ءالي وقاپوۆ ديماشتىڭ جانكۇيەرلەرىنەن كەشىرىم سۇرادى دەپ جازادى Qamshy.kz اقپارات اگەنتتىگى. بۇل تۋرالى ول ءوزىنىڭ Instagram پاراقشاسىندا جازدى.
"بىرىنشىدەن، ديماش تۋرالى ايتقان پىكىرىم كوڭىلدەرىڭىزگە تيسە كەشىرىم سۇرايمىن. مەن ديماش نەمەسە ونىڭ جانكۇيەرلەرى تۋرالى جامان پىكىر ايتقىم كەلمەدى. مەنىڭ ايتقان پىكىرىمدى كوپشىلىك دۇرىس تۇسىنبەي جاتىر. مەن ديماشتى 10 جىلدان بەرى تانيمىن. ول ەرەكشە داۋىس يەسى جانە دارىندى جىگىت. بۇرىننان سونداي ەدى. ءقازىر مۇنى بۇكىل الەم بىلەدى جانە بۇل فاكت. ول جان-جاقتى ءارى كاسىبي ءانشى. ال مەنىڭ پىكىرىم ونىڭ كەلەسى جەڭىسى الەمدىك ءحيتتى ورىنداۋى بولسا دەگەن نيەتتەن تۋىنداعان بولاتىن. ءارى بۇل جاڭا ءان بولسا ەكەن دەيمىن. ديماشتى ۆوكاليست جانە ءارتىس رەتىندە بۇكىل الەم مويىندايدى. ەندى جانكۇيەرلەر ديماشتان كەلەسى قادام جاساۋىن كۇتۋدە. سوندىقتان ول ءوز داۋسىمەن دە، انىمەن دە الەمدى تاڭعالدىرسا ەكەن. ەگەر مەنىڭ پىكىرىم بىرەۋ-مىرەۋدى رەنجىتكەن بولسا، تاعى دا كەشىرىم سۇرايمىن. مەن ەشكىمدى سىناپ-مىنەگىم كەلگەن جوق. تەك جۋرناليستەردىڭ حالىققا اقپاراتتى دۇرىس جەتكىزبەۋىنەن جاپا شەكتىم. كوپتەگەن باق-وكىلدەرى "وقاپوۆ ديماشتى سىنعا الدى" دەپ اقپارات تاراتتى. بۇل - جالعان. مەنىڭ ايتقان سوزدەرىم تەك جاقسى نيەتتە ايتىلعان ەدى. ءبىز ديماشقا كوپتەگەن جەڭىس تىلەيمىز. وعان جاقسى بولسىن دەگەن نيەتتە ايتىلعان كەڭەستەر جانكۇيەرلەردىڭ رەنىشىن تۋدىرۋى مۇمكىن. بۇل قالىپتى جاعداي. ءبىراق ءبىز دە ديماشتىڭ شىعارماشىلىعىنا الاڭدايمىز. بىزگە ءبارىبىر ەمەس ەكەنىن تۇسىنسەڭىزدەر.
ال بۇگىنگى امەريكالىق شوۋدا جاساعان مالىمدەمەسى مەنى دە تاڭعالدىردى. بۇل ءبىز ءۇشىن كۇتپەگەن جايت. سەبەبى كوپشىلىك بۇل شوۋدا ديماش جەڭىسكە جەتەدى دەپ اسىعا كۇتتى. شىندىعىنا كەلگەندە ونەردە جاس ايىرماشىلىعى ماڭىزدى ەمەس. بۇل ونىڭ تاڭداۋى. ديماش بۇل قادامعا مۋزىكانت رەتىندە ەمەس ادامگەرشىلىگى مول ادام رەتىندە باردى. مەن كەلەسى "ەۆروۆيدەنيە" بايقاۋىنا قاتىسادى دەپ ۇمىتتەنەمىن.
مەن تاعى دا كەشىرىم سۇرايمىن. ارانداتۋ ءۇشىن قويىلعان سۇراققا جاۋاپ بەرەمىن دەپ كىنالى بولىپ قالدىم. مەنىڭ ايتقانىم قاتە ەكەنىن بىلەمىن، الايدا كەلەشەكتە سىزدەر مەنى تۇسىنەسىزدەر دەپ ۇمىتتەنەمىن. سونداي-اق مەنىڭ وتباسىمدى، انامدى جانە مەنىڭ شىعارماشىلىعىمدى بالاعاتتاۋدى توقتاتاسىزدار دەپ سەنەمىن. مەن قاتەلىك جاساعانىمدى مويىندايمىن. الايدا مەن دە پەندەمىن، مەنىڭ دە قاتەلىك جاسايتىن كەزدەرىم بولادى"، - دەپ اعىنان جارىلدى ءالي وقاپوۆ.
اۋدارعان: اسەل بولات قىزى
