الماتىلىق كەلىنشەك ءبىر ايلىق ءسابيىن پەرزەنتحانادان الا الماي ءجۇر. دارىگەرلەر 
«ءتولقۇجاتىڭ جوق» دەگەن جەلەۋمەن بالاسىن بەرمەي جاتىر ەكەن. ونى ءبىر اپتانىڭ ىشىندە جاساتپاساڭ، شاقالاقتى بالالار ۇيىنە وتكىزەمىز دەگەن تالاپ قويىپتى. ال، 29 جاستاعى ايەل 15 جىل بۇرىن وزبەكستاننان كوشىپ كەلگەلى ءالى قۇجات راسىمدەمەگەنىن ايتادى. ءبىراق، جەتى جىل بۇرىن تۇڭعىشىن دۇنيەگە اكەلگەنىندە باۋىرىما باسىپ، ەمىزىپ ەدىم دەپ زار جىلاۋدا. بۇل تۋرالى ەۋرازيا ءبىرىنشى ارناسى حابارلايدى. 

ەكى كوزىنىڭ جاسى ءبىر ايدان بەرى تىيىلماعان كەلىنشەك ءوزىن لينا ءىلياسوۆامىن دەپ تانىستىردى. تاماعىنا تۇرعان وكسىگىنە تۇنشىعىپ، ارەڭ سويلەدى. №3 پەرزەنتحانانىڭ ەسىگىن توراۋىلداپ، سابيىنە جاساندى ءسۇتتى كۇندە تاسيمىن دەيدى. ويتكەنى، وتىز كۇن بۇرىن بوسانعان كەلىنشەك بالاسىن ءبىر اپتا عانا ەمىزىپتى. ودان كەيىن، دارىگەرلەر جەكە باسىڭدى راستايتىن كۋالىگىڭ جوق دەپ شىعارىپ جىبەرىپتى. ال، قىزىڭدى قۇجاتىڭ راسىمدەلگەن سوڭ بەرەمىز دەگەن. 

“مەن اقىلى پالاتادا جاتتىم. 205 مىڭدى قولدارىنا ساناپ بەردىم. تۇبىرتەگى ءبارى وزدەرىندە. جىلاي-جىلاي جاسىم تاۋسىلدى. دارىگەرلەردىڭ كەسىرىنەن ءسۇتىم تارتىلىپ كەتتى. ولار اقشا الاردا قۇجات سۇراماي، بالاممەن ۇيگە شىعاردا نەگە قۇجاتىمدى سۇراپ وتىر؟” – دەيدى قالا تۇرعىنى لينا ءىلياسوۆا.

سويتسە، 29 جاستاعى لينا ءىلياسوۆا وتباسىمەن وزبەكستاننان 15 جىل بۇرىن كوشىپ كەلىپتى. مەكتەپتى دە وسىندا وقىعان. قولىندا تۋۋ تۋرالى كۋالىگى عانا بار. اكە-شەشەسى ماسكۇنەمدىككە سالىنىپ، جوق بولىپ كەتىپتى. ال ءوزى قازاقستان ازاماتتىعىن الماعان. وزبەكستان ازاماتتىعىندا بار-جوعىن دا بىلمەيدى ەكەن. سوندىقتان، جەكە كۋالىك جاساتاردا كوشى-قوندا ءبىراز قيىندىقتار بولىپ، سول بويى الا الماعان. ەش جەردە تىركەۋى دە جوق ەكەن. كەسىرىنەن ءبىلىم الماعان. نەكەسى دە قيىلماعان. الايدا، ءبىرىنشى بالامدى قۇجاتسىز-اق يىسكەپ، وعان قۇجات تا الدىم دەيدى.  

“مەن قىزىمنان باس تارتىپ تۇرعانىم جوق. مەنىڭ تاعى ۇلكەن ۇلىم بار. جاسى 8-دە. تۋۋ تۋرالى كۋالىگى بار. مەندە جوق بولعانىمەن وعان كەزىندە جاساتتىم. مەن بالامنان باس تارتقان جوقپىن. ماعان ءبىر اپتا ۋاقىت بەرىپ وتىر. ەگەر قۇجات اكەلمەسەڭ، بالالار ۇيىنە وتكىزەمىز دەيدى” - دەيدى قالا تۇرعىنى لينا ءىلياسوۆا.

ونسىز دا كوشى-قوننىڭ تابالدىرىعىن توزدىرعان كەلىنشەك قۇجات جاساۋ ءبىر اپتا تۇگىلى ءبىر جىلدا بىتەتىن تىرلىك ەمەس دەيدى. بالالار ۇيىنە ءوتىپ كەتسە، كۋالىكسىز ءوزىمنىڭ قىزىم ەكەنىن دالەلدەۋ ءتىپتى قيىن دەپ وتىر. ال، №3 پەرزەنتحانادا اكۋشەر نە گەنيكولوگتى تاپپادىق. تەك زاڭگەرى راسىمدەلگەن بىردە-بىر قۇجاتىن كورسەتپەي، ءسابي اۋرۋشاڭ دەپ قىسقا قايىردى. اناسىمەن بىرگە جىبەرۋ ءۇشىن قۇجاتىن كۇتىپ وتىر ەكەن.     

“لينا ءىلياسوۆا ءوزىنىڭ جەكە باسىن راستايتىن قۇجاتتى اكەلگەن ۋاقىتتا عانا ءبىز بالانى بىرگە جىبەرە الماىز. وعان دەيىن ءسابي پەرزەنتحانادا بولادى. كۇندە كەلىپ، كورىپ تۇرادى. ەشكىم شاقالاقتى تارتىپ المايدى، تەك قۇجاتىن اكەلسىن دە، بالاسىن الىپ كەتسىن” – دەيدى №3 پەرزەنتحانا زاڭگەرى نازار سارلىبايەۆ.

بوسانۋى كەرەك بولعان سوڭ كەلىنشەكتى قۇجاتسىز-اق قابىلداۋعا ءماجبۇر بولدىق دەيدى پەرزەنتحاناداعىلار. ءتىپتى، مەملەكەتتىك مەكەمەنىڭ دارىگەرلەرىنىڭ اقىلى كومەك كورسەتۋى دە زاڭدى ەكەن. ەندى تاعى ءبىر اپتا كۇتەمىز، قۇجاتى بولماسا، مەملەكەتتىك قامقورشىلارعا حابارلاسامىز دەيدى. ال، ادۆوكاتتار ەلىمىزدىڭ اتا زاڭىندا انا مەن بالانى قۇجات ءۇشىن ايىرۋعا بولاتىن بىردە-بىر باپ جوق دەيدى.   

بۇگىن لينا ءىلياسوۆا پوليسەيلەرگە ارىز جازۋدا. قۇجاتىن راسىمدەۋگە دە كىرىسىپ كەتتى. ءبىراق، قاپتاعان قاعازباستىلىقتان مۇنىڭ جۋىق ارادا شەشىلەتىن ءتۇرى جوق. ال، پەرزەنتحانانىڭ پەرزەنتتى ءبىر ايدان ارتىق ۇستاۋعا بولمايتىنىن ەسكەرسەك، مەملەكەتتىك قامقورشىلار بالالار ۇيىنە وتكىزىپ جىبەرۋى دە ابدەن مۇمكىن.