شىن مانىندە جاقسى كىتاپ ءوز وقىرمانىن وزگەرتە الادى. كىرىسپەسىن باسقا ادام اشسا، قورىتىندىسىن مۇلدە باسقا ادام اياقتاۋى مۇمكىن. بىرەۋلەر ءۇشىن كىتاپ وقۋ باسقا كوزقاراس، جاڭا يدەيالار مەن عاجاپ كوڭىل-كۇي سىيلاسا، تومەندەگى كەيىپكەرلەردىڭ ءومىرىن ءبىر عانا كىتاپ تۇبەگەيلى وزگەرتكەن. ولاردىڭ اڭگىمەسىنەن جاقسى كىتاپتىڭ جۇرەكتەن ورىن الىپ، جاندى ەمدەيتىن قاسيەتى بار ەكەنىن انىق بايقاي الاسىز. ءوز ءومىرىن وزگەرتكىسى كەلەتىن وقىرمانعا Qamshy.kz اقپارات اگەنتتىگى كەرەمەت كىتاپتاردىڭ ءتىزىمىن ۇسىنادى.

• "الحيميك"، پاۋلو كوەلو

“مەن ونى تەڭدەسسىز تۋىندى دەي الماس ەدىم، دەگەنمەن ول مەنىڭ ءومىرىمدى ءبىرجولاتا وزگەرتتى. مەن ونى وقىپ باستاعاندا جوعارعى سىنىپ وقۋشىسى ەدىم، ءوزىم ناقتى بىلمەيتىن كوللەدجگە تاپسىرۋدى ويلاپ جۇرگەنمىن. "الحيميكتى" وقىعاننان كەيىن اۋعانستانعا بارۋعا، كوشپەندى ءومىر سالتىنا دەگەن قىزىعۋشىلىعىم ارتتى. باتىستىڭ كۇيبەڭ ءومىرى مەن قىزىقسىز كۇندەرىنەن الىس ءومىر سۇرگىم كەلدى. كىتاپتان كەيىنگى اسەرىم بولاشاق ارماندارىما باستاما بولدى. مىنە، بىرنەشە جىل وتكەننەن كەيىن مەن ءوز ەلىمنەن كەتتىم. وسىلايشا، جاڭا ومىرگە قادام باستىم". Andrew Horn

• "يۆان ءيليچتىڭ ءولىمى"، ليەۆ تولستوي

“مەنىڭ جاڭا ءومىرىم ءولىم تۋرالى پوۆەستەن كەيىن باستالدى. وندا ءوز ءولىمى كەلگەنگە دەيىن ومىرىنە ريزا بولىپ وتكەن يۆان ءيليچتىڭ وقيعاسى باياندالادى. كىتاپتى وقىپ بىتكەننەن كەيىن مىنا ءبىر اقيقات ويىما ورالدى: "ءوزىن جوعالتقان ادامنىڭ الەمدى بيلەگەنىنەن پايدا بار ما؟". مەن ايناعا قارادىم دا، ەگەر مەن يۆان سەكىلدى ءومىر سۇرسەم، يۆان سەكىلدى ولەتىنىمدى دە ءتۇسىندىم. 2 كۇننەن كەيىن جۇمىسىمدى تاستاپ، تۋعان قالاما ورالدىم. تۋىستارىمنىڭ كۇلكىگە اينالدىرعانىنا قاراماستان، قايتادان ءبىلىم الۋعا كىرىستىم. مەن وقۋىمدى اياقتاۋدى قاتتى ارمانداعان ەدىم." Rudra

• "پروسەسسوردى باعدارلامالاۋ 8088"، ل. داو

“بۇل وقيعا 1984 جىلى بولعان. ءدال سول جىلى دەربەس كومپيۋتەرلەر دۇنيەگە كەلگەن ەدى. مەنى جاڭا تەحنولوگيالار باۋراپ الدى. ءبىراق ول تۋرالى بىزگە مەكتەپتە ەشكىم ەشتەڭە ايتپايتىن. سول كەزدە اعام مەنى ءوزى وقيتىن ۋنيۆەرسيتەتتىڭ كىتاپحاناسىنا اپاردى. ول جەردە وسى كىتاپتى تاپتىم. 800 بەتتىك كولەمدى شىعارماعا 6 اي بويى ءاربىر دەمالىسىمدى ارنادىم. ال، ءقازىر مەن جوعارى دارەجەلى ينجەنەر-باعدارلاماشى مامان اتاندىم". Philippe Roy

