بۇگىن قىتايداعى قازاقتار اراسىنان شىققان ۇلت قايراتكەرى، تاريحي تۇلعا، اقىن، اعارتۋشى تاڭجارىق جولدى ۇلىنىڭ تۋعان كۇنى(1903-1946)
تاڭجارىق – جازبا پوەزيانىڭ كوركەمدىك دەڭگەيىن كوتەرىپ قانا قويماي، قازاق ايتىس ونەرىنىڭ دە تاريحي بەتتەرىن اشقان ادۋىندى ايتىسكەر. ابايدان باستاپ ءوزىنىڭ زامانداسى بولعان الاش ارىستارىنىڭ شىعارماشىلىعىن جەتە تانىپ مەڭگەرىپ وزگەلەرگە ناسيحاتتاعان. قۇلجادا العاش قازاق تەاترىن اشىپ «شۇعانىڭ بەلگىسى» سپەكتاكلىندە باستى ءرولدى سومداعان. تۇڭعىش قازاق گازەتىنىڭ باس رەداكتورى بولعان. كوپتەگەن مەكتەپتەردىڭ اشىلۋىنا ىقپال ەتكەن. اقىننىڭ كوپ ولەڭى اباقتىدا جازىلعان. تۇرمە ادەبيەتىن قالىپتاستىرىپ، سول كەزدەگى قوعامدىق شىندىقتى ولەڭ، تولعاۋ، اندەرى ارقىلى اشىپ كورسەتكەن.
...ءبارى ءولدى ءۇرىمجىنىڭ قالاسىندا،
قىرىق ەكى، قىرىق ءۇشىنشى جىل اراسىندا.
قورلىقپەن سول سابازدار كەتتى ارماندا،
بالاڭنىڭ قالدى بۇل كەك بالاسىنا...
ولسەك تە، ولمەس ءبىزدىڭ اتاعىمىز،
بەلگىلى ىستەپ جۇرگەن «شاتاعىمىز».
الىستان التىن ساۋلە ءبىر كۇلىمدەر،
بولعانمەن ءقازىر تۇنەك جاتاعىمىز.
الاتىن قۇندى قۋىپ يەمىز بار،
ءبىز دە ەلمىز شوبەرەلى، اتالىمىز.
زۇلىمعا راس قارسى تۇرعانىمىز،
ول دا راس، قۇپيا ۇيىم قۇرعانىمىز.
كەكپەنەن قولىمىزعا قۇرال الىپ،
جەلكەدەن گومينداڭدى ۇرماعىمىز.
كەلسەڭدەر ءۇرىمجىنىڭ قالاسىنا،
كوزىڭ سال قالتارىس، ساي-سالاسىنا.
وسىنى ولە-ولگەنشە ۇمىتپا دەپ،
تاپسىرىپ كەت بالاڭنىڭ بالاسىنا...
كورگەنىن اتاسىنىڭ وقىپ كورسىن،
كەكتەنىپ، كوزىن سالىپ، كوڭىل ءبولسىن!
بابامنىڭ تاريحى دەپ تابىن تانىپ،
زالىمنان كەگىن الىپ، قولىندا ءولسىن!
كەلەدى ءتۇن ورنىنا جارىق ساۋلە،
سەنەمىن، ەمەس مۇنىم بەكەر اۋرە.
ءسوزىمنىڭ ءتۇبىن ويلا ەندى ەلىم،
قولىڭا وسى ءسوزىم تيسە زاۋدە...
جارقىن سالەن ۇلىنىڭ Facebook پاراقشاسىنان الىندى
ۇسىنعان: نازەركە لابيحان
