قازاقستاننىڭ ۇلىبريتانياداعى مادەني كۇندەرى اياسىندا لوندوندا ديماش قۇدايبەرگەننىڭ جەكە كونسەرتى ءوتتى. بۇل - قازاق جۇرتشىلىعى ءۇشىن جاعىمدى جاڭالىق بولدى. قازاقستاندىقتار ەۋروپا تورىندە ديماشتاي كۇمىس كومەي ءانشىنىڭ شىعارماشىلىق كەشى وتەتىندىگىن زور جەتىستىككە بالادى. ىشتەي سۇيىكتى انشىسىنە ريزاشىلىعىن بىلدىرگەن دە بولار. تەك قازاقستان ەمەس، الەمدەگى 50-گە جۋىق  ەلدە تۇراتىن ديماشتىڭ تىڭدارماندارى، جانكۇيەرلەرى كونسەرتتى اسىعا كۇتتى. بيلەتتەردى جاپاتارماعاي ساتىپ الىپ جاتتى.

مىنە سول كۇن جەتتى. 19 قاراشا. ۇلىبريتانيا جۇرەگى – لوندونداعى  «Indigo at the O2» زالىنا ادامدار كوتەرىڭكى كوڭىل كۇيمەن جينالىپ جاتتى. سۇيىكتى انشىسىمەن قاۋىشۋ، بىرنەشە ساعات بويى ونىڭ ونەرىن تاماشالاۋ  ولارعا قۋانىش سىيلادى.

كونسەرتكە بارۋ مۇمكىندىگى بولماعان قازاقستاندىقتار ەلدە وتىرىپ تاقىمىن قىستى. جان-تانىمەن لوندوندا بولدى. «كونسەرت قالاي ءوتىپ جاتىر ەكەن؟» دەگەن سۇراق تا مازالادى. وكىنىشكە قاراي، قازاقستاندىقتار ديماش قۇدايبەرگەننىڭ جەكە كونسەرتىن وتاندىق تەلەارنالاردان تىكەلەي ەفيردە كورە المادى. ونداعى اتموسفەرانى تەك الەۋمەتتىك جەلى ارقىلى عانا باقىلاپ وتىردى. باسقا امال بولمادى. كونسەرت ءوتىپ جاتقان ساحنانى كورىپ تاعى مۇڭايدى. كورەرمەننىڭ رەنجيتىن ءجونى بار. كونسەرت قازاقستان رەسپۋبليكاسى مادەنيەت جانە تۋريزم مينيسترلىگىنىڭ ۇيىمداستىرۋمەن ءوتتى – ءبىر. قازاقستاننىڭ ۇلىبريتانياداعى مادەني كۇندەرى اياسىندا ءوتتى – ەكى. الايدا كونسەرتتە ءبىراز ولقىلىقتار بولدى. جو-جوق ماسەلە ديماشتا ەمەس جانە بولۋ دا مۇمكىن ەمەس. بۇل جەردە كونسەرتتىڭ ۇيىمداستىرىلۋىندا بولىپ وتىر. وعان جەكە-جەكە توقتالىپ وتەيىك.

حالىقتىڭ قازاق بالاسىنىڭ  كونسەرتىن تەلەديدار ارقىلى تىكەلەي ەفيردە تاماشالايمىز دەگەن ءۇمىتى باسىم ەدى. الايدا ميلليونداعان تىڭدارماننىڭ ءۇمىتى اقتالمادى.

الەۋمەتتىك جەلىدە كونسەرتتىڭ قىسقا بەينەكورىنىستەرى مەن ۇزىندىلەرى تولىپ ءجۇر. وكىنىشتىسى، ساپالىسى جوقتىڭ قاسى. ونىڭ سەبەبى دە تۇسىنىكتى. پروفەسسيونالدى كامەراعا تۇسىرىلمەگەن. جانكۇيەرلەردىڭ ەستەلىك ءۇشىن ۇيالى تەلەفونعا تۇسىرگەن ۆيدەولارى عانا. ءبىراق ولار ساپاسىز بولعانىنا قاراماستان كورىلىمى كوپ. سەبەبى كونسەرتكە بارا الماعان ديماشتىڭ تىڭدارماندارى جاپپاي ۆيدەوسىن ىزدەدى. قولدا بار ماتەريالعا قاناعاتتاندى. ولاردا باسقا امال بولمادى دا.

