«ميمينو» كينوسى   ءۇشىن  1978 جىلى سسرو-نىڭ مەملەكەتتىك سىيلىعىن، 1980 جىلى گرۋزيانىڭ حالىق ءارتىسى اتانعان ۆاحتانگ كيكابيدزە بۇعان دەيىن كەڭەس وداعىنىڭ ءانۇرانى مەن ەلتاڭباسىن جانە وراق پەن بالعا بەلگىسىن جەك كورەتىنىن ايتقان. تانىمال ءارتىستىڭ بۇل مالىمدەمەسى تالايدى تاڭقالدىرعانى دا راس. ويتكەنى بار اتاقتى ول سسرو كەزىندە الدى، ەلگە تانىلدى. كەڭەس وداعىنىڭ بارلىق اۋماعىندا گاسترولدىك ساپاردا ءجۇردى، جەگەنى الدىندا، جەمەگەنى ارتىندا بولدى. الايدا پوستكەڭەستىك ەلدەر تاۋەلسىزدىك العاننان كەيىن ءار اكتەر ءوز ەلىندە ءومىر ءسۇردى. بۇرىنعىداي بايلانىس تا دامىماي قالدى. اسىرەسە رەسەيدە داڭقى اسقان ۆاحتانگ كيكابيدزەنىڭ ءپۋتيننىڭ مەملەكەتىنە اياق باسپاعانىنا ون جىلدان اسقان ەكەن.

–«پۋتين مەن مەدۆەديەۆ ەل باسقىرىپ وتىرعاندا مەن رەسەيگە ەشققاشان بارمايمىن» دەپ مالىمدەمە جاساعان ۆاحتانگ كيكابيدزە شىن مانىندە وسى كۇنگە دەيىن ورىس جەرىنە اياق باسقان جوق. مۇنىڭ سەبەبى نەدە؟

2008 جىلى گرۋزين-وسەتين جانە گرۋزيا مەن ابحازيا اراسىندا  تەكەتىرەس باستالعاندا، بۇل داۋعا رەسمي ماسكەۋدىڭ تىكەلەي ارالاسقانى بەلگىلى. سودان بەرى ەكى ەل اراسىندا ديپلوماتيالىق قاتىناس توقتادى. بۇعان نارازىلىق رەتىندە ۆاحتانگ كيكابيدزە «رەسەيگە اياق باسپايمىن» دەپ ءوزىنىڭ نارازىلىعىن دا بىلدىرگەن. ءقازىر دە رەسمي ماسكەۋ گرۋزيا قۇرامىنداعى وڭتۇستىك وسەتيا مەن ابحازياعا بارىنشا قولداۋ كورسەتىپ وتىر.

ءبىراق كەشە  ورىستىڭ ءبىرقاتار اقپارات قۇرالدارى حابارلاما تاراتىپ، كيكابيدزەنىڭ رەسەيگە جاسىرىن كەلىپ قايتقانىن ءمالىم ەتكەن. «سانكت-پەتەربۋرگتىڭ «شالياپين» مەيمانحاناسىندا 40 مينۋت ءان سالىپ، 40 مىڭ ەۋرو الدى» دەگەن اقپاراتقا اتاقتى ءارتىس  نە دەيدى؟  بۇل قانشالىقتى اقيقات؟

–بۇل – وتىرىك. مەن 2008 جىلدان بەرى رەسەيدىڭ بىردە ءبىر قالاسىندا بولعان جوقپىن. ودان بەرى ون جىل ءوتتى. ءازىر بارمايتىن دا شىعارمىن»، –دەپ ءمالىم ەتتى ۆاحتانگ كيكابيدزە.