جاقىندا ۇلانعايىر جەرىمىزدى، تۋعان ەلىمىزدى، ۇلى وتانىمىزدى جىرلاپ وتكەن، حالقىمىزدىڭ سۇيىكتى اقىنى مۇقاعالي ماقاتايەۆقا ارنالىپ، ۇلىستىڭ ۇلى كۇنىنەن باستالاتىن ەكى جىلدىق كۇنتىزبە جارىققا شىقتى.

كۇنتىزبەنى قۇراستىرۋداعى ماقسات – ەلباسىمىزدىڭ باستاماسىمەن قولعا الىنعان «رۋحاني جاڭعىرۋ» باعدارلاماسى اياسىندا، جاس بۋىن وكىلدەرىن وتانشىلدىق رۋحقا ۇندەيتىن، ەلىمىزدى، تۋعان جەرىمىزدى سۇيۋگە جەتەلەيتىن، تاربيەلىك-تانىمدىق ءمان-ماڭىزى بار اقىننىڭ شوقتىعى بيىك جىرلارىن، قازاقستاندىق قىل قالام شەبەرلەرىنىڭ جاڭا تۋىندىلارىن كۇنتىزبە ارقىلى جالپى جۇرتشىلىققا جەتكىزۋ.

اقيىق اقىننىڭ «قازاق جەرى»، «ءۇش باقىتىم»، «قازاقستان»، «التاي-اتىراۋ» جانە باسقا دا ولەڭدەرى، پوەمالارىمەن قاتار، بەلگىلى سۋرەتشىلەر ج.قايرامبايەۆ، د.قاسىموۆ، ب.بۇردەسبەكوۆتىڭ «اباي»، «قۇرمانعازى»، «جامبىل»، «مۇقاعالي»،  «تىلسىم سەزىم» جانە «تۇڭعۇيىق. بالۋان شولاق پەن عاليا»، ت.ب. جاڭا تۋىندىلارى دا بار.

سونىمەن قاتار، كەيىننەن تابىلعان، 1965 جىلعى 13 تامىزدا «قازاق ادەبيەتى» گازەتىندە باسىلعان، ابايعا ارنالعان «دالا دانىشپانى» ولەڭى دە بەرىلىپ وتىر.

كۇنتىزبەنى ونەر، ءتىل جاناشىرى، «وتىرار اۋدانىنىڭ قۇرمەتتى ازاماتى» بەرىك جەلدىكبايەۆ پەن «دورستروي» جشب باسشىسى مۇرات تلەۋلييەۆتىڭ بىرلەسكەن توبى شىعاردى. وعان ءا.قاستەيەۆ اتىنداعى مەملەكەتتىك ونەر مۇراجايى جانە ت. جۇرگەنوۆ اتىنداعى  قازاق ۇلتتىق ونەر اكادەمياسىنىڭ كىزمەتكەرلەرى دە اتسالىستى.

جاستارعا ۇلگى بولار، زامانداستارىمىزعا وي سالدىرار ىسكە باستاماشى بولعان ازاماتتارعا ريزاشىلىعىمىزدى بىلدىرەمىز.

نۇرلان قالقا