مۇنايدار بالمولدا ەسىمدى ازامات ءوزىنىڭ فەيسبۋك الەۋمەتتىك جەلىسىندەگى پاراقشاسىندا 16 ساعات بۇرىن مىنانداي جازبا جاريالاپتى: «ورال. زاشاعان ىقشاماۋدانىندا ورنالاسقان ايالداما. ءبىز جىر الىبى جامبىلدى كورىپ تۇرمىز. ال تومەندەگى جازۋ: "بۇل كۇي اتاسى - قۇرمانعازى" دەپ تالاس تۋدىرىپ تۇر. كىمدىكى دۇرىس، كىمدىكى بۇرىس؟ عالامتوردان "جامبىل جابايەۆ" دەپ ىزدەسەڭىز دە، وسى سۋرەت شىعا كەلەدى. قۇرمانعازى اتامىزدىڭ بەينەسى باسقاشا عوي. ءاي، ءاي، ءاي... بىلەتىن ادامدارمەن، سۋرەتشىلەرمەن اقىلداسىپ السا، قايتەر ەدى؟ اسىعىستىق كۇيدىرەدى. مەن نەگىزى ءوز پاراعىما كەلەڭسىزدىكتى جاريالاۋعا قۇلىقسىزبىن، ماماندىعىم سۋرەتشى بولعاسىن ، بۇل جولى شىداماي كەتتىم -اۋ. قايتەيىن؟ سىن تۇزەلمەي، ءمىن تۇزەلمەيدى».

111 ادام "نازار اۋدارۋعا تۇرارلىق" دەپ لايك باسقان جازبانىڭ استىنا پىكىر قالدىرعانداردىڭ سانى - 66. سولاردىڭ ىشىنەن بىرەن-سارانىن ىرىكتەپ، نازارلارىڭىزعا ۇسىنىپ وتىرمىز:

گۇلجان وزىقبايەۆا: قاتەلەسىپ جىبەرگەن شىعار. بالا كەزدەن جامبىل اتامىزدىڭ وسى سۋرەتىنە كوزىمىز ۇيرەنگەن. جىر الىبى جامبىلدىڭ سۋرەتى عوي. وتكەندەگى شەرحان جازۋشىنى مەن مۇقتار اقىنمەن شاتاستىرعانداردىڭ ىستەگەنى شىعار؟

Kenzhaly Mendikhanov: بۇل دەگەن بىزدە يدەولوگيا جوقتىعىن كورسەتەدى. سسسر-دى جاتىپ الىپ جاماندايمىز، ول ۇكىمەتتىڭ دە جامان جاعى دا، جاقسى جاعى دا بولدى، سونىڭ ىشىندە يدەولوگيا ماسەلەسىنە قاتتتى كوڭىل ءبولىندى، بالانى "بەسىگىنەن" باستاپ كوممۋنيستىك تاربيەگە ۇيرەتتى. سوۆەت زامانى بولسا، بىر-ەكى باستىقتىڭ باسى كەتەتىن ەدى، بۇل جاعدايدا.

جانىبەك يسمۋرزين:بۇل سۋرەت وسى ايالداماعا ىلىنگەنشە قانشاما قولدان ءوتتى. بەت-بەينەسىن كومپيۋتەرگە ەنگىزگەننەن باستاپ. سوندا مادەني ءھام رۋحاني ساۋاتى بار ءبىر پەندەنىڭ كوزىنە تۇسپەگەنى مە؟ قۇرمانعازى بابانىڭ جاسىن بۇرمالاعانى از دەگەندەي. ەندى كەلىپ، وزگە ەمەس، ءوز توپىراعىندا ىستەگەنى مىناۋ...

ساعات سايىن قىزۋ پىكىرتالاسقا ءتۇسىپ جاتقان ايالداماداعى بەينە جامبىل جابايەۆ پا، قۇرمانعازى ما، وسىعان ناقتى جاۋاپ الۋ ءۇشىن قامشى.كz  حالىقارالىق الاش سىيلىعىنىڭ لاۋرەاتى، الماتى وبلىسىنىڭ قۇرمەتتى ازاماتى، جازۋشى، جامبىلتانۋشى ناعاشىبەك قاپالبەك ۇلىنا قوڭىراۋ شالدى.

“مىناۋ ءسوزسىز جامبىل جابايەۆتىڭ ءوزى. وسى كارتينانى بارلىق شارادا قولدانىپ ءجۇرمىز. قۇرمانعازىمەن شاتاستىرۋلارى ۇيات. قازاقتىڭ ماڭدايىنا بىتكەن نەكەن-ساياق اسىلدارىنىڭ بەينەسىن شاتاستىرۋ – كەشىرىلمەيتىن دۇنيە» دەپ قىسقا قايىردى اعامىز.

جامبىل اتامىزدىڭ شوبەرەسى ،جۋرناليست بۇلان جامبىلمەن تىلدەستىك. ول كىسى دە ۇزىلدى-كەسىلدى "اۆتورىن بىلمەيمىن، ءبىراق بۇل - جامبىل" دەپ جاۋاپ بەردى.

ىلە-شالا بقو ىشكى ساياسات باسقارماسىنىڭ ءبولىم باسشىسى ەربول كوشەكوۆكە حابارلاستىق. "زاشاعان" ىقشاماۋدانىنىڭ ءوز اكىمى بار. ولار بىزبەن اقىلداسپاي، وسىنداي ورەسكەل قاتەلىك جىبەرگەن. مۇنداي شاتاسۋ ءبىرىنشى رەت ورىن الىپ جاتقان جوق. وسىعان دەيىن سالقام جاڭگىر مەن بوكەي ۇلى جاڭگىر حاندى شاتاستىرىپ العان بولاتىن. ايالدامادان بۇل بەينە الىنىپ تاستالدى. جاۋاپتىلار تۇسىنىكتەمە جازادى"-دەدى ول..