اۋداندىق گازەتتىڭ ءتىلشىسى رەتىندە شالعايداعى مالشى قىستاقتارىن ارالاعانىم ەسىمە ءتۇستى. قاقاعان قىس ءىشى. اياز جالاپ تۇر. رەداكسيانىڭ «ۋازيك» كولىگىمەن شىققانبىز. شوپىر ەكەۋمىز عانا... 

وتىزدار شاماسىنداعى شوپان ايەلى ەكەۋى ءبىر وتار قويعا يە بولىپ وتىر ەكەن. تاۋ اراسى. كومەكشى دە جوق. اسىرەسە، ايەلى بايعۇسقا وبال ما دەپ ويلادىم. تىرسەگى-تىرسەگىنە سوعىلعان قىلدىرىقتاي عانا كەلىنشەك. ەسكى كەرزى ەتىكتى سىرپ-سىرپ ەتكىزىپ، سالپىلداتا باسادى. مۇز بولىپ قاتىپ قالعان مايادان ءشوپ سۋىرىپ، ونى اجەپتاۋىر جەرگە جاياۋدان-جاياۋ تاسىپ، جايمالاپ شاشتى. التى ءجۇز باستاي ساۋلىقتى جەمدەۋ وڭاي بولماس...

ەكەۋىنىڭ ءۇش-تورت جاسار ۇلدارى بار. اناسىنىڭ ەتەگىنە وراتىلىپ ول ءجۇر... 
ءبىر مەزگىلدە اۆتولاۆكا كەلدى. ايەل اناۋ-مىناۋ كەرەك-جاراقتان بولەك، ۇلىنا باتەڭكە اپەرگەن. قىپ-قىزىل... وي، وسىعان بالانىڭ ەسى شىعىپ قۋانعانى-اي! ءتۇس اۋا بارعانبىز. اڭگىمەلەسىپ، ايتىپ-بۇيتكەنشە قاس قارايدى. قوندىق. تاڭەرتەڭ تۇرعاندا كوردىم، الگى بالا ەكى باتەڭكەسىن كەۋدەسىنە تاستاي قىلىپ قىسىپ، قۇشاقتاپ ۇيىقتاپتى. جانىم اشىدى ما، الدە پەرىشتە ءسابيدىڭ قىلىعىنا ءسۇيسىندىم بە، ايتەۋىر، باس شايقاپ، ءبىر مەزەت تولقۋ سەزىمىن وتكەرگەنىم انىق. 

ادامنىڭ باقىتى ءۇشىن كوپ نارسە كەرەك ەمەس ەكەن عوي... 

اندا-ساندا سول كورىنىس ويعا ورالىپ قويادى. 

1988 جىل ەدى. قاراعاندى وبلىسى تەڭىز اۋدانى «ارشاتى» سوۆحوزىنا قاراستى قىستاق. ول بالا ءقازىر ءوزى دە وتىز بەستەرگە كەلدى-اۋ... قايدا ءجۇر ەكەن...