الماتىدا «قازاقستان» قوناقۇيىندە «HEALTH EXPO-2019 مەديسينالىق باعىتتاعى حالىقارالىق كورمە ءوتتى. بۇل شارانى تۇركيانىڭ  «ExpoTurka Fuarcılık Ticaret Limited» ۇيىمداستىردى. باستى ماقسات – ەكى ەل اراسىنداعى ىسكەرلىك قارىم-قاتىناستاردى دامىتۋ، مەديسينا قىزمەتكەرلەرىنىڭ تۇركياداعى جەتەكشى ەمحانالار مەن اۋرۋحانالاردا تاجىريبە جيناقتاپ، العان بىلىم-بىلىگىن قازاقستاندا قولدانۋ.

كورمەنىڭ اشىلۋ سالتاناتىندا تۇركيانىڭ قازاقستانداعى باس كونسۋلى رىزا قاعان يىلماز مىرزا: «HEALTH EXPO سياقتى كەز كەلگەن كورمە، شارالاردا ادامدار ءبىر بىرىمەن تانىسادى، پىكىر الماسادى، كاسىبي الاڭدا دوستىق قاتىناس ورناتادى. ءبىزدىڭ قولىمىزداعى مۇمكىندىكتەردەن باسقا ەلدەردەگى باۋىرلارىمىز حاباردار بولادى. بۇگىنگى كورمەگە تۇركيانىڭ تۇكپىر-تۇكپىرىنەن ارنايى كەلگەن ءبىزدىڭ وتە سىيلى ءارى بىلىكتى ماماندارىمىز قازاقستانداعى ارىپتەستەرىمەن تاجىريبە الماسادى، بىلگەن اقپاراتتارىمەن بولىسەدى، دەرتىنە داۋا ىزدەگەندەرگە بىرگە ەمدەۋدىڭ جولىن تابادى ءارى تۇركيانىڭ مەديسينا سالاسىنداعى مۇمكىندىكتەرمەن بولىسەدى دەگەن سەنىمدەمىن. بارىڭىزگە ساتتىلىك تىلەيمىن!»،  – دەدى.

«ExpoTurka Fuarcılık Ticaret Limited» باسشىسى حاليل چىبىكلى قازاقستانداعى دارىگەرلەرگە بەرىلەتىن مۇمكىندىكتەر تۋرالى ايتتى: «دەنساۋلىق ءتۋريزمى – دامىعان جانە دامۋشى ەلدەر ءۇشىن اسا ماڭىزدى سالا. ۇزدىكسىز سالىنىپ جاتقان ينۆەستيسيالار مەن باسەكەلەستىكتىڭ ارقاسىندا اتالعان سالا ۋاقىت سايىن كۇشەيىپ كەلەدى. تۇركيادا دەنساۋلىق ءتۋريزمى ورتالىق ازياداعى مەملەكەتتەرمەن سالىستىرعاندا، بارىنشا دامىعان.

كاسىبي بىلىكتى دارىگەرلەرمەن قاتار، تەحنيكالىق ماماندار جوعارى دەڭگەيدە، زاماناۋي تەحنولوگيا مەن مەديسينالىق قۇرىلعىلار بىزدەگى اۋرۋحانالار مەن ەمحانالاردا كەڭىنەن قامتىلعان. قازاقستان مەن تۇركيا اراسىنداعى مەديسينا سالاسىندا تۇزىلگەن ۇزاق جىلدان بەرگى دوستىق بايلانىسىمىزدى «HEALTH EXPO-2019» حالىقارالىق كورمەسى ارقىلى دامىتۋدى ماقسات ەتتىك. بۇيىرتسا، بۇل شارا الماتىدا جىل سايىن وتكىزىلەدى»،  – دەدى.

ءۇش كۇنگە سوزىلاتىن كورمەدە وتاندىق مەديسينا قىزمەتكەرلەرى جالپى حيرۋرگيا، پەدياتريا، ورتوپەديا جانە تراۆماتولوگيا، نەيروحيرۋرگيا، گاستروەنتەرولوگيا، كوسمەتيكالىق جانە جالپى ستوماتولوگيا، ورگانداردى ترانسپلانتاسيالاۋ، وفتالمولوگيا، جۇكتىلىك جانە بالا تۋۋ، پلاستيكالىق جانە ەستەتيكالىق حيرۋرگيا ت.ب. باعىتتا تۇركيانىڭ جەتەكشى ەمحانالارى مەن اۋرۋحانالارىنىڭ وكىلدەرىنەن كاسىبي تۇرعىدا تەگىن كەڭەس الىپ، ورتاق ىسكەرلىك قارىم-قاتىناس ورناتادى.

بيىل العاش رەت وتكىزىلگەن «HEALTH EXPO-2019» كورمەسىنە تۇركيانىڭ جەتەكشى مەديسينالىق مەكەمەلەرى: Bayındır Sağlık Grubu، Diyalog İşitme Cihazları، Koç Üniversitesi Hastanesi، Medipol Üniversitesi Sağlık ve Eğitim Grubu، NeoLife Onkoloji Merkezi، Okan Üniversitesi Hastanesi، Orhun Medikal ve Özel Pendik Bölge Hastanesi وكىلدەرى قاتىستى.

ۇيىمداستىرۋشىلاردىڭ ايتۋىنشا، ۇشكۇندىك شارا سوڭىندا قازاقستاندا ەڭبەك ەتەتىن 15 دارىگەر تۇركياداعى تانىمال اۋرۋحانالار مەن ەمحانالارعا ءبىر اپتاعا تاجىريبە الماسۋعا بارادى. ساپاردىڭ بارلىق شىعىنى «ExpoTurka Fuarcılık Ticaret Limited» تاراپىنان وتەلەدى. بۇل – وتاندىق دارىگەرلەر مەن جالپى مەديسينا سالاسىنا قوسىلاتىن ۇلكەن ۇلەس.

تۇركيادان تاجىريبە الماسىپ كەلگەن وتاندىق دارىگەرلەر كوڭىلگە تۇيگەندەرى مەن ۇيرەنگەندەرىن جۇمىس بارىسىندا قولدانادى.

ءنازيا جويامەرگەن قىزى، «تۇركىتىلدەس جۋرناليستەر قورى» قق، www.ttjk.kz