تىرلىگىڭ مىناۋ ەش ءمانسىز، بۇلاي جۇرگەنىڭ،
ارتىڭنان قالار ۇرپاعىڭ، ءسىرا، بولماسا.
بەس تيىن پۇلعا تاتىماس مىڭ كۇن سۇرگەنىڭ،
جۇرەگىڭ ءبىلىم، يمانعا ەگەر تولماسا...

جاماننان قاشقىن، جۇرەكتى كىرلەپ الماعىن،
جاقسىلىعىڭدى بىرەۋگە قىلعان جار سالما،
پايداسىز عۇمىر كەشكەن قاتاردا قالماعىن،
شۇكىرلىك ايتپاي تاڭىڭدى، كەشتى قارسى الما...

ءقادىر تۇت اتا-اناڭدى، باۋىر، تۋىستى،
قولىڭنان كەلگەن كومەكتى ەشبىر اياما.
ساداقا بەرىپ، ارتتىرعىن ساۋاپ يگى ءىستى،
سودان سوڭ، اللا بۇيىرسا، جۇماق سايالا...

سالاۋات دەگىن جوعىڭدى جوقتاپ، مۇڭايما،
شۇكىرلىك ايتىپ، بارىڭدى بىلگىن باعالاي،
ادامعا، ءسىرا، ادام بوپ قالۋ وڭاي ما،
ءارقاشان جۇرگىن يماننىڭ جانىن جاعالاي...

تالايى كەلدى، كەتتى دە كەلگەن پەندەلەر،
ەشكىم دە ماڭگى مەكەندەپ قالعان جوق جەردى.
يمانسىز ادام "ماڭگىنى" ىزدەپ، سەندەلەر،
ءومىردى اللا ادامعا سىناق دەپ بەردى. 

كىم ەدىڭ كەشە، ءبىر عانا ءتۇيىر قان ەدىڭ،
نۇرىمەن اللاح جاراتتى سەندەي ءبىر قۇلىن.
مۇسىلمان بولىپ ءاۋ باستان تۋعان پەندە ەدىڭ،
تاعدىرىڭ سەنىڭ جازىلدى وزىڭنەن بۇرىن.

بىلمەيمىن كۇتىپ ءبىز ءجۇرمىز نەنى، نە كىمدى...
قام قىلماي اڭساپ جانناتتان ءۇمىت ەتەمىز.
جالعان دەپ بەكەر ايتپاعان مىناۋ بەس كۇندى،
كەشەگى اتا-باباداي ءبىز دە كەتەمىز...

اشۋعا ەرىك بەرەمىز، سابىر شەت قالدى،
دۇنيە ويلاپ ۇيقىمىز قاشتى ءتۇن جارىم،
جەل سوزدەرگە دە ەردىك تە، قۇلاق، جاق تالدى،
بىلەمىز ءبىزدى شاقىرعان ءسوزسىز "ءۇن" بارىن...

بولماشى ىسكە جىلاۋعا دايىن تۇرامىز،
اللا اتىمەن باستالمايدى دا ءسوز باسى.
قالارداي ماڭگى قاس-قاعىم ءساتتى قۇرامىز،
قۇراندى وقىپ تامۋى كەرەك كوز جاسى.

ىسىمە مىناۋ قاراپ ەم ەشبىر ماندىماس،
سانامدى الدى جاۋلاپ ءبىر كوركەم كۇش بۇگىن.
سەزىمگە ەرىك بەردىم دە، كوزدەن تامدى جاس،
پايداسىز ءوتىپ جاتقانىن ءبىلدىم ءار كۇنىم.

كەتپەشى، يمان، ءبىر ءسات تە مەنەن جىراقتاپ،
قالدىرما ءناپسى ەركىنە ەرەر مەزەتكە.
تۇرامىن بۇدان بىلاي ءوزىمدى سۇراققا اپ...
قانداي ءىس كۇتىپ تۇر ەكەن مەنى كەزەكتە...

ءبىر ءوزىڭ جار بوپ، بىرلىككە داقتى تۇسىرمەي،
جەرىمدى ساقتا، جاراتقان، ساقتا حالقىمدى،
تاككاپارلىقتى، ەرىنشەكتىكتى وسىرمەي،
ۇمىتتارماشى ۇرپاققا "ءداستۇر-سالتىڭدى".

سالماعى ءسوزدىڭ جۇرەككە تۇسسە سالماقتى،
جۇرەكتەن شىعىپ جۇرەككە، ءسىرا، جەتكەنى...
ساقتاي الساق ءبىز "قازاعىم" دەگەن تارماقتى،
ۇرەي مەن پالە-جالانىڭ بىزدەن كەتكەنى...

كەتپەسەم دە ءالى جۇرسەم دە جەردى مەكەندەپ،
ساعىنام كەيدە قازاعىم مەنەن جەرىمدى.
بەرەمىن ۋادە "قازاعىم" دەۋمەن وتەم دەپ،
سەبەبى، ماعان "قازاقتىڭ"(!) جانى بەرىلدى...

ىلگەرى-كەيىن... ءبىلىپ تە، بىلمەي ىستەگەن،
كەشىرشى، اللا، ۇلكەندى-كىشى كۇنامدى...
سۇرەمىن جالعان سەن بەرگەن ۇلى كۇشپەنەن،
تىرىسام ەندى قىلماۋعا تىرلىك كۇماندى.

كەتپەشى مەنەن الىستاپ، يمان، وي، سانام،
بۇگىندە مەنىڭ وزدەرىڭ عانا دوستارىم...
ارمانىم-جۇماق، بىلەمىن: سابىر... ول-پانام...
"اللا اتىمەن" ءىسىمدى ەندى باستارمىن...

حايىرىن كۇتەم، ءقايسىبىر ءىستىڭ بولماسىن،
سەبەبى، ءبارى اللانىڭ عانا قالاۋى.
دوستارىم، ەندى قاباقتى كىربىڭ شالماسىن،
سەبەبى، بىزدە قالدى-اۋ كۇندەر ساناۋلى...

***

جۇما

جالبارىنىپ جاراتقاننان تىلەك تىلەپ،
جۇماقتى اڭسامايتىن جوق ەش پەندە،
جاقسى امالدى قىلامىز «شاشىپ... كۇرەپ»...
جارىم جۇرەك بۇگىندە سەن دە، مەن دە... 

ۇمتىلساق قۇلشىلىققا،ىزگى ىستەرگە،
ۇمىتپاس جاراتقانىم جاراتقانىن.
ۇتتىرماساڭ ۋاقىتتى جات «كۇشتەرگە»،
ۇلى اللانىڭ كۇتەر ەڭ تاڭى اتقانىن. 

ماڭگى ءتىرى، كىرشىكسىز، كوركەم اللا!
ماڭگۇرتتىك كۇيگە ءبىزدى تۇسىرمەشى؟
ميپالاۋ سەكىلدەگەن بۇل جالعاندا،
"ميسسيامدى" ورىنداۋعا ۋاقىت بەرشى؟... 

اۋزىنان اللا ەسىمى تۇسپەسە ەگەر،
ادامنىڭ امالدارى قابىل بولار.
ارمانداسا دۇعامەن جىلدام بەرەر،
الاقانعا حايىرلى باقىت قونار...

ماقپال سەمباي