پسيحولوگتار ءسۇت تىستەرى ارقىلى بالانىڭ پسيحيكالىق اۋرۋعا شالدىعۋ مۇمكىندىگىن انىقتادى. بۇل كوپتەگەن پسيحياترلىق اۋرۋدىڭ الدىن الۋعا كومەكتەسەدى دەپ جازادى Qamshy.kz اقپارات اگەنتتىگى.
ماسساچۋسەتس اۋرۋحاناسىنىڭ ساراپشىلارى بالانىڭ ءسۇت تىستەرى ارقىلى ونىڭ پسيحيكالىق اۋرۋعا قانشالىقتى قارسى تۇرا الاتىنىن انىقتاي الدى. بۇل زەرتتەۋ جۇمىسى امەريكاداعى عىلىمدى دامىتۋ اسسوسياسياسىنىڭ ۆاشينگتونداعى كەزدەسۋىندە تانىستىرىلدى.
پسيحياترياداعى پروبلەمالارىنىڭ ءبىرى - بيوماركەرلاردىڭ بولماۋى. بيوماركەر ارقىلى پسيحيكالىق اۋرۋدىڭ دامۋىنا بەيىم تۇلعالاردى انىقتاۋعا بولادى. بيوماركەر كەز-كەلگەن اۋرۋدىڭ دامۋ ءقاۋپىن بولجاۋ ءۇشىن پايدالانىلادى. مىسالى، ينسۋلت الۋ ءقاۋپىن قان قىسىمىن ولشەۋ ارقىلى الدىن-الا انىقتايدى.
بيوماركەرلەر ەمدەلۋشىنىڭ جاعدايىن نەعۇرلىم وبەكتيۆتى جانە ءدال باعالاۋعا مۇمكىندىك بەرەدى جانە بەلگىلى ءبىر پسيحيكالىق اۋرۋلاردىڭ قالاي داميتىنىن بولجايدى.
وسىعان بايلانىستى زەرتتەۋشىلەر التى جاسار بالالاردىڭ ءسۇت تىستەرىن زەرتتەپ كورگەن. ناتيجەسىندە، ءتىسىنىڭ ەمالى جۇقا بالالاردىڭ ءبىر نارسەگە كوڭىل ءبولۋى قيىنعا سوعادى جانە ولار اگرەسسيۆتى بولىپ شىققان.
وسىنداي قيىنشىلىقتارى بار بالالاردا وسكەن كەزىندە الاڭداۋشىلىق، دەپرەسسيا، شيزوفرەنيا جانە باسقا دا اۋرۋلارعا ۇشىراۋ ءقاۋپى جوعارى.
«عىلىمي قاۋىمداستىق رەتىندە ءبىز ونداعان جىلدار بويى ادامداردىڭ پسيحيكالىق اۋرۋلارعا دۋشار بولۋ ءقاۋپىن الدىن-الا انىقتاۋعا تىرىستىق. ەندەشە ءسىز ءتىسىڭىزدىڭ بۇل قۇپيانى بىلۋگە مۇمكىندىك بەرەتىنىن ەلەستەتىپ كورىڭىز»، - دەيدى پسيحياتر ەرين دانن.
عالىمدار التى جاستان اسقان 37 بالانىڭ ءتۇسىپ قالعان ءسۇت تىستەرىن زەتتەدى. ونىڭ ەمال قالىڭدىعىن، كولەمىن جانە باسقا كورسەتكىشتەردى قاراپ، ءتىستىڭ ەرەكشەلىكتەرى مەن بالالاردىڭ مىنەز-قۇلقى اراسىنداعى بايلانىستى انىقتاي الدى.
بالانىڭ انا قۇرساعىندا جاتقان كەزىنەن-اق تىستەرى قالىپتاسا باستايدى. تىستەر جۇكتىلىك كەزىندە جانە ءومىردىڭ العاشقى جىلدارىندا بالالارمەن بولعان جاعدايلار تۋرالى اقپاراتتى ساقتايدى. وسىلايشا بالانىڭ بولاشاقتا پسيحيكالىق اۋىتقۋعا شالدىعۋىنا قۇرساقتا جاتقان كەزدەگى اناسىنىڭ كوڭىل-كۇيى، كۇيزەلىسكە ءتۇسۋى نەمەسە دۇرىس تاماقتانباۋى اسەر ەتەدى.
ءتىس - بۇل جاڭا بيوماركەر. تىستە باستان كەشكەن ۋاقىت تۋرالى اقپارات ساقتالادى. بالالارداعى ءتىستىڭ وزگەرۋى پسيحيكالىق سيمپتومدارمەن تىعىز بايلانىستى.
انتروپولوگتار مەن ارحەولوگتار ادامداردىڭ جاسىن، ءومىرىن انىقتاۋ ءۇشىن تىستەرىن زەرتتەيدى، ءبىراق پسيحياتريادا ءتىس ارقىلى پسيحيكالىق اۋىتقۋلاردىڭ الدىن الۋعا بولاتىنىنا نازار اۋدارمايدى.
كوپتەگەن بالالاردىڭ مىنەز-قۇلقى ونىڭ كەلەشەگىنە اسەر ەتەدى. بولاشاققا ۇمتىلمايتىن، گيپەراكتيۆتى جانە اگرەسسيۆتى بالالاردىڭ كەلەشەگى جارقىن بولمايدى، جامان جولعا ءتۇسىپ كەتۋى دە مۇمكىن.
پسيحولوگتاردىڭ پىكىرىنشە، اتا-انالار بالالارىنىڭ مىنەز-قۇلقىنا مۇمكىندىگىنشە ەرتەرەك نازار اۋدارۋى قاجەت. وسىلايشا، بالاسىنىڭ كەلەشەكتە پسيحولوگيالىق تۇرعىدان ءالسىز بولۋىنىڭ الدىن الادى.
