۋىل حيكايالارىنداعى" كەيىپكەرلەرىن كوردىم.
ال "قار قىزىنداعى" باستى كەيىپكەر ەستەرىڭىزدە مە؟ ءشوپ اكەلۋگە كەتىپ، بوراندا اداساتىن تراكتوريست جىگىت شە؟ مىنە، ءدال سول كەيىپكەردىڭ ۇيىندە قوناق بولدىق. ءوزى ورالحان اتامىزدىڭ سىنىپتاسى ەكەن. نەبىر قىزىق ەستەلىكتەر ايتتى. ورالحاننىڭ كەيىپكەرلەرىن ءوزىمنىڭ ەسكى تانىستارىمداي تۇگەندەي باستادىم. "تورتاي مىنەر اقبوز اتتاعى" تورتاي قايدا؟" دەيمىن عوي، نۇرلان اتا: "ومىردەن ءوتتى عوي" دەپ ونىڭ ايانىشتى تاعدىرىن باياندايدى. اناۋ شە؟ مىناۋ شە؟ كوپشىلىگى اۋىل ىرگەسىندەگى قابىرلەر مەكەنىنە قونىس اۋدارىپتى. "اپامنىڭ استاۋىن" وقىپ، "جىلاعانىمدى ەسىمە الدىم. ويتكەنى وزىمدە دە استاۋ بولماسا دا، ۇرشىعىن سەرىك ەتكەن سونداي ءبىر اپا بار ەدى...
نۇرلان اتانىڭ ۇيىندەگى اپايىمىز ءبىز اڭگىمەلەسىپ وتىرعاندا شەلپەك ءپىسىرىپ، بار جىلى جۇمساعىن سالىپ، داستارقان جايىپ ۇلگەرگەن ەكەن. "ورالحاننىڭ قوناقتارى ءبىزدىڭ دە قوناعىمىز. دالاعا كەلگەندەي بولماڭدار. ءشاي ىشكىزبەي جىبەرمەيمىز. كەزىندە وسى مەنىڭ قولىمنان ورالحان دا تالاي ءشاي ىشكەن" دەپ ايالداتتى. جاقسى اڭگىمەگە دە، التايدىڭ قايماعى مەن باۋىرساعىنا دا تويدىق. Tangsholpan ەكەۋمىزگە ءبىر-بىر ۋىس قۇرت سالىپ بەردى. ونى كەزدەسكەن جۇرتقا "ورالحاننىڭ اۋىلىنىڭ قۇرتى" دەپ ءبىرازعا دەيىن تاراتىپ جۇردىك. ال جۇرەكتى ورالحان اۋىلىنىڭ وسى ءبىر قاراپايىم ادامدارىنىڭ بىزگە كورسەتكەن مەيىرىمى ءالى جىلىتىپ ءجۇر ؟
ال ءسىز ورالحان بوكەيدىڭ قاي تۋىندىسىن وقىعانسىز؟
مارفۋعا شاپيان ينستاگرام پاراقشاسىنان
