ءقازىر كەۋدەسىنە جەز-تەمىردەن سالپىنشاق تاقپاعان ادام قالمادى-اۋ، ءسىرا. باي دا، جارلى دا، قاتىسى بار دا، قاتىسى جوق تا تاعىپ جاتىر، تاعىپ جاتىر، تاعىپ جاتىر... جيىن-سالتاناتتاردا قول شاپالاقتاۋدان شارشايسىڭ، ءتىپتى. پالەندەي ەلدىڭ قۇرمەتتى ازاماتى، پالەن مەكەمەنىڭ پالەن جىلدىعىنىڭ مەرەيتويلىق توسبەلگىسى، پالەن سالانىڭ ۇزدىگى... «ەڭبەگىم بار ما، جوق پا، لايىقپىن با، لايىق ەمەسپىن بە؟» دەپ جاتقان ءبىرى جوق. سەلفيلەتىپ، فوتولاتىپ، الەۋمەتتىك جەلىنى جاۋلاپ الدى. مەملەكەتتىك ناگرادا بولسا مەيلى عوي، ءتۇرلى قوعامدىق ۇيىمداردىڭ، مەكەمەلەردىڭ ارزانقول ماداق-ماراپاتتارى. بەلگىسىز ۇيىمداردىڭ بەلگىسىز ءتوراعالارى قولىن قويىپ، جەكە كاسىپكەر دەپ تىركەتكەن مورلەرىن باسىپ، ەسەپسىز ۇلەستىرىپ جاتىر. مۇنداي «ماراپاتتار» اقىلى. تولە دە – الا بەر! ءبىر ساتتىك الدانىش، ءبىر مەزەتتىك قۋانىش. سوسىن تەمىر-تەرسەگىڭىزدىڭ ەشكىمگە كەرەگى جوق، بالا-شاعاعا الدانىش، ويىنشىق بولارى داۋسىز...
سوندا مىنا جۇرت جالعان اتاققا نەسىنە ۇمتىلىپ جاتىر؟ قايتپەكشى بۇل تەمىر-تەرسەكتى؟ الدە، داڭق-ماراپاتقا ەتىمىز ۇيرەنىپ قالدى ما؟ الگى تىركەۋسىز توسبەلگىلەرىن سارعايتىپ، توت باسىپ كەتكەنشە كەۋدەلەرىنەن تاستاماي تاعىپ جۇرەتىندەردى قايتەرسىڭ؟! سونىسىن سۇق ساۋساعىمەن شۇقىپ كورسەتىپ، «مەنى بايقا!» دەپ قورقىتاتىندار دا از ەمەس. ءبىر جاپىراق العىس حاتىنىڭ سۋرەتىن الەۋمەتتىك جەلىگە سالىپ، «ال، قۇتتىقتاساڭدار بولادى!» دەپ تاناۋىن كوككە كوتەرە «لايك» جيناۋعا اسىعاتىن زامانداستارىمىز دا جەتەرلىك. جاپپاي – حايپ! «حايپ» دەپ وتىرعانىمىز جالعان اتاق قۋىپ، پيارلاتىپ نەمەسە ءوزىن-وزى جارنامالاۋدا الدىنا جان سالمايتىن جاندارعا ارنالعان جاڭا نەولوگيزم.
كەزىندە موڭكە بي: «ازارسىڭ، جۇرتىم، ازارسىڭ، ازارىڭنىڭ بەلگىسى: قۇنى جوق قاعازدى سۋداي شاشارسىڭ...» دەپ ەسكەرتىپ ەدى، الدە سونىڭ كەبى كەلدى مە ەكەن؟
بيىل – جاستار جىلى عوي. وسىعان وراي مەندە ۇسىنىس بار. مەملەكەتتىك ناگرادادان باسقا بارلىق جالعان اتاق-داڭق، اقىلى توسبەلگىلەرگە موراتوريي جاريالايىق! مەدال تاراتقىشتار ودان گورى ۇيسىز-كۇيسىز جۇرگەن جاستارعا باسپانا سىيلاسىن، زەينەت جاسىنا جەتسە دە ورنىن بوساتپاي وتىرعان شال-شاۋقاندى قۇرمەتتى دەمالىسقا جىبەرىپ، تالانتتى دا ىسكەر جاستارعا جۇمىس تاۋىپ بەرسىن، ەلىمىزدى بايىتۋدى كوزدەيتىن جاستارعا ارزان نەسيە اپەرىپ، شاعىن بيزنەسپەن اينالىسۋىنا مۇمكىندىك جاساسىن، كرەاتيۆتى ويلايتىن جاستاردىڭ دەپۋتاتتىققا، باسقا دا سايلانبالى ورگاندارعا ۇمتىلۋىنا جول اشسىن!
ەلباسىمىز وسى جىلدى جاستار جىلى دەپ جاريالاي تۇرىپ: «ءبىزدىڭ جاستارىمىزدى، قازاقستاننىڭ بولاشاعىن ءار سالادا قولداۋىمىز كەرەك»، – دەپ ۇلكەندەرگە، بىزدەرگە، ءۇمىت ارتىپ ەدى عوي. ەندەشە، قولدان كەلسە قۋاتتايىق تا!
بەكجىگىت سەردالى
پىكىر قالدىرۋ