گرۋزياداعى ەكىنشى تۋردىڭ پرەزيدەنتتىك سايلاۋىندا سالومە زۋرابيشۆيلي جەڭىسكە جەتتى. ورتالىق سايلاۋ كوميسسياسىنىڭ الدىن الا جاسالعان ەسەبى بويىنشا ول 59،52 پايىز داۋىس جيناپ، ەل پرەزيدەنتى اتاندى. ال ونىمەن باسەكەگە تۇسكەن گريگول ۆاشادزە 40،40 داۋىسپەن ەكىنشى ورىن الدى. تاقتالاستا ءسويتىپ، «گرۋزين ارمانى» پارتياسىنىڭ اتىنان ۇسىنىلعان كانديدات جەڭىسكە جەتتى. ناقتى دەرەككە جۇگىنەر بولساق، زۋرابيشۆيليگە 1.1 ميلليون ادام داۋىس بەردى، ال ۆاشادزە 780 مىڭ گرۋزيننىڭ داۋىسىن الدى.

حالىقتىڭ 52،23 پايىزى قاتىسقان بۇل سايلاۋعا شەتەلدە تۇراتىن گرۋزيندەر دە داۋىس بەردى. ەندى زۋرابيشۆيلي ەلدى التى جىل باسقاراتىن بولادى. بۇل –حالىق سايلايتىن سوڭعى پرەزيدەنت. ال بۇدان كەيىنگى پرەزيدەنتكە پارلامەنتتەگى 300 دەپۋتات داۋىس بەرەتىن بولادى.  

زۋرابيشۆيلي 1952 جىلدىڭ 18 ناۋرىزىندا پاريجگە قونىس اۋدارعان ساياسي ەميگرانتتەردىڭ وتباسىندا دۇنيەگە كەلگەن. ول 30 جىلعا جۋىق فرانسيانىڭ سىرتقى ىستەر مينيسترلىگىندە قىزمەت ىستەگەن. 2004-2005 جىلدارى ەلىنە كەلىپ، گرۋزيانىڭ سىرتقى ىستەر ءمينيسترى لاۋازىمىندا بولدى. 2005 جىلى «گرۋزيا جولى» اتتى پارتيا قۇردى. 2007-2009 جىلدارى سالومە زۋرابيشۆيلي ەل وپپوزيسياسىندا باسقا ساياسي ۇيىمدارمەن بىرگە سااكاشۆيليگە قارسى بەلسەندى جۇمىس ىستەدى، نارازىلىق شەرۋىن ۇيىمداستىردى. ءبىراق كوپ ۇزاماي ساياساتتان مۇلدەم كەتۋدى ۇيعاردى. 2013 جىلى فرانسيا جانە گرۋزيا ازاماتى بولعاندىقتان ونى ورتالىق سايلاۋ كوميسسياسى پرەزيدەنتتىككە كانديدات رەتىندە تىركەۋدەن باس تارتتى. 2016 جىلدىڭ تامىزىندا فرانسيا ازاماتتىعىنان باس تارتقان ول قايتادان پرەزيدەنتتىك سايلاۋعا تۇسەتىنىن جاريا ەتتى. ءسويتىپ، «گرۋزين ارمانى» پارتياسىمەن بىرىگىپ، ءوزىنىڭ كىم ەكەنىن دالەلدەپ جانە ەلدەگى باسقا دا مۇددەلەس ۇيىمداردىڭ قولداۋىمەن جەڭىسكە جەتتى. ال ميحايل سااكاشۆيليدىڭ جاقتاسى ۆاشادزە نەلىكتەن جەڭىلىپ قالدى؟ مۇنىڭ بىرنەشە سەبەپتەرى بار:

