ەلىمىزدەگى ەسەر ءان جازىپ، ەسسىز كليپكە تۇسكەن انشىلەر،  حايپتىڭ سوڭىنا تۇسكەن جۇلدىزدار  بيىل دا ەل-جۇرتتى شۋلاتتى.  ءبىرى  ەرسى قىلىقتارىمەن  جاعا ۇستاتسا، باسقاسى جەكە ومىرىندەگى وزگەرىستەرمەن حالىقتى تاڭداي قاقتىرعان. تىزە بەرسەڭ كوپ ايتەۋىر.  كىم  ەسەر قىلىعىمەن ەستە قالدى، ال كىم ءۇشىن بۇل جىل ءساتتى بولدى؟ تانىمال نۋمەرولوگ قانداي بولجام جاسادى؟ جۇرتتىڭ  اۋزىنان تۇسپەيتىن  شوۋ بيزنەس وكىلدەرىنىڭ توپتاماسىن ەۋرازيا ءبىرىنشى ارناسى جاساقتادى.

بۇرىنعىدان وزگەرمەي، بيىل دا باسى داۋدان ارىلماعان، شوق باسىپ، اڭداماي سويلەيتىن جۇلدىزداردىڭ ءبىرى – تورەعالي ءتورالى دەسەك ەش قاتەلەسپەيمىز. ءوزىن «ۇلى دالا بالاسىمىن» دەپ  اتاعان  حالىقتىڭ ەركەسى ءبىر ەمەس، بىرنەشە رەت دورەكى مىنەز تانىتقانى جۇرتتىڭ ەسىنەن ءالى كەتەر ەمەس. 

"ءار ءجۇرىسىنىڭ ءوزى حايپ بولىپ كەتتى عوي." 
"ءوز باسىم ونىڭ ەرسى قىلىقتارىنا قارسىمىن. ءانشىمىن دەپ ۇلگى كورسەتۋدىڭ ورنىنا، ىستەپ جۇرگەنى مىناۋ". 
"موجەت جۇلدىزدىق اۋرۋى شىعار" 
"تورەعالي ءوز قىلىعىن بىلگەندە، وزىنە دۇرىس دەپ تۇر عوي مىنانىڭ ءبارىن" 

ءبىرى تورەعاليدىڭ ەرسى قىلىقتارىن جۇلدىز اۋرۋى دەسە ، وزگەسى  كەزەكتى حايپتىڭ كورىنىسىنە بالادى.  دەسە دە، جاسىراتىنى جوق، ول نە ىستەسە دە، حالىقتىڭ سۇيىكتى ءانشىسى بولىپ قالۋدا. نەگە؟  وسىعان قاتىستى نۋمەرولوگ كلارا كۇزدەنبايەۆادان ءبىلىپ كوردىك.  

«بۇل ادامدى اقىل ەمەس، ەموسيا  بيلەيدى. ءوزىنىڭ ايتقان سوزىنەن تايمايتىن جان.  ونىڭ جۇلدىزىندا ناقتى بەلگى جوق بولعاننان كەيىن،  كەيدە ول نە ىستەپ جاتقانىن ءوزى دە بىلمەي قالادى.  سەبەبى ول ەموسياعا بەرىلەدى. الايدا، ول نە ىستەسە دە،  وعان بارلىعى كەشىرىممەن قارايدى. ويتكەنى بۇل ازامات ناعىز حالىقتىڭ ەركەسى. وندا 2 «7» بار ەكەن. ال 2 «7» تەك پرەزيدەنتتەردە عانا كەزدەسەدى» - دەيدى نۋمەرولوگ كلارا كۇزدەنبايەۆا. 

باسى داۋعا قالىپ، ارتىنان ءسوز ەرگەن تورەعالي تورەالى   بيىلعى قىلىقتارىنان ءالى دە ساباق الماعان ءتارىزدى. سۇراق قويعان ەۋرازيا تىلشىلەرىنە تاعى دا  مىنەز تانىتتى. 

