رەسەيدىڭ "گولوس. دەتي" بايقاۋىنا ىرىكتەۋ كەزىندە ءادىلقازىلاردى تۇگەل اۋزىنا قاراتقان قازاقستاندىق ەرجان ماكسيم ءوزى تۋرالى ايتىپ بەردى، دەپ جازادى Qamshy.kz اقپارات اگەنتتىگى sputniknews.kz سايتىنىڭ دەرەگىنە سۇيەنىپ.

جوباعا بەرگەن سۇحباتىندا اتاپ وتكەندەي، "گولوس. دەتي" شوۋىنا قاتىسۋدى كىشكەنتايىنان ارمانداپتى. ءبىراق اتا-اناسى "ءبىراز تاجىريبە جيناقتاپ السىن" دەپ بيىل عانا جوباعا قاتىسۋعا ءوتىنىش بەرگەن ەكەن.

"جەتەكشىلەر بۇرىلا باستاعاندا، تاڭعالعان جوقپىن، ءبىراق ءبارى بۇرىلعان كەزدە، ارمانىمنىڭ ورىندالعانىن سەزدىم"، - دەيدى ەرجان.

ەرجاننىڭ اناسى گۇلميرا الىبەكتىڭ ايتۋىنشا، بۇكىل وتباسى ونەرگە جاقىن جاندار – ەرجاننىڭ اتا-باباسى، اتا-اناسى، اعا-اپكەلەرى دە ءان ايتادى.

"ءۇش جاسىندا ەرجاننىڭ ەرەكشە دارىن يەسى ەكەنىن تۇسىندىك. كۇيەۋىمنىڭ قىرىق جاسىندا ەكى ءان ورىندادى. دوستارىمىز بەن تۋىستارىمىز تاڭعالىپ، "ۆوكالعا بەرىڭدەر" دەدى. ءبىز ورال قالاسىنداعى جاستار مادەنيەت ءۇيىنىڭ ۆوكال سىنىبىنا بەردىك"، - دەيدى گۇلميرا.

كەۋدەسىن ماقتانىش سەزىمى كەرنەگەن انا ۇلىنىڭ مۋزىكاعا دەگەن ماحابباتى قۇرساعىندا جاتقان كەزىنەن باستالعانىن ەسكە الدى.

"اياعىم اۋىر كەزدە ىلعي مۋزىكا تىڭداپ جۇرەتىنمىن. سول اسەر ەتكەن سياقتى. مۋزىكا تىڭداسام بولدى، بالام دا قۇلاق تۇرگەندەي قوزعالماي قالاتىن"، - دەيدى گۇلميرا.

ەرجان بوس ۋاقىتىندا روليك، كونكي تەۋىپ، بوكسپەن اينالىسقاندى جاقسى كورەدى. سونداي-اق اكەسىمەن بىرگە مونشاعا بارىپ، كەيدە اناسى ەكەۋى تورت پىسىرەدى ەكەن. وتباسىنىڭ ەڭ سۇيىكتى ءتاتتىسى - "ۆۋپي پاي" تورتى.

مۋزىكالىق اسپاپتار ىشىندە ەرجان فورتەپيانودا وينايدى، "گولوس. دەتي" جوباسىنان كەيىن دومبىرانى قولعا الماق. "اتا-بابالارىم دومبىرادا ويناعاندىقتان، مەن دە ۇيرەنۋىم كەرەك"، – دەيدى جاس ءانشى. ءجاسوسپىرىم ماسكەۋدە بالالايكا تارتىپ ۇيرەنگەنىن دە ايتتى.

ەرجانعا، اسىرەسە اندرەا بوچەلليدىڭ اندەرى قاتتى ۇنايدى.

"ەسەيگەن كەزدە ديماش قۇدايبەرگەنگە ۇقساعىم كەلەدى. ديماش قازاقستاندى بۇكىل الەمگە تانىتىپ ءجۇر. جولىن قۋسام دەيمىن"، - دەدى ول.

ءبىراق ەرجاننىڭ ايتۋىنشا، بۇكىل الەمدى باعىندىرعان جۇلدىز بولۋ ءۇشىن ءبىر عانا داۋىس جەتكىلىكسىز.

"ساحناعا شىققاندا ايتقان ءانىڭدى حالىقتىڭ جۇرەگىنە جەتكىزۋگە ءتيىسسىڭ"، - دەيدى ەرجان.

"ارمانىم – بۇكىل الەمگە تانىمال ءانشى بولىپ، ريمدە كوليزەي ساحناسىندا ءان شىرقاۋ"، - دەپ ويىن اياقتادى جاس ءانشى.

ۇسىنعان: نازەركە لابيحان