• "كوبەلەك"، كەترين حارۆي

"بۇل كىتاپتى سوناۋ 1990 جىلى اۋەجايدان رەيس ۋاقىتىن كۇتۋدە زەرىكپەس ءۇشىن ساتىپ العان ەدىم. مەن ودان كوپ ەشتەڭە كۇتپەدىم. دەگەنمەن ول مەنىڭ جەكە كيەلى كىتابىما اينالدى. مەنىڭ كوڭىل-كۇيىم ناشار بولسا، ءوزىمدى جايسىز سەزىنسەم، وسى كىتاپتى وقىپ شىعام دا، ەرەكشە ەنەرگيا الامىن. ماعان سان مارتە كومەكتەسكەن كىتاپتىڭ مۇقاباسى توزىپ كەتتى. ءبىراق مەن ءۇشىن ونىڭ ورنى بولەك". Martha Lancaster

• "رامزەس"، كريستيان جاك

" "رامزەستى" تالانتتى ەگيپتولوگ كريستيان جاك جازعان. ول ءوز روماندارىندا رامزەستى قايتا ءتىرىلتىپ، وقىرمانعا پەرعاۋندار الەمىنە بويلاۋعا مۇمكىندىك بەرەدى. كىتاپتىڭ تارتىمدى تۇسى تاريحي شىندىعىندا ەدى. سول ارقىلى مەنىڭ تاريحقا دەگەن قۇلشىنىسىم ارتتى. مەن ەگيپتولوگ-تاريحشى بولعىم كەلدى. كەيىنىرەك كلاسسيكالىق فيلولوگياعا اڭسارىم اۋدى. مۇنىڭ ءبارى جاكتىڭ وقيعاسىنان باستالدى." Staroslav Nejc

• "گارري پوتتەر"، دجوان روۋلينگ 

“مەن بۇل كىتاپتاردى 16 جاسىمدا وقي باستادىم. سونىڭ ارقاسىندا بۇگىندە جاقىن دوستارىما اينالعان ادامدارمەن تانىستىم. كىتاپ مەنىڭ وزىمە دەگەن كوزقاراسىمدى وزگەرتتى. مەن ءاردايىم بولەكتەنىپ، ورتامنان وقشاۋلانىپ جۇرەتىنمىن. وسى كىتاپتان كەيىن وزگەشە بولۋدىڭ قالىپتى جاعداي ەكەنىن ءتۇسىندىم".  Eme Walker

• "ءۇش جولداس"، ەريح ماريا رەمارك

"14 جاسىمنان بەرى ول مەنىڭ سۇيىكتى كىتابىما اينالدى. مەن ونى ءار جىل سايىن قاراشا ايىندا وقىپ تۇرامىن. وسى كىتاپ مەنى بىرنەشە جىل جاي عانا دوسىم ساناپ كەلگەن قىزبەن جاقىنداستىردى. مىنە، ەندى 10 جىلدان بەرى ول مەنىڭ سۇيىكتى جارىما، بالالارىمنىڭ اياۋلى اناسىنا اينالدى". Victor Shepelev

• "ۋولدەن نەمەسە ورمانداعى ءومىر"، گەنري ديەۆيد تورو

"كىتاپتا 2 جىل وركەنيەتتەن جىراق، جالعىز ءومىر سۇرگەن جازۋشىنىڭ تاجىريبەسى تۋرالى باياندالادى. وسى كىتاپتان كەيىن مەن ءۇي تۇرعىزعىم كەلدى. ءوز اۋلامدا وسكەن 4 اعاشتى شاۋىپ، ارانى جالعا الدىم. ەسكى مەكتەپتەن تەگىن تەرەزە الىپ، بۇرىنعى ءۇيىمنىڭ جيھازدارىن ورناتتىم. مۇنىڭ بارىنە 1000 دوللاردان دا از قاراجات جۇمسادىم". Joseph Skinkis