جاساعان بولاشاققا جورىق دەپ پە ەم؟
ويىمدى وتەم بۇگىن ءبولىپ كوپپەن.
قازاقتىڭ تاريحىندا اقىندار كوپ،
ەلىنە ماڭداي تەرىن سەنىپ توككەن.
كەشەگى بۇقار جىراۋ دارا دانا،
ءار ءسوزىن ابىلايعا ەرىكتى ەتكەن.
بار جايدى بىلگەننەن سوڭ عانا بۇلاي،
ىرىسىن قازاعىمنىڭ تولىقتى ەتكەن.
ءاۋ باستان حانعا ايتىلعان شىندىق قانا،
باسشىنىڭ ءاربىر ءىسىن كورىكتى ەتكەن.
بۇگىنگى زيالىنىڭ ءتۇرىن كورسەڭ،
شەتىنەن ءوزىن ويلاپ شوگىپ كەتكەن.
باسشىلىق سۇراي قالسا بۇلك ەتپەستەن،
جاعدايى دەيدى جۇرتتىڭ وڭىپ كەتكەن.
اقىلى جەتكەنىمەن باتىلى جوق،
سالقىنى ساياساتتىڭ سوعىپ كەتكەن.
يمانى جۇرتتا قالعان اعالاردىڭ،
ميلارى مەتاللولوم بولىپ كەتكەن.

قازاقتىڭ از بولدى ما زور ۇلدارى؟
ۇققانعا شىن ۇلاعات سونىڭ ءبارى.
تولە بي، قازىبەكپەن ايتەكەلەر،
پارىزىن پاراساتپەن ورىنداداى.
كەسىپ ايتقان يماندىلىق ارقاسىندا،
تاريحتىڭ تۇر عوي انە تورىندە ءالى.
ال بۇگىنگى بي دەگەن دەپۋتات قوي،
ماعىناسىن ۇعىنسا ونىڭ داعى.
بۇرىنعىلار حالىققا جول كورسەتەتىن،
بۇگىنگىلەر تاپپاي ءجۇر ءوز جولىن دا ءالى.
بۇگىنگىلەر بي دە ەمەس ءبيشى دە ەمەس،
بيشىك بوپ تۇر بيلىكتىڭ قولىنداعى.

قىرانداي شىرقاي بىلسەم شالقىپ كەپ ءبىر،
سويلەيىن، بۇقارلاردان سارقىت بوپ ءبىر.
قازاقستاندى ءبىر ۇلكەن سەميا دەسەك،
جانۇيامىز شالشىق بوپ تۇر،بالشىق بوپ تۇر.
كۇيەۋ بالامىز شەتەلگە قاشقانمەنەن،
كيگەنى جىبەكپەنەن بارحىت بوپ تۇر.
اعامىزدا اقىل جوق دەگەنمەنەن،
جايى جاقسى قارىنى شارقىت بوپ تۇر.
ەلەڭدەپ اكەمىزگە قاراعانمەن،
ول جاققا دا جەتپەيتىنى ءتارتىپ بوپ تۇر.
ءۇش ءجۇزدىڭ تاعدىرىنان بۇل كۇندەرى،
ءۇش قىزدىڭ بولاشاعى ارتىق بوپ تۇر.

ءتىل جايلى تەبىرەنىپ تولعاعاندا،
اقيقات ايتار بولسام قولدار اللا.
ءتىل جىلى دەپ ءبىر كەزدە ات قويىپ ەك،
مەدەۋ بولا المادى-اۋ ول دا جانعا.
ءبىر جىلدا ءتىلىم قالاي وڭىپ كەتسىن؟
وسى كۇنگە جەتكەنشە وڭباعاندا.
ون بەس جىل وزگە تىلدە سويلەگەندەر،
ءوز ءتىلىن بۇل ءبىر جىلدا قولعا الار ما؟
جىل ەمەس ءبىر اق كۇندە سويلەر ەدى،
زاڭىمىز مۇنشا سايقال بولماعاندا.
اپىر-اي ءبىزدىڭ كەمەل ۇكىمەتكە،
وسىدان باسقا اقىل قونباعان با؟
ءبىر ءتىلدى ءبىر جىل بويى ۇيرەنەتىن،
تىلسىزدەر سوقىرشا ما سورلى ادام با؟
قىرىق ەكى ءارىپتى جاتتاۋ ءۇشىن،
ءۇش ءجۇز الپىس كۇن كەرەك پە سوندا ولارعا؟!

رينات زايتوۆ