13 اقپان كۇنى ەلباسى استانادا «قازاقستاننىڭ ءجۇز جاڭا ەسىمى» جوباسىنىڭ قاتىسۋشىلارىمەن كەزدەستى. جوبا اياسىندا بىرنەشە جاستار توپتان وزا شاۋىپ بايگە الدى. سولاردىڭ قاتارىندا اقىن، قازاقستان جازۋشىلار جانە جۋرناليستەر وداعىنىڭ مۇشەسى ماقپال مىسا دا بولدى. اقىننىڭ تەبىرەنە وقىعان ولەڭى ەلباسىن دا تولقىتپاي قويمادى. ءوتىپ جاتقان ءومىر جايلى ولەڭىن جان-تانىمەن وقىعان اقىن بۇكىل زالدى اۋزىنا قاراتتى.
ماقپال مىسانىڭ ەلباسىنىڭ الدىندا تەبىرەنە وقىعان ولەڭىن نازارلارىڭىزعا ۇسىنامىز.
قايدا مەنى باستايسىڭ، عارىشقا ما؟
دوسقا دا ايتپاس سىر ەدى، تانىسقا دا
ساعىنىشىم، سارعايعان ساعىمدارداي،
سەن مەنەن الىستاما!
وتتاي شارپىپ وتەتىن جالىن ىشتەن،
ساعىم با ەدىڭ، سارعايعان ساعىنىش پا ەدىڭ؟
جانارىڭدا جاقۇتتاي جاسىن ويناپ،
باقىتتىڭ بالىن ىشكەم!
تۇنجىراپ تۇر تانىس قىر، تانىس قالا،
ارنا كەرەك القىنعان اعىسقا دا،
ءومىر جايلى ولەڭدى مەن باستايىن،
سەن مەنەن الىستاما!
تۇرەن تارتقان تىرىشىلك تۇر وڭىڭدە،
ءبىر ءسوز ايتىپ قالساڭشى جۇرەرىڭدە ،
ءومىر زۋلاپ بارادى كوز الدىمدا،
ولەڭ تۋلاپ بارادى جۇرەگىمدە.
اراي سىيلا سەن ماعان، اي-كۇن ۇسىن!
ۇعار دەيسىڭ جانىمدى قاي تۋىسىم.
بۇل ومىرگە كەلگەنبىز بىزدەر، بالكي،
باقىت ءانىن قوسىلىپ ايتۋ ءۇشىن.
اراي سىيلا سەن ماعان، اي-كۇن ۇسىن!
ۇعار دەيسىڭ جانىمدى قاي تۋىسىم.
بۇل ومىرگە كەلگەنبىز بىزدەر، بالكي،
باقىت ءانىن قوسىلىپ ايتۋ ءۇشىن.
پىكىر قالدىرۋ