يندۋستريا جانە ينفراقۇرىلىمدىق دامۋ مينيسترلىگىنىڭ جوسپارى بويىنشا، 2019 جىلى اكىمدىكتەر "نۇرلى جەردىڭ" 3 355 پاتەرىن "7-20-25" باعدارلاماسى بويىنشا ساتۋ ءۇشىن بولەدى ، - دەپ حابارلايدى Qamshy.kz اقپارات اگەنتتىگى kaz.tengrinews.kz سايتىنا سىلتەمە جاساپ.

مينيسترلىكتىڭ مالىمەتىنشە، "7-20-25" باعدارلاماسى ءۇشىن قولجەتىمدى پاتەرلەردىڭ ەڭ كوپ سانى شىمكەنتتە (1282 پاتەر)، اقتوبەدە (605 پاتەر) جانە سولتۇستىك قازاقستان وبلىسىندا (411 پاتەر) بەرىلەدى.

ەسكە سالايىق، وسىعان دەيىن"نۇرلى جەر" باعدارلاماسى بويىنشا تۇرعىن ۇيلەر اكىمدىكتەردە كەزەكتە تۇرعاندار مەن "تۇرعىن ءۇي قۇرىلىسى جيناق بانكىنىڭ" سالىمشىلارى اراسىندا بولىنگەن ەدى. الايدا تۇرعىن ۇيلەردى وتكىزۋ قاعيدالارىنا وزگەرىستەر ەنگىزۋگە بايلانىستى جىل باسىنان "نۇرلى جەر" باعدارلاماسى بويىنشا بەرىلەتىن تۇرعىن ۇيگە "7-20-25" باعدارلاماسىنا قاتىسۋشىلار دا قول جەتكىزەتىن بولدى. ەگەر نارىقتا تۇرعىن ءۇيدى ساتىپ الۋ كەزىندە "7-20-25" باعدارلاماسىنا قاتىسۋشىلار پاتەردى قۇرىلىس كومپانيالارىنىڭ ساتۋ بولىمدەرى ارقىلى تاڭداسا، مەملەكەتتىك تۇرعىن ءۇيدى الۋ جاعدايىندا پاتەرلەردىڭ بولۋىن جانە سيپاتتامالارىن جەرگىلىكتى اكىمدىكتەردەن ناقتىلاۋ قاجەت.