ءوزى سويلەپ تۇرعان سۋرەت!
...قوعامدى ەسەڭگىرەتىپ كەتكەن بەس بالا، بەس پەرىشتەنىڭ قازاسى قابىرعانى قايىستىردى. الەۋمەتتىك جەلى دە الەۋەتىن كورسەتتى. باسقا بەرمەسىن، بۇل جاعداي بيلىكتىڭ حالىقتىڭ قاراپايىم تۇرمىسىنان مۇلدە بەيحابار ەكەندىگىن كورسەتتى. اشىنعان حالىق، الاڭداعان انالار، اھ ۇرعان اقىن... قايتسەك، تۇرمىسىمىز تۇزەلەدى؟! قاشان بيلىك حالقىنا قارايلايدى؟ شىلقىعان شيكىزات پەن بەرەكەسى تاسىعان بايلىقتىڭ ۇستىندە وتىرىپ نەگە كەدەيمىز؟ كىم كىنالى؟
جۇرتتىڭ جانايقايىن كىم ەستيدى؟ اقىننىڭ الابۇرتقان اششى زاپىرانعا تولى جىرىن بيلىكتەگىلەر تىڭداي ما؟ ءجۋرناليستىڭ جانايقايىن كىم نازارعا الادى؟ بەس پەرىشتە ولگەن سوڭ اتقارۋشى بيلىكتەگىلەر ەندى قوزعالا باستاعانداي. انا مەن مەن بالانىڭ تۇرمىسىن تۇزەۋ ءۇشىن مىندەتتى تۇردە بىرەۋ ءولۋ كەرەك پە؟
ورتتەن. ىستان. يىستەن... استانادا ءولىم... قىزىلوردادا قارالى وقيعا... باياناۋىلدا دا باقيلىق بولعان ءبىر وتباسى. سەمەيدە تاعى ءورت شىقتى. ءبىر ادام تاعى قۇربان. قاشان توقتايدى؟ ادام ولىمىنەن كەيىن عانا بۇقاراعا بەت بۇرعان بيلىكتىڭ ارەكەتىنە كوڭىلىڭ توق پا، بەيباق؟!. قۇربان بولماۋ ءۇشىن قۇرباندىق شالامىز با، قايتەمىز؟
قازاقستاننىڭ قىرۋار بايلىعىمەن بار-جوعى 18 ميلليون حالىقتىڭ جاعدايىن باياعىدا-اق جاساپ قويۋعا بولار ەدى. امال نەشىك؟! بايدى بايىتقان، كەدەيدىڭ ءسىڭىرىن شىعارعان جۇيە، بۇل! قارا حالىقتىڭ دا كوشەسىندە توي بولار.
...كاريكاتۋرالىق كارتينالارىمەن تالاي حالىقارالىق بايگەلەردە ولجا سالعان ارىپتەسىم عالىم سماعۇلدىڭ قوعامنىڭ شىنايى كورىنىسىن بەينەلەگەن سۋرەتىن كورگەندەگى وي ەدى، بۇل!
