دۇنيەدە انانىڭ اق سۇتىنەن قىمبات، انانىڭ الاقانىنان اياۋلى ەش نارسە جوق. "اناڭدى مەككەگە ءۇش رەت ارقالاپ بارساڭ دا، اق ءسۇتىن اقتاي المايسىڭ" دەيدى دانا حالقىمىز. راسىندا، ءپاني جالعانداعى جۇماق انانىڭ الاقانىندا بولسا، باقي جايداعى "ءجاننات - انانىڭ تابانىنىڭ استىندا" دەيتىن ءتامسىل ءسوز بار. 
بۇرىندارى اناعا ارنالعان ءۇشبۋ حاتتار "التىننان ارداقتى، كۇمىستەن سالماقتى، اياۋلى انا" دەپ باستالاتىنى ەسىمدە. ءوز باسىم اجە باۋىرىندا ءوستىم دە، انا ءقادىرىن جەتە تۇسىنبەپپىن. سوعان قاتتى وكىنەمىن... انامىز 9 قۇرساق كوتەرىپ، اللا سىيلاعان 3 قىز، 5 ۇلدى تاربيەلەپ ءوسىرىپ، 52 جاسىندا ومىردەن وزدى. بالالارىنىڭ قىزىعىن كورۋ ءناسىپ بولماعان ەكەن.
وتكەن ءبىر اپتاداعى قايعىلى وقيعالار كەزىندە قاتتى تولعانىپ، اقىرىندا وسى ويلارىمدى فب جەلىسىنە جاريالاۋدى ءجون كوردىم. كەيبىر شولاق ويلى شەنەۋنىكتەر "بالانى اسىراي الماساڭ، نەگە تۋاسىڭ" دەگەندى ايتىپ قالىپ جاتىر. بۇل - انالاردىڭ نامىسىنا تيەرلىكتەي اسا ۇشقارى پىكىر! ويتكەنى، جالپى ادام بالاسىنىڭ باستى ميسسياسى ومىرگە ۇرپاق اكەلۋ ەمەس پە؟ جەر بەتىندەگى بارشا تىرشىلىك تە، ادامزاتتىڭ بولاشاعى دا - سول جارىق دۇنيە ەسىگىن اشقان سابيلەردىڭ سانىمەن جانە ساپاسىمەن تىكەلەي بايلانىستى بولاتىندىعى بەلگىلى. ازيا حالىقتارى، ونىڭ ىشىندە ينديا، جۇڭگو، يندونەزيا، مالايزيا، پاكيستان، وزبەكستان، ت.ب. ەلدەردەگى بالا تۋۋ كورسەتكىشى، حالىق سانىنىڭ ءوسۋ قارقىنى ۇدەي تۇسۋدە. مىسالى، بىلتىر قىتايدا 17 ملن-نان اسا ءسابي ومىرگە كەلىپتى. بىلاي قاراعاندا، بۇكىل قازاقستان حالقىنىڭ سانىنا جەتە قابىل كورسەتكىش. كورشى رەسەيدە انالاردى بالا تۋۋعا ىنتالاندىراتىن قارجىلاي كومەكتىڭ بىزدەگىدەن بىرنەشە ەسەگە كوبەيگەنىن كورىپ وتىرمىز.
ال ءبىزدىڭ ەلدە انا مەن بالا پروبلەماسى كوپتەن قوردالانىپ، شەشىمىن تاپپاعان كۇرمەۋلى ماسەلەلەر بارشىلىق ەكەندىگىن سوڭعى اپتاداعى وقيعالار ايعاقتاپ وتىر. 