ال قارا پياردى جانى سۇيە بەرمەيتىن، وتباسى جايلى سۇحبات بەرۋدەن قاشاتىن ايقىننىڭ بيىلعى جاڭالىعى حايپتان دا اسىپ ءتۇستى. ول  جاسىرىن تۇردە ەكىنشى رەت«كەشيۋ» توبىنىڭ ەكس- انشىسىمەن شاڭىراق كوتەرىپ، الەۋمەتتىك جەلى دە ءبىراز سىنعا ءىلىندى.  ءتىپتى ەكەۋى دۇركىرەتىپ ۇيلەنۋ تويىن جاساماسا دا، ەل كۇتپەگەن تۇڭعىشتارىنىڭ 1 جاسىن شۋلاتىپ وتكىزدى.  

«ءماسساعان، قاراڭىزشى، ولاردا ساندار سايكەستىگى بايقالادى. 10 جانە 10. ەكەۋى دە ءبىر كۇنى تۋعان.  ياعني، ولار بىر-بىرىنە تارتىلىپ تۇرادى دەگەن ءسوز. الايدا، مەنىڭ ايتاتىنىم،  ەكەۋى دە وتە قىزعانشاق.  سودان تەزىرەك ارىلىپ، شىدامدى بولعاندارى ءجون. ەنەرگيالارى دا تاسىپ تۇرادى ەكەن. ءبىراق،  قۋانتارلىعى، قارىم-قاتىناستا بىر-بىرىمەن تەڭ» - دەيدى نۋمەرولوگ كلارا كۇزدەنبايەۆا. 

وسىلايشا ەل اۋزىندا ءجۇرىپ، سانىن اشىپ، ءتۇرلى ءارتىس جىگىتتەرمەن جۇلقىنا بيلەپ، ودان قالسا ءسۇيىسىپ حايپ جاساۋدان شارشامايتىن كامشات تا انتي ۇشتىكتە.  ول بيىل وزگە ارىپتەستەرىنەن اسىپ ءتۇستى. قويماي شەشىندى، ءسۇيىستى، جىگىتتەرمەن ايمالاستى. 

"قازاق قىزىنا جات قىلىق قوي. اشىق-شاشىق كيىنۋى." 
"قازاقىلىققا سالسا، ونىڭ اشىق-شاشىق كيىنۋى  ەندى دۇرىس ەمەس دەپ ايتادى. ءبىراق مەن ويلايمىن اركىمنىڭ ءوزىنىڭ ساحنالىق ءستيلى بولادى.  وزىنە ساي، موجەت وزىنە ۇنايتىن شىعار."
"وعان تۇگەلدەي تيىم سالۋ كەرەك دەپ ويلايمىن. ول حالىقتىڭ الدىندا جۇرگەن ءبىزدىڭ ۇلگى ەتەر قىزدارىمىز عوي. سوندىقتان ولار وسىلاي كيىنبەۋ كەرەك دەپ ويلايمىن." 

«وسىنداي ارزان دۇنيەگە بارىپ جۇرگەن ىنىلەرىم قارىنداستارىم، ونسىز دا حالىق ولاردى باعالايدى. حالىقتى ونداي دۇنيەمەن الداۋعا بولمايدى. ول ۋاقىتشا نارسە. ناتيجەسىندە تابىلاتىن اقشاعا سوعان بولا الدانىپ، ەلدىڭ الدىنا شىعىپ، كەلەشەكتە ءوزىنىڭ اتىن تاريحقا باسقاشا ەتىپ جازىپ كەتۋگە بولمايدى. قىز بالالار ەلدىڭ شەشىنىپ شىعىپ، جارتىلاي جالاڭاش شىعىپ ەلدى ەلەڭ ەتكىزەمىن دەپ، حالىقتىڭ الدىندا ءقادىرى بولمايدى» - دەيدى ايتىسكەر اقىن سەرىكزات دۇيسەنعازى.

حالىقتىڭ ەركەتوتايلارىنا اينالعان، حايپ جاسايمىز دەپ ايىپتىڭ استىندا قالعان جۇلدىزداردىڭ بيىلعى سيقى وسى. ال كەلەسى جىلى باسى داۋدان ارىلمايتىن شوۋ بيز وكىلدەرىنىڭ تاعى دا قانداي بىلىق جاسايتىنىن ۋاقىت كورسەتەر.