1. بۇرىنعى پرەزيدەنتتىڭ مۇددەلەسى گريگول ۆاشادزە ەگەر پرەزيدەنتتىك سايلاۋدا جەڭىسكە جەتەتىن بولسا، ەڭ الدىمەن سااكاشۆيليدى جانە ونىڭ تۇرمەدە جاتقان بارلىق جاقتاستارىن بوساتۋعا ۋادە بەردى.
2. ال جاڭارۋ مەن قوعامداعى وزگەرىستەردى قالايتىن حالىق سااكاشۆيليدىڭ ادامدارىنىڭ قايتادان بيلىككە كەلۋىن قالاعان جوق. ەگەر ۆاشادزە پرەزيدەنت بولسا، سااكاشۆيليدىڭ ايتاقتاۋىمەن ەلدە تاعى دا تەكەتىرەس ورىن الۋى ابدەن مۇمكىن ەدى. سوندىقتان مۇنىڭ اۋىر زارداپتارى بولاتىنىن حالىق ءتۇسىندى.
3. ونىڭ ۇستىنە سااكاشۆيليدىڭ ۋكرايناداعى ىستەگەن ساياسي وپپوزيسيالىق جاعىمسىز ارەكەتتەرىنە گرۋزيندەر تاراپى جاعىمسىز باعا بەردى. شىن مانىندە گرۋزيا تاعى دا ازاماتتىق سوعىسقا دۋشار بولۋى مۇمكىن ەدى.

ال «گرۋزين ارمانى» پارتياسىنىڭ اتىنان ۇسىنىلعان، پاريجدە تۋىپ، ساياسي بەلسەندىلىگىمەن گرۋزيادا كوزگە تۇسكەن ءزۋرابيشۆيليدى حالىق نەگە قولدادى؟

1. ساراپشىلاردىڭ ايتۋىنا قاراعاندا، ءزۋرابيشۆيليدى قولداعان جەتەكشى پارتيا مەن حالىقتىڭ باسىم كوپشىلىگى سااكاشۆيليدىڭ ەلگە قايتادان ورالۋىن قالاعان جوق.
2. ەكىنشى تۋردىڭ بارىسىندا زۋرابيشۆيلي حالىققا تىكەلەي ساۋال تاستادى: ءبىز، نە سااكاشۆيلي؟ كىمدى تاڭدايسىز؟
3. وسىنداي ساۋال قويۋ ارقىلى زۋرابيشۆيلي ءارى-سارى كۇيدە تۇرعان حالىقتىڭ ءبىرازىن ءوز جاعىنا تارتىپ اكەتتى. ءسويتىپ، وسىدان التى-جەتى جىل بۇرىن گرۋزياعا كەلىپ، ساياسي بەلسەندىلىگىن باستاعان سالومە زۋرابيشۆيلي ناقتى باعدارلاماسىنىڭ ارقاسىندا پرەزيدەنتتىككە سايلاندى.

سونىمەن ورالمان اتانعان سالومە زۋرابيشۆيلي كىم؟

1. ونىڭ اتالارى 1918-1920 جىلدارى گرۋزيادا كەڭەس وداعى ورناعاننان كەيىن قۋدالاۋعا ۇشىراپ، پاريجگە كەلىپ تۇراقتاعان جەتى ساياسي ەميگرانتتىڭ ءبىرى.
2. ءزۋرابيشۆيليدىڭ قوس ديپلومى بار. ول ءپاريجدىڭ ساياسي عىلىمدار ينستيتۋتى مەن اقش-تىڭ كولۋمبيا ۋنيۆەرسيتەتىن بىتىرگەن.
3. فرانسيانىڭ سىرتقى ىستەر مينيسترلىگىندە، بۇۇ-دا، ەقىۇ-دا جانە فرانسيانىڭ يتالياداعى ەلشىسى بولىپ قىزمەت ىستەگەن.
4. ول فرانسيانىڭ بىرنەشە مەملەكەتتىك وردەنىمەن ماراپاتتالعان.
5. زۋرابيشۆيلي ەكى رەت تۇرمىسقا شىققان. ەكىنشى كۇيەۋى گرۋزين فيلوسوفى، تاريحشى، پۋبليسيست – انري دجاشيا. ول وسىدان التى جىل بۇرىن قايتىس بولدى.
6. ءبىرىنشى كۇيەۋى نيكولوز گۋگۋشۆيليدەن قالعان ەكى بالاسى بار. ۇلكەن ۇلى تەيمۋراز بىرىككەن ۇلتتار ۇيىمىندا، ال قىزى كەتيەۆان فرانسيا تەلەرنالارىنىڭ بىرىنشە تەلەجۇرگىزۋشى بولىپ جۇمىس ىستەيدى.