قۋاندىق تولەگەن ۇلى شاڭعىتبايەۆ (21.03.1925 - 19.02.2001) — قازاقستاننىڭ حالىق جازۋشىسى، اقىن.
ومار حاييام رۋبايلارى
جاس تا وتەر، بىرتە-بىرتە كارى دە وتەر،
بايانسىز بۇل جالعاننىڭ ءبارى بەكەر.
جاھاندا ماڭگى جاسار جان جوق، ءسىرا،
كەتەمىز، كەتتى، كەلەر، تاعى كەتەر.
***
تاعدىردىڭ سىرى تەرەڭ، جەتە المايمىز،
جۇمباعىن تۇگەل تاۋىپ كەتە المايمىز.
كەرۋلى كوز الدىڭدى سيقىر پەردە،
ولەمىز، ءبىراق ءارى وتە المايمىز.
***
ءماز بولىپ كۇنى-تۇنى مال، جانىڭا،
سەنبەدىڭ بۇل جالعاننىڭ جالعانىنا.
نە قىلدى باسقالاردى قاتال زامان؟
ويانىپ، ءبىر قاراشى جان-جاعىڭا.
***
بالاۋسا جەلكىلدەگەن بۇلاقتاعى،
شاشى عوي سۇلۋ قىزدىڭ ءبىر ۋاقتاعى.
ابايلا، باسا كورمە بالاۋسانى،
تالاي قىز جەردە جاتىر قۋراپ ءتانى.
***
جۇرەككە عاشىق دەرتى تولعان – باقىت،
جار جولىنا باس قۇربان بولعان – باقىت.
سابىر ەت عاشىعىڭ ءسال رەنجىتسە،
ىسىنە جاردىڭ كۇيىپ، توڭعان – باقىت.
***
ءتۇن بولعان، بىزگە دەيىن كۇندىز بولعان،
كۇن بولعان، اسپان بولعان، جۇلدىز بولعان.
اڭداپ باس اياعىڭدى، تابان استىڭ،
و باستا قارا كوزدى ءبىر قىز بولعان.
***
دالاپ پەن ءاتىرسۋدىڭ كەرەگى نە،
Cىمبات پەن كورىك پايدا بەرەدى مە؟
بولساڭ دا ءابىلحايات، ءزام-زام سۋى،
ءشىريدى دەنەڭ كورگە ەنەدى دە.
ۇسىنعان: ماقپال سەمباي
پىكىر قالدىرۋ