اسىرەسە، ەلدەگى 300 مىڭنان اسا كوپ بالالى انالاردىڭ الەۋمەتتىك جاعدايى كوپشىلىكتى الاڭداتىپ وتىرعانى جايدان جاي ەمەس. بازبىرەۋلەر «بالانىڭ سانىنان گورى ساپاسىنا نازار اۋدارايىق» دەگەندى العا تارتادى. بۇعان كەلىسۋ قيىن. سەبەبى، قازاق اتامىزدىڭ: "ءبىر بالا - جوق بالا، ەكى بالا - جارتى بالا، ءۇش بالا - ناعىز بالا" دەگەن دانا ءسوزىن ەسكەرسەك، حالقىمىزدىڭ سانىن كوبەيتۋگە سەپتىگىن تيگىزەتىن 3ء-شى، 4ء-شى بالادان باستالادى. كەڭەس ۇكىمەتىنىڭ سوڭعى جىلدارىندا قازاق ايەلدەرىنىڭ تۋۋىنا قولدان كەدەرگى جاساعانداي بولدى. سول تەرىس ساياساتتىڭ ىقپالى ينەرسيالى تۇردە بولسا دا ءالى جالعاسىپ كەلەدى. كوپتەگەن جاعدايدا دارىگەرلەر قازاق ايەلدەرىنە ءتۇرلى سىلتاۋ ايتىپ، "كەسەروۆو" جاساۋدى ۇسىنادى. "قانىڭ از، وزدىگىڭمەن بوسانا المايسىڭ، قان قىسىمىڭ تۇراقسىز، ءاناليزىڭ ۇناماي تۇر، ومىرىڭە ءقاۋىپتى" دەگەندى ايتىپ، ولاردى وپەراسيامەن تۋۋعا يتەرمەلەيدى. بىر-ەكى رەت كەسىپ العان انا ءۇشىنشى، ءتورتىنشى بالاعا تاۋەكەل ەتە المايتىنىن ومىردە كورىپ ءجۇرمىز. ال ەلدىڭ ايتۋىنشا، «وپەراسيا دەگەنىمىز بوپسالاپ، اقشا الۋدىڭ ءبىر جولى» دەيدى. نەگىزى، ۇرپاقتىڭ بولاشاعى تەك ادەمى ومىرىمەن ولشەنبەسە كەرەك. نەشە ءبىر دارىندى، تالانتتى، ويلى دا سويلى ازاماتتار سول باياعى اۋىلداعى جۇپىنى، كوپبالالى وتباسىلاردان شىققاندىعىن دا بىلەمىز. بۇگىنگى الەم تانىعان ەلباسى ءبىر كەزدەگى قاراپايىم عانا قويشىنىڭ شاڭىراعىندا وسكەنى وتىرىك پە؟!
ەندەشە، ءدال ءقازىر ءبىر قولىن ەكى ەتە الماي، بىرىنە جەتسە، بىرىنە جەتكىزە الماي، شاراسىزدىقتان شىرىلداپ، ەل ازاماتتارىنىڭ ەسىگىن قاتتىراق قاعىپ جۇرگەن انالارىمىزدىڭ جاعدايىنا جاناشىرلىق تانىتقان ءجون بولار. بالكىم، وسى كۇنى بالا ءۇشىن بايبالام سالىپ جۇرگەن سول كوپ بالالى انالاردىڭ ءبىرىنىڭ جەتەگىندە، نە بەسىگىندە، نە قۇرساعىندا قازاق ەلىنىڭ 4ء-شى مە، الدە 5ء-شى مە پرەزيدەنتى جۇرمەسىنە كىم كەپىل؟ ولاردىڭ اراسىنان كەلەشەكتە تاماشا اقىندار، دارىندى ساۋلەتشىلەر، مۋزىكانتتار مەن مىقتى عالىمدار شىعارىنا كۇمانىڭىز بولماسىن!
قۇدايعا شۇكىر، قىزىلوردا وبلىسىنىڭ بيلىك باسىنداعى ازاماتتار كوپ بالالى انالاردىڭ جانايعايىنا تۇسىنىستىكپەن قاراپ، مۇمكىندىگىنشە انالارىمىزدىڭ ارىز-تىلەكتەرىن قابىلداۋعا جاعداي تۋعىزىپ جاتقانىنا كۋامىز. سەنبىدەن بەرى وبلىستىق تۇرعىنداردى جۇمىسپەن قامتۋ مەكەمەسى، اسقار توقماعامبەتوۆ اتىنداعى تەاتر زالىندا، بارلىق اۋدانداردىڭ جاۋاپتى ورىندارىنىڭ لاۋازىمدى قىزمەتكەرلەرى قوعامدىق اشىق قابىلداۋ وتكىزىپ، كوپ بالالى انالاردىڭ تالاپ-تىلەكتەرىمەن تانىسۋدا. انالاردىڭ وتىنىشتەرى مەن ۇسىنىستارىن تىركەۋ الداعى كۇندەردە دە جالعاساتىنىن تۋرالى اقپارات الەۋمەتتىك جەلىلەردە جاريالاندى. 
سويتسە دە، جەسىرىن جىلاتپاي، قىزدى قادىرلەپ، انالارىن ارداقتاعان الاش ەلىندە كوپبالالى انا اتانۋ - ماقتانىشقا اينالار كۇنگە دە جەتەرمىز دەگەن ۇمىتپەن جازبامدى اياقتايمىن.
انانى قۇرمەتتەۋ - ءوز اناڭدى قادىرلەۋ ەكەنىن ۇمىتپايىقشى، ازاماتتار!

سەرىكباي قىلىشبايدىڭ فەسسبۋكتەگى پاراقشاسىنان