"تاعدىرى قىل ۇستىندە تۇرعان سايراگۇل ساۋىتبايدى قالايدا ەلدە قالدىرۋعا كۇش سالماساق بولمايدى.

بۇل جەردە ايرىقشا ەسكەرەتىن ءبار اڭگىمە – ونى بىلىكتى زاڭگەر، ءوز ءىسىنىڭ مامانى ابزال قۇسپان قورعاۋىنا الدى. العاش رەت Abai.kz پورتالىندا مىقتى جورنالشى نۇرگەلدى ءابدىعاني ءىنىمىز ارقىلى كۇللى ەلگە بەلگىلى بولعان بۇل وقيعادان ۇپاي جيناپ قالۋدى كوزدەگەن توپتار، ءىشىنارا شوۋمەن «جۋرناليستەر»، «ۇلتشىلدار» پايدا بولدى دا، ونسىزدا قاتىپ تۇرعان سايراگۇلدىڭ باسىن شىر اينالدىرىپ جىبەردى. ولار ءۇشىن اتاق جيناۋدىڭ ءبىر ورايلى ءساتى وسى ەدى.

سونىمەن قاتار، ايقايعا اتتان قوساتىن كەي پىسىقتار «جەرگىلىكتى قازاق»، «ورالمان قازاق» دەپ ونسىزدا قىرىق پىشاق ەل ءىشىن ودان ءارى ءبۇلدىردى. ۇلتتىق بىرلىك بولماعان جەردە نەنىڭ جەڭىسى، نەنىڭ دامۋى؟..

باسقاسى باسقا، سايراگۇلگە ەڭ كەرەگى – جۇرتتىڭ قولداۋى مەن مىقتى زاڭگەردىڭ كومەگى، ءبىزدىڭ سوت پەن سىرتقى جانە ىشكى ىستەر ورگاندارىنىڭ ادامي شەشىمى.

ءوز باسىم ابزالعا بەك سەنەمىن. 2017 جىلى ەلدى ەلەڭدەتكەن زايسان شەكاراسىنداعى گۇلجان اپايدىڭ 60 مىڭ دوللارىن تاركىلەپ الۋ وقيعاسى كەزىندە ەتەنە جۇمىس ىستەدىك. كوك تيىن الماي 8 اي بويى تەگىن كومەك كورسەتىپ، سوت وتىرىستارىندا زاڭ اياسىندا ءساتتى تاكتيكالار قولدانا وتىرىپ، جەڭىپ شىقتى. گۇلجان اپايدىڭ ول اقشاسى نەگىزى «قورجىنعا» ءتۇسىپ كەتكەن بولاتىن.
ءار توپتاردىڭ كەزەك-كەزەك تىكەلەي ەفيرگە شاقىرا بەرگەنىنە كونە بەرمەي، ابەكەڭمەن سايكەسە كۇرەسۋى كەرەك.

قىسقاسى، كوپ ادامعا قىزىق پەن شۋ كەرەك، ال سايراگۇلدىڭ ءوز تاعدىرى تەك وزىندە.
وعان ءبىزدىڭ قولداۋىمىز كوپ كەرەك. شىرىلداعان ايەلدى توبىرلىق سانانىڭ قۇربانى ەتىپ المايىق".

ۇلاربەك دالەي ۇلىنىڭ Facebook-تەگى پاراقشاسىنان الىندى

ايتا كەتسەك، "الماتى وبلىستىق پوليسيا دەپارتامەنتىنىڭ كوشى-قون باسقارماسى قىتايدا “قىسىم كوردىم” دەپ مالىمدەپ، شەكارانى زاڭسىز كەسىپ وتكەنى ءۇشىن سوتقا تارتىلعان ەتنيكالىق قازاق سايراگۇل ساۋىتبايعا بەرىلگەن "پانا ىزدەۋشى تۇلعا" كۋالىگىنىڭ مەرزىمىن تاعى ءۇش ايعا ۇزارتتى. 28 قاڭتار كۇنى وبلىستىق پوليسيا دەپارتامەنتى كوشى-قون قىزمەتى باسقارماسىنىڭ وكىلى ەلمۇرات نۇرسەيىتوۆ تابىستادى. ونىڭ سوزىنشە، 25 قاڭتاردا مەرزىمى اياقتالعان كۋالىك 25 ساۋىرگە دەيىن ۇزارتىلدى"، - دەپ حابارلاعان بولاتىن  ازاتتىق راديوسى.

ۇسىنعان: ماقپال سەمباي