بۇگىن "جازىلدىم!... امان بولىڭىزدار، اق xالاتتى ابزال جاندار! مىڭ العىس!!!" دەپ جازدى جۋرناليست بەيسەن قۇرانبەك ءوز ينستاگرام پاراقشاسىندا. 

"سىرقاتتانىپ اۋرۋxاناعا تۇسكەن ادام ءبىر ءمۇساپىر. ءتان سىزداۋىنا كوڭىلدىڭ الاڭى قوسىلىپ، كەۋدەڭدەگى ءۇمىت پەن كۇدىكتىڭ، سەنىم مەن قورقىنىشتىڭ ايقاسىنىڭ ورتاسىندا كوزىڭ باقىرايىپ، شاراسىز كۇيدە جاتاسىڭ. 
وسىنداي كەزدە قولداۋشىڭ - ءبىر اللا، تىلەۋشىڭ - ەت جاقىندارىڭ مەن ەل-جۇرتىڭ، ەمدەۋشىڭ - دارىگەرلەر ءۇش جاقتاپ قولتىعىڭنان دەمەيدى ەكەن.

ادەتتە، جۋرناليستەر قاۋىمى تۋرالى ايتقاندا شەر اعانىڭ "ارقالاعانى - التىن بولعانىمەن، جەگەنى - جانتاق" دەگەن ءسوزىن ءجيى كەلتىرەمىز. ال دارىگەرلەردىڭ اراشالاعانى - ءومىر بولعانىمەن، جەگەنى - كومىر ەكەن عوي. 

اۋرۋxانالاردىڭ قاسىنان وتكەندە نە سىرتىنان كورگەندە ونىڭ ىشىندە ادام دەنساۋلىعى مەن ءومىرى ءۇشىن مىلتىقسىز مايدان ءجۇرىپ جاتقانىن ويلاي بەرمەيمىز. 

ءبىر اپتا اۋرۋxانادا جاتىپ، مەدپەرسونالدىڭ جۇمىستارىن كوزبەن كورىپ، ونىڭ قيىندىعىن كوڭىلمەن تۇيسىنگەن كەزدە ولاردىڭ جانكەشتىلىگىنە ەرىكسىز باس يەسىڭ. 

ماسەلەن، مەن تۇسكەن الماتى قالالىق كلينيكالىق 12 اۋرۋxانانىڭ xيرۋرگيا بولىمشەسى 45 توسەكتىك. وندا ادەتتە 75-80 ادام جاتادى ەكەن. ياعني، ەكى ەسە كوپ. قىزمەتكەرلەر شتاتى وعان ەسەپتەلمەگەن. ءبىراق، ءوز جۇمىسىن "جىلاپ" ىستەپ جۇرگەن ءبىر ادامدى كورمەيسىڭ. تاڭنىڭ اتىسى، كۇننىڭ باتىسى قۇراق ۇشىپ جۇرەدى. 

مۇندا ايىنا 300-دەي ادامعا وتا جاسالادى. حيرۋرگتەردىڭ ودان باسقا شارۋالارى تولىپ جاتىر. تاڭعى جەتى بولماي جۇمىسقا كەلەدى. ءار پالاتانى ارالاپ كورەدى. اۋرۋلاردىڭ xالدەرىن بىلەدى. جازىلىپ قالسا - قۋانادى. وزگەرىس بولماسا - مۇڭايادى. قايتا ەم تاعايىندايدى. كۇندەلىكتى، لەزدەمە، كونفەرەنسيا، كونسيلۋمعا قاتىسادى. وتا جاسايدى. قاعاز تولتىرادى. تاعى وتا، قايتا قاعاز تولتىرۋ. ودان قالسا، ەمدەلۋشىلەردىڭ جاقىندارىن قابىلدايدى. كەش باتقانشا وسىلاي. كۇن ارا تاۋلىك بويى تۇسەتىن كەزەكشىلىك جانە بار. 

مەدبيكەلەر مەن سانيتارلاردىڭ جۇمىسىنىڭ اۋىرلىعى - ول بولەك اڭگىمە. "جۇمىسىم قيىن" دەگەن قىز-كەلىنشەكتەر ولاردىڭ قاسىندا ءبىر كۇن جۇرسە وزدەرى ءبارىن تۇسىنەدى.

ال جان ساقتاۋ بولىمىندە ىستەيتىندەر تۋرالى مۇلدە اڭگىمە جوق! قان مايداننىڭ العى شەبى. ءومىر ءۇشىن ارپالىسقان ايقاس. مينۋت، سەكۋندتار ەسەپتەۋلى. زىر جۇگىرىپ جۇرەدى. اۋرۋلاردىڭ ءبارىن بىردەي قۇتقارۋ مۇمكىن ەمەس... جۇيكەلەرى قالاي شىدايدى؟ اقىلىما سىيمايدى!

وسىنداي ەڭبەكتەرى ءۇشىن ولارعا وردەن، مەدال بەرمەسەك تە، العىس ايتىپ جۇرەيىكشى.
امان بولىڭىزدار، اق xالاتتى ابزال جاندار! 
مىڭ العىس!!!"(ورفوگر.ساقتالدى) دەپ جازىپ، اتالمىش اۋرۋحانا قىزمەتكەرلەرىنىڭ سۋرەتتەرىن سالدى.

ەسكە سالا كەتسەك، وسىدان ءبىر اپتا بۇرىن جۋرناليست ينستاگرام پاراقشاسىنا اۋرۋحاناعا جاتقان سۋرەتىمەن بىرگە "دارىگەرلەردەن اينالدىم! سوڭعى ءبىر جارىم جىلدا ەكىنشى رەت امان الىپ قالدى. بۇل جولى اسقازان جاراسى اشىلىپ، گەموگلوبين 61-گە ءتۇسىپ كەتىپتى (ءبارىن جۇرەككە جاقىن قابىلداۋدىڭ ناتيجەسى...). جان ساقتاۋ بولىمىندەگى جانتالاستان امان شىقتىق، باستىسى. ەندى پالاتادا "پوستەلنىي رەجيمدە" راقاتتانىپ جاتقان جاي بار؟. ءسال دەمالىپ، ەم الىپ شىعايىن، سوسىن، قاربالاس تىرلىككە قايتا كىرىسەم. تەك ەندى دەنساۋلىقتى شىنداپ قولعا الۋ كەرەك. ايتپەسە، اق xالاتتى ابزال جانداردان ابدەن ۇيات بولدى" دەپ جازبا قالدىرعان ەدى. قالىڭ وقىرمانى جۋرناليستكە شيپا تىلەپ، اللادان جاردەم سۇراعان تىلەكتەرىن قارشا جاۋدىرعان بولاتىن. 

ۇسىنعان: ماقپال سەمباي