بولا ما، ەرتە ولەم دەپ قامدانۋعا؟
بولا ما، كەش ولەم دەپ الدانۋعا؟
بۇل ءولىم — بىرەۋگە ەرتە، بىرەۋگە كەش،
بولا ما، كەلگەنىنە تاڭدانۋعا؟..
بىرەۋگە — باقىت، ءبىردىڭ — كۇيىگىمىز،
وسىنداي ءبىزدىڭ ناقتى سىيىعىمىز.
تىرلىكتە: "اتاق!"، "داڭق!"، "بايلىق!.." دەدىك
ال قانە، سودان شىققان ءمۇيىزىمىز؟
جامان ءسوز ايتىلمايدى كەتكەن جانعا،
ومىردەن ارمانسىز بوپ وتكەن بار ما؟
نەمەنە ارمان دەگەن، سول ارمانعا
تىرلىكتە ارمانسىز بوپ جەتكەن بار ما؟
ولگەننەن ارتتاعىعا ساباق بار ما،
ولگەننەن تىرىلەرگە جاۋاپ بار ما؟
ومىردەن كەش كەتتىڭ بە، ەرتە ءوتتىڭ بە،
ءبارىبىر اناۋ ۇلى جاراتقانعا!..
بولسا دا توعىز قابات وققاعارى،
بولسا دا كوپ كيىمى، كوپ تاماعى،
وڭمەڭدەپ ولمەيتىندەي كۇن كەشكەندەر
ومىردەن قاس-قاعىمدا جوق بولادى.
كور بايلىق كوزىڭدى الداپ جالاڭدايدى،
بۇل پەندە ورەكپيدى، تاناۋرايدى.
التىنىڭ، اسىل بۇيىم، بار قازىناڭ
اجالدان سەنى ايىرىپ قالا المايدى.
بايلىعىڭ — عۇمىرىڭا تۇتقا بولماس،
جەگەنىڭ — جۇمىرىڭا جۇق تا بولماس.
استا — تاق، قولىڭداعى — شەكسىز بيلىك
اجالدان توتە كەلسە قۇتقارا الماس!
تىرلىكتە ارپالىستىڭ، شىرىلدادىڭ،
بىرەۋگە شىعىندالدىڭ… شىعىندادىڭ…
بولماستان ءبىر كۇنگىدەي بارلىعى دا
كەۋدەڭنەن ۇشىپ شىعار شىبىن جانىڭ!
پەندەنىڭ كورەر سورى، قونار باعى،
وتكىنشى ويىن-كۇلكى — ولار داعى.
دۇنيە بۇلىنبەيدى "سەن ءولدى!" دەپ،
ەشتەڭە بولماعانداي بولار ءبارى.
ءبارىمىز وسى ايتقاندى بىلگەنمەنەن،
تىرلىكتە ارپالىسىپ جۇرگەنمەنەن،
سوڭعى رەت وكىنگەنىڭ كىمگە كەرەك،
شىبىن جان شىققان كەزدە قۋ كەۋدەدەن؟!.
بۇل ءومىر — تىرلىگىڭدە كۇرەس بولار،
الىسىپ-جۇلىسۋ مەن تىرەس بولار.
ولگەندە ءبىر جاقىنى سورلى پەندە
جالعاننىڭ جالعاندىعىن ءبىر ەسكە الار.
ونىسى ەرتەسىندە-اق ۇمىتىلار…
ويتكەنى ەرتەڭىنەن ءۇمىتى بار.
از كۇنگى قىزىعىنا مالدانادى
ءبارى دە — قۇنتسىزى، قۇنىتى بار…
"مەن!"، "مەن!" دەپ شىققانمەنەن داۋسىڭ قانشا،
جۇرەسىڭ اينالشىقتاپ اۋسىل مالشا.
ءوزىڭ دە، وزگەنى دە الداۋمەنەن
كۇن كەشتىڭ تاتار ءدامىڭ تاۋسىلعانشا.
تىرشىلىك: جىلاتادى… كۇلدىرەدى…
جاسايدى، قايتا ءبارىن بۇلدىرەدى.
دۇنيە الما-كەزەك بولىپ كەلەر
وسىنىڭ ماعىناسىن كىم بىلەدى؟..
ايەلىڭ، تۋعان-تۋىس، بالا-شاعا
بولا الماس بۇل اجالعا اراشا دا.
ءولىمنىڭ بار ەكەنىن ءبىلىپ تۇرىپ،
قۇمارمىز نەگە از كۇنگى تاماشاعا؟!!
جۇماش كوكبورى
