بۇل - جيدەبايداعى اباي جاتقان كەسەنە. جيدەباي ابايدىڭ قىستاۋى بولعان ەكەن. قۇنانباي تۇقىمى نەگىزىنەن اقشوقىعا جەرلەنىپ كەلىپتى. تەك ابايدىڭ سۇيىكتى ءىنىسى وسپانعا عانا توپىراق وسى مەكەننەن بۇيىرعان.
⠀
اباي جازدا جايلاۋدا قايتىس بولعان. بۇرىنعى قازاقتىڭ قىستاۋى مەن جايلاۋى ءقايبىر جاقىن بولۋشى ەدى؟! ومىردەن وتكەن ابايدىڭ سۇيەگىن ارباعا سالىپ، جيدەبايعا الىپ كەلگەنشە ءۇش كۇن ءوتىپتى دەسەدى. ال بەيىتتەر جاتقان اقشوقى ءالى دە الىس. سودان امالدارى قالماعان اباي اۋىلىنىڭ قاريالارى اقىندى سۇيىكتى ءىنىسى وسپاننىڭ جانىنان جەر قوينىنا تاپسىرىپتى. ول - وسى جەر.
⠀
پايعامبارىمىزدىڭ: "ءمۇمىن انا دۇنيەدە سۇيگەنىمەن بىرگە بولادى" دەگەنى اباي وقيعاسىندا دا ءدال كەلگەنىن كورمەيسىزدەر مە؟! اباي وسپان ولگەندە قاتتى قايعىرعان دەسەدى. ءتىپتى قابىرىنە تاس ورناتىپ: "وسپاننىڭ باسىنان بايلىق تا ءوتتى، بالۋاندىق تا ءوتتى، مىرزالىق تا ءوتتى. اجالدان ەشكىم دە قاشىپ قۇتىلا المايدى. ءارى وتكەن، بەرى وتكەن مۇسىلمان دۇعا قايىرماي وتپەسىن" دەپ ەسكى اراب قارپىندە جازدىرىپ، تاس قويدىرعان ەكەن. ول تاس ءقازىر اباي مۋزەيىندە تۇر.
⠀
كەيىن ءىنىسىنىڭ جانىنا جايعاسارىن اباي بىلمەگەن بولار. الايدا جاڭاعى جازۋ ابايدىڭ كەيىن قابىرىنە كەلەتىندەرگە ايتقان وسيەتىندەي. اباي كەسەنەسىنىڭ جانىندا تۇرىپ وسىنداي ويعا قالدىم...
مارفۋعا شاپيان
