كۇنى كەشە اقتوبەدە «جاس وتان» جاستار قاناتىنىڭ وكىلدەرى قالانىڭ ءتۇرلى مەكتەپتەرىنەن جالپى سانى 150-گە جۋىق وقۋشىنى جيناپ، قوقىس پوليگونىنا اپارعاندىعى تۋرالى اقپارات تارادى. بەلسەندى جاستاردىڭ مۇنداعى ماقساتى وسكەلەڭ ۇرپاقتى قالانى، تابيعاتتى تازا ۇستاۋعا شاقىرۋ بولعان سەكىلدى. الايدا ارتى رەنىش پەن اكىمدىككە شاعىمدانۋعا اكەپ سوقتىرعان بۇل ەكسكۋرسيا جۇرت نازارىن ەكولوگيا مەن كوشە مادەنيەتىنە ەمەس، وقۋشىلاردىڭ گيگيەناسى مەن باسشىلىقتىڭ اتا-اناعا ەسكرەتپەۋ، رۇقسات سۇراماۋ ماسەلەسىنە اۋداردى. "قامشى" ەكسكۋرسيا بارىسىنان العان ەموسياسىن تىكەلەي ەفيردە ۇيالى تەلەفونعا ءتۇسىرىپ العان ءبىر وقۋشىنىڭ ۆيدەوسىن ۇسىنا وتىرىپ، ەكى ءتۇرلى پوزيسيا ۇستانعان قاراپايىم حالىقتىڭ وي-پىكىرىن تالقىعا ۇسىنادى. ءبىر-اق نارسە تۇسىنىكسىز: بۇل شارانى وتكىزۋ مەملەكەتتىك تاپسىرما بولعاندىعىن اشىق ايتقان "جاس وتاندىقتاردىڭ" بالالاردى ماسكامەن قامتاماسىز ەتپەگەندىكتەرى.
تومەندەگى ۆيدەوعا كوز جۇگىرتەيىك...
مىنا ۆيدەودان قوقىس پوليگونىندا جۇرگەن وقۋشىلاردى كورە الاسىز. ۇيدەگى كىشكەنتاي شەلەك قوقىسقا تولىپ قالىپ، دەرەۋ توگىلمەسە، ءاسۇيدىڭ ءىشىن جامان ءيىس الىپ كەتەتىنىن جاقسى بىلەمىز. ونداي يىسكە شىداۋ مۇمكىن بولماي كەتەدى. ەندەشە، الىپ قوقىس پوليگونىنان شىعاتىن ءيىستىڭ قانداي بولاتىندىعىن ەلەستەتۋ، بولجاۋ دا قيىن. ماسكالارى جوق بالالار مۇرىندارىن جاۋىپ الەك. ەموسيالارىنا زەر سالساق، ابىرجىگەن، شوشىعان، وزدەرىن جايسىز سەزىنىپ تۇرعان بالالاردى عانا كورەسىز. ۇيلەرىنە امان-ەسەن جەتكەن ولاردىڭ دەنساۋلىقتارى سىر بەرىپ، ءتىپتى كەيبىرى اتا-اناسىنا ءمان-جايدى ايتىپ، سىر اقتارعان.
ەندى تومەندەگى مىنا جازباعا كوز جۇگىرتىپ جىبەرسەك...
مىسالى، №3 مەكتەپتەگى وقۋشىنىڭ اتا-اناسى وسىنداي ارىز ءتۇسىرىپتى. ءتارجىمالاپ بەرەيىك.