دەمەك وسىدان كەيىن «ديماش قۇدايبەرگەننىڭ لوندونداعى كونسەرتى نەلىكتەن وتاندىق تەلەارنالاردا تىكەلەي ەفيردە كورسەتىلمەدى؟» دەگەن زاڭدى سۇراق تۋادى. وعان دەيىن ديماش قاتىسقان «I am a singer» جوباسىن قازاق جۇرتى اسىعا كۇتتى. Youtube-تە ۆيدەونىڭ جاريالاۋىن تاعاتسىزدانا كۇتتى. وعان ونىڭ كورىلىمى دالەل بولا الادى. «جوبادا ايتقان ءانى جاريالاندى» دەگەن حابار شىعا سالىسىمەن حالىق جاپاتارماعاي ونى كوردى. سول كەزدە دە ءبىرقاتار ازامات «I am a singer» جوباسىن نەلىكتەن وتاندىق تەلەارنادا كورسەتپەيدى؟» دەپ ساۋال جولداعانى بەلگىلى. الايدا سول كەزدە دە سۇراق جاۋاپسىز قالدى.  

ەندى مىنە سول جاعداي قايتالانىپ وتىر. بۇل جەردە ماسەلە تەرەڭىرەك ەمەس پە، ەدى؟ تەك قازاقستان كولەمىندە  عانا ەمەس، الەمگە تانىلىپ كەلە جاتقان بۇلبۇل ءانشىنىڭ ەۋروپاداعى جەكە كونسەرتىن  مادەنيەت جانە سپورت مينيسترلىگى وتاندىق تەلەارنادان تىكەلەي ەفيردە كورسەتسە، تىڭدارمان دا ريزا، تەلەارناعا دا جوعارى رەيتينگ، مينيسترلىككە دە ۇلكەن ابىروي بولۋشى ەدى. حان دا ريزا، قالىڭ بۇقارا دا ريزا. الايدا تاعى دا قايتادان «ەگەر»، «وسىلاي بولۋشى ەدى» دەگەن ءتاتتى قيالمەن ءومىر ءسۇرىپ كەلەمىز. ناقتى ناتيجە جوق.  

«سيفرلىق قازاقستان» دەپ ۇرانداتامىز. تەحنيكا دامىعان، تەحنولوگيا مەن اقپارات زامانىندا قازاقستاننىڭ برەندىنە اينالعان ديماش قۇدايبەرگەننىڭ كونسەرتى وتاندىق تەلەارنالاردا تىكەلەي ەفيردە كورسەتىلمەگەنى ۇيات. وعان قارجى جەتپەگەن شىعار دەپ ءوزىڭدى جۇباتايىن دەسەڭ، قازاقتىڭ تاعى ءبىر ماقتانىشى گەنناديي گولوۆكيننىڭ جەكپە-جەگى وتاندىق تەلەارنالاردا تىكەلەي ەفيردە كورسەتىلەدى ەمەس پە؟

كونسەرت وتكەن زال دا تىم كىشكەنتاي كورىندى. مامانداردىڭ ايتۋىنشا، ديماشتىڭ دياپازونى كەڭ، وكتاۆاسى وتە جوعارى. ءبىر ساراپشى 6 دەسە، ەندى ءبىرى 5 ەكەنىن ايتادى. ديماشتىڭ داۋىسى وپەرالىق داۋىسقا  دا كەلەدى. سوندىقتان، ونىڭ تار ساحنادا بارىن سالىپ ءان ايتقانى كونسەرتكە كەلگەن قاۋىمعا دۇرىس جەتتى مە؟ زالدىڭ اكۋستيكاسى ديماشتىڭ داۋىسىن تابيعي، سول كۇيىندە ادەمى جەتكىزۋىنە ساي كەلدى مە؟ ءتىپتى مەيرامحانادا ءان ايتىپ ءناپاقاسىن تاۋىپ جۇرگەن انشىلەردىڭ ءوزى اكۋستيكاسى دۇرىس ەمەس عيماراتتاردا ءان شىرقاماۋعا تىرىسادى.

ساناۋلى ساعاتتا ونەرىمەن، بويىنداعى تالانتىمەن بۇكىل الەمدى سۇيسىندىرگەن ديماش قۇدايبەرگەن لوندوندا قازاقتىڭ قارا دومبىراسىن كۇمبىرلەتتى. «اداي» كۇيىن قۇيقىلجىتا تارتىپ قازاقتىڭ ۇلتتىق اسپابى – دومبىرانىڭ سازدى ۇنىمەن شەتەلدىكتەردى ءتانتى ەتتى. قازاقتىڭ حالىق ءانى «دايديداۋىن» شەتەلدىكتەرگە جاتقا ايتقىزدى. بىرنەشە ساعات بويى  تىك تۇرىپ 29 ءاندى جاندى داۋىستا شىرقاعان ديماش، كونسەرتتەن تۇسكەن قارجىنى جاس تالانتتاردىڭ وركەندەۋىنە قۇياتىن بولدى.

ەندى قازاقستاندى ديماشىمىز ارقىلى الەم تاعى تانيتىن بولادى. تاۋەلسىزدىك كۇنى جاقىنداپ كەلە جاتقان تۇستا  ديماش قۇدايبەرگەنگە  ماراپات بەرىلمەسە، ول ەندى ەلدىگىمىزگە سىن.