مادەنيەت جانە سپورت ءمينيسترى ارىستانبەك مۇحامەدي ۇلى مەملەكەتتىك اقشاعا تەك ەلدىڭ رۋحىن كوتەرەتىن تۋىندىلاردى ءتۇسىرۋ كەرەكتىگىن ايتتى، دەپ حابارلايدى Qamshy.kz اقپارات اگەنتتىگى Sputnik قازاقستان سايتىنا سىلتەمە جاساپ.
"نە تۋرالى ەكەنى تۇسىنىكسىز، "جانى" جوق فيلمدەردى كورسەتۋدى قويۋ كەرەك. ۆيرتۋالدى ماحاببات، تاريحي ماحاببات دەپ نەشە ءتۇرلى كينو تۇسىرەدى، ءبىراق تاريح تۋرالى ەشتەڭە جوق. ونداي تۋىندىلاردىڭ بىزگە نە كەرەگى بار؟ مەملەكەتتىك اقشاعا تەك حالىقتىڭ نامىسىن وياتاتىن، ەلدىڭ رۋحىن كوتەرەتىن تۋىندىلاردى ءتۇسىرۋىمىز كەرەك"،- دەدى مۇحامەدي ۇلى مينيسترلىكتىڭ كەڭەيتىلگەن القاسىندا.
مينيستر جاس رەجيسسەر ەمير ءبايعازيننىڭ "وزەن" ءفيلمىن ماقتادى. اتالعان كينوكارتينانى مادەنيەت جانە سپورت مينيسترلىگى قارجىلاندىرعان.
"وسى ءفيلمى ءۇشىن ول ۆەنەسيان فەستيۆالىندە ەڭ بەدەلدى ۇزدىك رەجيسسەر سىيلىعىن الدى. وسى ارقىلى ول تۋىندىدا رۋحاني، ادامي قۇندىلىقتاردى دارىپتەۋ ارقىلى حالىقارالىق سىيلىق الۋعا بولاتىنىن دالەلدەدى. ايتپەسە، بۇعان دەيىن كوردىڭىزدەر عوي، قازاقتاردى بەيشارا ەتىپ كورسەتە بەرەدى"، - دەگەن مۇحامەدي ۇلى رەجيسسەرلەردى ماعىناسى تەرەڭ، ساپالى فيلمدەر تۇسىرۋگە شاقىردى.
ول كينو تەك كوركەم قۇبىلىس ەمەس، سونىمەن قاتار بيزنەس ەكەنىن اتاپ ءوتتى. سوندىقتان مەملەكەت ءىرى شەتەلدىك كينوكومپانيالاردى تارتۋ جۇمىسىن ماقساتتى تۇردە جۇرگىزىپ جاتىر.
ۇسىنعان: ماقپال سەمباي