«سالەمەتسىزدەر! اقتوبەدەگى №3 مەكتەپتىڭ 8 ۆ سىنىبىنىڭ اتا-انالارىنىڭ اتىنان نارازىلىق بىلدىرگىم كەلەدى. 2018 جىلدىڭ 21 قاراشاسىندا ءبىزدىڭ سىنىپتىڭ وقۋشىلارىن اۆتوبۋسپەن قوقىس ءۇيىندىسىن جينايتىن زاۋىتقا اپارعان. عيماراتتىڭ ىشىندە جاعىمسىز ءيىس مۇڭكىپ تۇر، سۋىق. بالالارىمىز ۇيگە اڭ-تاڭ بولىپ كەلدى. كورگەن دۇنيەلەرىنەن قاتتى شوك العان. كەش بويى باستارى اۋىرىپ، جۇرەكتەرى اينىپ، لوقسىپ قۇسقان. ءيا، تۇسىنىكتى جاعداي، وقۋشىلاردى ءماجبۇرلى تۇردە اپاردى. الايدا مۇنداي تاپسىرمالارعا بالالاردى پايدالانۋدى قاشان دوعاراسىزدار؟ اكىمنىڭ نە جۇمىس ىستەپ جاتقانىن حالىق ونسىز دا كورىپ وتىر. اكىمدىكتىڭ پاراقشاسىنداعى پىكىرلەرگە شەكتەۋ قويىپ تاستاعان. كوزبوياۋشىلىقتىڭ نە قاجەتى بار؟».
اتا-انالاردىڭ ايتۋىنشا، بالالارى كەش بويى وزدەرىن ناشار سەزىنگەن، ءتىپتى ەرتەڭىندە تەڭ جارتىسى ساباققا بارماعان. «جاس وتان» جاستار قاناتى «بۇل – مەملەكەتتىك تاپسىرما» دەپ جاۋاپكەرشىلىكتەن ات-تونىن الا قاشتى. ال ەكسكۋرسيا نەبارى 15-20 مينۋتقا جالعاسقان. ءارى پوليگوندى تەك سىرتىنان باقىلاپتى. ءتىپتى №3 مەكتەپتىڭ باسشىلىعى دا جاۋاپكەرشىلىكتى ارقالاۋعا قاۋقارسىز. ديرەكتور ورىنباسارىنىڭ ايتۋىنشا، بالالار كۇرتەشەلەرىنەن جاعىمسىز ءيىستى كەتىرۋ ءۇشىن جۋعان ەكەن، ەرتەڭىندە كەپپەي قالعاندىقتان مەكتەپكە كەلمەگەن.
حالىق نە دەيدى؟
بۇل جاعدايدا تۇرعىنداردىڭ پىكىرى ەكىگە ءبولىندى. ءبىرى بالالاردى وسىنداي ەكسكۋرسيالارعا جىبەرىپ تۇرۋدى دۇرىس دەسە، ەندى ءبىرى اكىمدىكتىڭ ارەكەتىنە اشۋلى. جەلىدەگى پىكىرلەر سارىنى تومەندەگىدەي.
@LyudaFarzalieva دۇرىس... بالالارعا ساباق بولسىن! كەيدە بالالارىمىزدى تىم قاتتى قورعاشتايمىز. سوسىن ناتيجەسى وسىنداي بولادى. جارتى ساعاتتا تۇرعان ەشتەڭە جوق. ءومىردىڭ اقيقاتىنا كوزدەرى جەتسىن!
@rino4ka_04 مەنىڭشە، ول ەكسكۋرسياعا الدىمەن اتا-انالاردىڭ وزدەرىن اپارۋ كەرەك. بالا ۇلكەنگە قاراپ وسەدى. ارينە، ولاردىڭ دا كورگەنى دۇرىس. ماسەلەن، كوشەدە اناسى مەن بالاسى كەتىپ بارا جاتىر. اناسى بالاسىنا شوكولادتى اشىپ بەردى دە، قاعازىن جولعا تاستاي سالدى. مۇنى كورگەن بالا قالىپتى جاعداي دەپ ويلايدى. كەلەسىدە ءوزى دە سولاي ىستەيتىن بولادى. اتا-انا ءبىرىنشى ءوزىن تاربيەلەسىن!
@akzer_a وقۋشىلاردىڭ ءبارىن اپارۋ كەرەك ەدى. سول كەزدە، بالالار اۋلا تازالاۋشىلارىنىڭ ەڭبەگىن باعالار ەدى. ءوز پودەزىن تازا ۇستاۋدى ۇيرەنەتىن ەدى.
