جاڭادان وتاۋ قۇردىڭىز با؟ جارىڭىز ەكەۋىڭىز قازاقستاندىقسىزدار ما؟ ەڭ باستىسى جەكە باسپانالارىڭىز جوق پا؟ وندا حالىق ءۇشىن جۇمىس ىستەپ وتىرعان «نۇر وتان» پارتياسى سىزدەر ءۇشىن تاپتىرماس مۇمكىندىك سىيلاماق. بۇگىندە پارتيا جاس وتباسىلاردىڭ باسپانالى بولۋىنا كومەكتەسپەك نيەتتە. بۇل تۋرالى پارتيانىڭ سولتۇستىك قازاقستان فيليالىنىڭ ەسەپ بەرۋ كونفەرەنسياسىندا جۋىردا عانا سايلانعان حاتشى يليا تەرەنچەنكو مالىمدەگەن ەدى. جالپى ەلباسىنىڭ تاپسىرمالارى، جولداۋىندا ايتىلعان حابارلامالارىنىڭ جۇزەگە اسىرىلۋى «نۇر وتاننىڭ» قاتاڭ باقىلاۋىندا. بۇل جولى پارتيا «نۇرلى جول»، «نۇرلى جەر»، «7-20-25» سەكىلدى مەملەكەتتىك باعدارلامالاردىڭ بەلسەندى تۇردە ورىندالۋىن باقىلاۋعا الدى.

بۇدان بولەك، كونفەرەنسيا بارىسىندا پارتيانىڭ الداعى جوسپارلارىن جۇزەگە اسىرۋ جايىندا ءسوز قوزعالدى، جوبالارعا دا توقتالىپ ءوتتى. ماسەلەن، بيىل سولتۇستىك قازاقستان وبلىسىندا ينتەراكتيۆتى قۇرىلعىلار، روبوتوتەحنيكاعا ارنالعان بۇيىمدارمەن قامتاماسىز ەتىلگەن 11 IT-سىنىپ اشىلدى. جىل سوڭىنا دەيىن تاعى 4 IT-سىنىپ پەن 2 IT-ورتالىق اشىلادى دەپ جوسپارلانىپ وتىر.

يليا تەرەنچەنكونىڭ ايتۋىنشا، جالپى قازاقستاندا 24-كە جۋىق IT ورتالىق جۇمىس ىستەپ تۇر. وندا جۇمىسسىز ءارى ءوزىن-وزىن ءوزى قامتاماسىز ەتەتىن مىڭعا جۋىق جاس ەڭبەك ەتەدى. ال «نۇر وتان» پارتياسى ولارعا قاشان دا قولداۋ كورسەتۋگە دايىن.

بۇدان بۇرىن «نۇر وتان» پارتياسى ءتوراعاسىنىڭ ءبىرىنشى ورىنباسارى ماۋلەن اشىمبايەۆ «نۇر وتان» پارتياسى ەلباسى جولداۋىنىڭ جۇزەگە اسۋىن باقىلاۋدى كۇشەيتەتىنىن مالىمدەگەن.

مەملەكەت باسشىسى نۇرسۇلتان ءابىش ۇلى نازاربايەۆ قازاقستان حالقىنا ارنالعان جىل سايىنعى «قازاقستاندىقتاردىڭ ءال-اۋقاتىنىڭ ءوسۋى: تابىس پەن تۇرمىس ساپاسىن ارتتىرۋ» اتتى جولداۋىندا ءبىرقاتار تاپسىرما بەرگەن ەدى. بۇگىندە ولاردى جۇزەگە اسىرۋ جولىندا ءتۇرلى جۇمىستار اتقارلىپى جاتىر. وسى ماقساتتا اشىمبايەۆ ءوڭىر-وڭىردى ارالاپ، پرەزيدەنتتىڭ بەس الەۋمەتتىك باستاماسىنىڭ ورىندالۋ بارىسىن تەكسەرۋدى قولعا العان.