كىلەڭ تەكسىز، ۇلتىمدى باسىنا ما،
ارامدىعىن ىشىندە جاسىرا ما؟
كوك تۇرىكتىڭ اناسى – ۇماي انا،
ۇماي انا – تەكتى انا، اسىل انا.
قايران قازاق، و باستان دەپ ارماندار،
ارمانداڭدار، ەشكىمگە الدانباڭدار.
بىلگە قاعان، كۇلتەگىن - ەرەن تۋعان،
كوك تۇرىكتىڭ باعىنا اينالعاندار!
...ءبىر كوكبورى، سول ۇلدى ەمىزەدى،
بار تۇرىككە سول عانا نەگىز ەدى.
ءبىزدىڭ ارعى انامىز سانالاتىن،
ۇماي انا - و باستان «ءوزىم» ەدى.
سىنىعى ەدى اسىلدىڭ تازا عانا،
ودان تاراپ شىعىپتى قازاق، انا.
انالاردىڭ اناسى - ۇماي انا،
ۇماي انا - تەكتى انا، عاجاپ انا!
سايگەز جەبە - وقتاتقان ساعاعىنا،
وعان كۋا - بۇل ۇلى دالا مىنا.
ەر تۇرىكتىڭ ساربازى ول زاماندا،
وت ويناتقان جالىندى جانارىنا.
«ءتاڭىر» دەپتى، كورگەندەر جەڭىستى امان،
ۇلانبايتاق تۇرىكتەر جەر ۇستاعان.
جۇرت ايتادى، كەزىندە ۇماي انا،
ۇماي انا - تىزگىندى تەڭ ۇستاعان.
باتىر تۇرىك، سەس ەدى جاۋلارىنا،
سەنىممەنەن قاراعان الداعىعا.
بارشا تۇرىك تۇسىندا ۇماي انا،
جەتكەندەي ءبىر كەز ەدى ارمانىنا...
ۇلى بابا، سوزىنەن وت الاسىڭ،
كىم سىناعان جىگىتتىڭ سوقا باسىن،
ەر تۇرىكتەر، ول تۇستا بيلەگەندى،
تىنىق مۇحيت - دۋنايدىڭ ەكى اراسىن.
ەر تۇرىگىم، ماقتانىم، ايبارىم دا،
وعان تۇسكەن و باستان تاڭداۋىم دا.
ۇماي انا، ەر تۇرىك، اتويلايدى،
قازاعىمنىڭ بۇگىنگى ارمانىندا...
جۇماش كەنەباي
