«الىپپە» پەن «انا ءتىلىن» قايتا ءبىلىم بەرۋ جۇيەسىنە ەنگىزۋ تۋرالى ماسەلە الەۋمەتتىك جەلىدە قىزۋ تالقىعا سالىنۋدا. ەسكە سالا كەتسەك، ءبىلىم جانە عىلىم ەكس-مينيسترى ەرلان ساعادييەۆ ءبىلىم جۇيەسىنە ءبىراز وزگەرىستەر ەنگىزدى. ول باستاۋىش سىنىپتان "الىپپە" مەن "انا ءتىلى" وقۋلىقتارىن الىپ تاستاپ، ونىڭ ورنىنا "ساۋات اشۋدى" ەنگىزگەن بولاتىن. بۇل جاعداي حالىق اراسىندا ءبىراز داۋ تۋدىرعانىمەن، 2015 جىلدان باستاپ "ساۋات اشۋ" ءبىلىم جۇيەسىنە ەنگىزىلىپ، ءالى كۇنگە قولدانىلىپ كەلە جاتىر. ەندى حالىق جاڭا ءبىلىم جانە عىلىم مينيسترىنەن "الىپپە" مەن "انا ءتىلىن" قايتا ەنگىزۋدى تالاپ ەتۋدە دەپ حابارلايدى Qamshy.kz اقپارات اگەنتتىگى.

ايتا كەتسەك، 5 ناۋرىزدا سەرىك ابىكەن ۇلى facebook پاراقشاسىندا ەكس-مينيستر ەرلان ساعادييەۆتىڭ ءبىلىم جۇيەسىنە ەنگىزگەن وزگەرىستەرىن قاتاڭ سىنعا الدى. 

"ساعادييەۆ "جاقسى جۇمىس ىستەدىك" دەپ وزىنە-وزى باعا بەرىپتى. كۇلدىم دە: ە، ءجون، - دەدىم. ءبىر سالانىڭ ويران-بوتقاسىن شىعارعان ەكستىڭ ەستە قالار ءبىر ءسوزى بولدى. ال جاڭا مينيستر كۇلاش اپايىمىزدان ساعادييەۆتىڭ وتىرعان جەرىنە ءۇيىپ كەتكەن پروبلەماسىن كۇرەكپەن تازالاپ تاستاۋدى سۇرايمىز" - دەپ جازعان سەرىك ابىكەن ۇلى.

ول باستاۋىش سىنىپ بالالارىنا اۋەلى ءماتىن وقىتىپ، ودان كەيىن ءارىپ ۇيرەتەتىن قويىرتپاق ادىستەمەنى الىپ تاستاپ، ورنىنا "الىپپە" مەن "انا ءتىلىن" قايتا ەنگىزىلۋىن تالاپ ەتكەن. سونداي-اق «ءالىپبي شيكى بولسا قازاق بالاسىنىڭ ميى ايران بولادى» دەپ  جان ايقايىن جەتكىزدى.

ءبىلىم سالاسىنىڭ بىلىعىپ كەتكەنىن العا تارتىپ، قازىرگى ق ر ءبىلىم جانە عىلىم ءمينيسترى كۇلاش شامشيدينوۆانىڭ قولىنان كەلەتىنىنە سەنىم ارتاتىندىعىن ايتادى.

بۇل جاعداي قاراپايىم حالىقتىڭ اراسىندا دا قولداۋ تاپقان. الەۋمەتتىك جەلى قولدانۋشىلارى دا بۇل ماسەلەگە قاتىستى وزدەرىنىڭ پىكىرىن ءبىلدىرىپ، جاڭا مينيسترگە ۇلكەن سەنىم ارتىپ وتىر.

"ىسكە ءسات، كۇلاش اپاي. "الىپپە" مەن "انا ءتىلىمىز" ءقايتىپ كەلگەي! سىزگە سەنەمىن"، - دەپ جازدى جەلى قولدانۋشىلارىنىڭ ءبىرى.

«بۇرىن وسى اپامىزدى ءبىلىم جانە عىلىم مينيسترلىگىنەن الماعاندا، قازاقستان ءقازىر ءبىلىم جونىنەن كوپ ىلگەرى كەتەتىن ەدى. (2002-2005 جانە 2007-2009 جىلدارى ق ر ءبىلىم جانە عىلىم مينيسترلىگىندە ۆيسە - ءمينيسترى بولىپ قىزمەت اتقارعان — رەد.) بىلايشا ايتقاندا، ءبارىن دايىنداپ، شايدى ادەمىلەپ جاساپ، ەندى ىشۋگە وتىرىپ جاتقان كەزدە توسىننان جاعداي بولىپ، ءبارى ورە تۇرەگەلىپ، دايىنداعان شاي جايىنا قالاتىنداي دۇنيە بولدى عوي. وسى كۇلاش اپامىز كەرەمەت بولاتىنداي وقۋ ءىسىن قولعا الىپ، ەندى ىسكە اسىرامىز دەپ جاتقاندا مينيسترلىكتەن الىپ تاستاعان. ءقازىر ءقايتىپ كەلگەنىنە قۋانىپ وتىرمىن. تەك ەندى تەز قيمىلداسا ەكەن. تاعى وزگەرتىپ تاستار دەپ قورقامىن. ىسكە ءسات، كۇلاش اپاي! "الىپپە" مەن "انا ءتىلىمىز" ءقايتىپ كەلگەي! سىزگە سەنەمىن. مەن ءمۇعالىم بولعان ەمەسپىن، ءبىراق، بالا بىلىمىنە جاناشىر اداممىن» - دەپ جاڭا مينيسترگە سەنىم بىلدىرەتىندىگىن جەتكىزەدى سۆەتلانا مۋافيحوۆا ەسىمدى الەۋمەتتىك جەلى قولدانۋشىسى. 

سونداي-اق، "قوس قولداپ قولدايمىز. مينيستر حانىم، ءسىز ءبىرىنشى كەزەكتە اناسىز عوي. بالالارىمىز وسپەي جاتىپ شوگىپ جاتىر. قايتارىڭىزشى الىپپەنى! قولدايمىز. الىپپە دۇرىس. ءقازىر سانى بار ساپاسى جوق كىتاپتار بالانىڭ ميىن اشىتىپ جاتىر. يا، قولدايمىن «الىپپەمىز» بەن "انا ءتىلىمىز" قايتا كەلسىن" دەگەن سىندى پىكىرلەر حالىق اراسىندا كوپتەپ ايتىلۋدا.

ۇسىنعان: فاريزا جومارت قىزى