"ءقازىر ساۋاتتى جازۋ ۇلكەەەن پروبلەماعا اينالدى. ونى قويشى، سويلەمدى دۇرىس قۇرامايتىندار كوپ. مىنا بالا قارتايماي جاتىپ، قايعىردى دەمەڭىز. وسى ۋاقىتقا دەيىن وقىعان تەكستەرىمدە ءجيى كەزدەسەتىن مىنا كەمشىلىكتى ايتقىم كەلىپ تۇر. "بولۋ" ەتىستىگى رەتسىز قولدانىلادى.

ەشكىمگە ساۋساق شوشايتقىم كەلمەيدى. ءبىراق وتە جوعارى دەڭگەيلى ماتىننەن باستالىپ، قاراپايىم ءتىلشىنىڭ جاڭالىعىنا دەيىن "بولۋ" شەكتەن تىس ءارى رەتسىز پايدالانىلادى.

ءجيى كەزدەسەتىن قاتەنىڭ ءبىرى - "*** بولادى" تىركەسى. ماسەلەن، "بيىل 32 ميلليارد تەڭگە بولىنەتىن بولادى"، "جاڭا عيمارات بوي كوتەرەتىن بولادى"، "ارتتىراتىن بولادى"، "قامتيتىن بولادى" دەپ كەتە بەرەدى. وسى سويلەمدەرگە "بولادى"-نى قوساقتاماي، "بولىنەدى"، "بوي كوتەرەدى"، "ارتتىرادى"، "قامتيدى" دەسەك، ماعىنا وزگەرمەيدى. قايتا سويلەم قازاقىلانا تۇسەدى.

ەكىنشى قاتە - "بولۋ" ەتىستىگىن ءبىر سويلەمدە بىرنەشە رەت قولدانۋ. تاۆتولوگيانى سۋقانىم سۇيمەيتىنىن بىلەسىزدەر. ونىڭ ۇستىنە، ءماتىن قاراپايىم الەۋمەتتىك جەلىگە نەمەسە چاتتا جازىلعان جاۋاپ بولسا مەيلى ەكەن. بىلدەي سايت (گازەت، تۆ، مەكەمە دەپ قالاعانىن قويىپ وقىڭىز) "بولۋ"-دى ءبىر سويلەمدە بىرنەشە رەت قولدانۋى اقىلعا قونىمسىز. سولاردىڭ تىلىمەن ايتقاندا، "بولۋ بولماسا، ماتىندەرىڭىز دۇرىس ەمەس بولا ما؟"

ماسەلەن، "اپارعان قارىزدارىڭىز بولسا، نەعۇرلىم ساق بولۋ قاجەت"، "بۇنى بولدىرماۋعا دا بولادى"، "ايتىستا پروفەسسور بولسىن، ال ديماشتا جۇمىسى بولماسىن" دەپ جالعاسىپ كەتە بەرەدى. بۇل سويلەمنىڭ بارىندە "بولۋ" بەي-بەرەكەت قولدانىلىپ تۇر. ونىڭ ورنىنا "قارىزىڭىز بولسا، نەعۇرلىم ساق ءجۇرۋ قاجەت"، "بۇنى بولدىرماۋدىڭ جولى بار"، "ايتىستا پروفەسسور بولسا دا، ديماشتا شارۋاسى قانشا؟" دەپ جىبەرسەڭىز قاتىپ كەتەر ەدى. سولاردىڭ تىلىمەن ايتقاندا "مۇنداي قاتەلىكتى بولدىرماۋعا بولار ەدى".

ءۇشىنشى قاتە - "بولۋ"-دى ءار سويلەم سايىن قولدانۋ. مىسالى، "ەڭبەك كىتاپشاسىن قالاي الۋعا بولادى؟" دەپ ءبىرىنشى سويلەمدى جازدىڭىز دەلىك. ەكىنشى سويلەمدە "ول ءۇشىن جەكە كۋالىگىڭىز بولسا جەتكىلىكتى" دەپ جالعاستىردىق دەپ ەسەپتەيىك. بىلاي قاراساڭىز، سويلەمدەردە الىپ بارا جاتقان قاتە جوق. ءبىراق بايقاساڭىز، ەكەۋىندە دە "بولۋ"-دى قولدانعان ەكەنبىز. سىزدەرگە قايدام، ماعان مۇنداي تەكستەر جامبىل وبلىسىنداعى بۋرىلبايتال تراسساسى سەكىلدى اسەر ەتەدى. ياعني، شوقىراققا ءتۇسىپ كەتكەندەي سەزىم قالدىرادى.

ءتورتىنشى قاتە - "بولىپ تابىلادى". بۇل تۋرالى كوپ ايتىلعان. قايتالاپ جاتۋدىڭ قاجەتى جوق.

بەسىنشى قاتە - "بولۋ"-دى جالپى ماتىندە ءجيى قولدانۋ. ءۇشىنشى پۋنكتپەن بىردەي مۇندا دا.

ەندى قايتپەك كەرەك؟ ءماتىن تەرىپ تاستادىڭىز. ونىڭ ىشىنەن "بولادىنىڭ" ءبارىن قالاي دۇرىستاپ شىعامىز؟

نەگىزى مۇنىڭ وڭاي جولى بار. Word-تا Ctrl+F كنوپكالارىن باسامىز. سول جاقتان فايلدان ىزدەۋ تەرەزەسى اشىلادى. سول جەرگە "بول" دەپ جازامىز. ۆۋاليا! ماتىندەگى "بول..." دەپ باستالاتىن بۇكىل ءسوزدى تاۋىپ بەرەدى. سودان كەيىن ءارقايسىنا بارىپ، رەتتەپ، كەدىر-بۇدىرىن دۇرىستاپ جىبەرەمىز.

ايتپاقشى، ەشكىم تۋىلا سالا "ماستەر" بولىپ كەتپەيدى. ءبارىمىز دە "بولۋ"-دى ءجيى قولداندىق. كەيىن بۇل كەمشىلىگىمىزدى تۇزەدىك. ەڭ باستىسى دەر كەزىندە ەسكەرە ءبىلۋ كەرەك. ماعان مۇنى ەسكەرتكەن - جۋرناليستيكاداعى ۇستازىم عابيت اعا مۇسىرەپ ەدى."

ۇسىنعان: ماقپال سەمباي