جان باسىنا شاققانداعى كىرىس 20 789 تەڭگەدەن 10-15 تەڭگەگە عانا اسىپ كەتسە، بۇل وتباسى تۇرمىسى تومەن وتباسىلار قاتارىنا كىرمەيدى

ادام باسىنا شاققانداعى كىرىس ەڭ تومەنگى كۇنكورىس دەڭگەيىنىڭ 70 پروسەنتىنەن، ياعني 20 789 تەڭگەدەن ءسال عانا اسىپ كەتسە، بۇل وتباسى تۇرمىسى ناشار وتباسى ساناتىنا كىرمەيدى. سەبەبى ءتارتىپ سونداي. بۇل تۋرالى ەڭبەك جانە حالىقتى الەۋمەتتىك قورعاۋ ءمينيسترى بەردىبەك ساپاربايەۆ مالىمدەدى، دەپ حابارلايدى Qamshy.kz اقپارات اگەنتتىگى sputniknews.kz سايتىنا سىلتەمە جاساپ.

ۇكىمەت ۇيىندە وتكەن باسپا ءسوز ءماسليحاتىندا جۋرناليستەر ەڭبەك جانە حالىقتى الەۋمەتتىك قورعاۋ ءمينيسترى بەردىبەك ساپاربايەۆتان اتاۋلى الەۋمەتتىك كومەك تۋرالى سۇرادى.

"وتباسىنىڭ جان باسىنا شاققانداعى كىرىسى 20 789 تەڭگەدەن 10-15 تەڭگەگە اسىپ كەتسە، بۇل ازاماتتار تۇرمىسى ناشار وتباسى ساناتىنا كىرمەي قالا ما؟"، - دەپ سۇراق قويدى ب ا ق وكىلى.

مينيستر ءبارى زاڭعا سايكەس جۇزەگە اساتىنىن ايتتى.

"كىرمەي قالادى، سەبەبى ءتارتىپ سولاي. سولاي دەپ بەلگىلەنگەن. 20 789 تەڭگە، ودان اسپاۋ كەرەك. ال ەگەر اسىپ كەتسە، تولەنبەيدى"، - دەپ قىسقا قايىردى ساپاربايەۆ.

ايتا كەتسەك، قازاقستان پرەزيدەنتىنىڭ تاپسىرماسىنا سايكەس، وسى جىلدىڭ 1 شىلدەسىنەن باستاپ اتاۋلى الەۋمەتتىك كومەك كريتەرييى ەڭ تومەنگى كۇنكورىس دەڭگەيىنىڭ 70 پروسەنتىنە دەيىن كوتەرىلەدى. ياعني، 14 مىڭ 849 تەڭگەدەن 20 مىڭ 789 تەڭگەگە دەيىن، ەڭ تومەنگى كۇنكورىس دەڭگەيى – 29 مىڭ 698 تەڭگە.

ناتيجەسىندە اتاۋلى الەۋمەتتىك كومەكپەن قامتىلاتىندار سانى قازىرگى 570 مىڭنان 830 مىڭ ازاماتقا دەيىن كوبەيمەك.

ۇسىنعان: ماقپال سەمباي