@asemgulesenalina ءبىزدىڭ مەكتەپتىڭ ۇلكەن سىنىپتارى دا ەكسكۋرسياعا باردى. اراسىندا مەنىڭ قىزىم دا بار، 10 سىنىپتا وقيدى. ءبىراق ولاردى بارۋعا ەشكىم ماجبۇرلەگەن جوق، قايدا باراتىندارىن الدىن الا ءبىلدى دە. قىزىم دا ارىزدانىپ كەلدى، ءىشىنىڭ ساسىق ەكەنىن ايتتى، جۇرەگى اينىدى. الايدا ەكسكۋرسيا نەبارى جارتى ساعات بولعان. مەنىڭشە، قىزىم كىشكەنتاي ەمەس، بوي جەتىپ كەلەدى. ءوزىنىڭ نە ىستەپ جۇرگەنىن جاقسى بىلەدى. ول گۇل ساتاتىن دۇكەنگە ەمەس، قوقىس ءۇيىندىسىن جينايتىن زاۋىتقا باردى. ءبارى ءسوزسىز-اق تۇسىنىكتى ەدى. بالالاردىڭ كورگەندەرىنەن ساباق العاندارىنا سەنىمدىمىن. تۇيمەدەيدى تۇيەدەي قىلۋدىڭ قاجەتى جوق. ءومىردى تانىسىن!
ال قارسى پىكىر نە دەيدى؟
@Luliiakorobova اتا-انالاردىڭ نارازىلىعى ورىندى. بالالاردى مۇنداي ەكسكۋرسياعا اپارماس بۇرىن رۇقسات سۇراۋ كەرەك ەدى. اكىمدىك بالالارىمىزدى قاشانعى پايدالانادى؟ بالالارىمىزدىڭ ءومىرىن قاشانعى قاۋىپكە تىگەدى؟ ەندىگارى مۇنداي ەكسكۋرسيالارعا وقۋشىلاردى جىبەرمەسىن! كەرەك بولسا، اكىمنىڭ بالالارى بارسىن!
@ayila.aliya بالالار ساباق وقۋى ءتيىس، قوقىس اراسىندا جۇرگەنى نەسى؟ ماسقارا...
@real_2910 اتا-انانىڭ رۇقساتىنسىز بالانى ەكولوگيالىق ءقاۋىپتى ايماققا جىبەرگەن. ول جەردە اۋا ارقىلى ينفەكسيالىق اۋرۋلاردى وڭاي جۇقتىرۋعا بولادى. بالالارعا ءتىپتى ماسكا بەرمەگەن. ال زاۋىتقا اپاراردا پلاستيكانى وڭدەۋ زاۋىتىنا اپارامىز دەپ ايتقان ەكەن. ال ءبارى كەرىسىنشە بولىپ شىقتى.
@aikerim_zhumagali بىردەن ءمايىتحاناعا اپارۋلارى ءتيىس ەدى. ءومىردىڭ ءقادىرىن ءتۇسىنسىن دەپ...
قالالىق قوقىس پوليگونىنا سىنىبەن بارعان ەلەنا ەموسياسىن بىلاي ءبىلدىردى...
@elena_fil_ ءبىز ەكسكۋرسيادا بولدىق. ول جەردىڭ جاعىمسىز ءيىسىن سوزبەن ايتىپ جەتكىزۋ مۇمكىن ەمەس. ۇستىمىزگە باسقا كيىم كيۋ جايلى دا ەسكەرتۋ جاساعان جوق. ۇستىمىزدەگى كيىمگە الگى ءيىس ءسىڭىپ قالعان. جەردە ولگەن يتتەر جاتتى. ال ەندى ءبىزدىڭ جاعدايىمىزعا كىرىپ كورىڭىزدەر، قالاسىڭىزدار وزدەرىڭىز دە بارىپ سەزىنىڭىزدەر!
پىكىر قالدىرۋ