ديماش قۇدايبەرگەننىڭ ماسكەۋدەگى كرەمل ساحناسىنداعى العاشقى جەكە كونسەرتىنە 56 ەلدەن فاناتتار كەلدى. 

ديماشتىڭ رەسەيدىڭ تورىندەگى العاشقى كونسەرتىنە ءانشىنىڭ فاناتتارى ءۇش ساعات بۇرىن جينالا باستادى. ولار قولدارىنا "ديماش" دەپ جازىلعان پلاكاتتارىن، قۇشاق-قۇشاق گۇلدەرىن ۇستاپ كەلگەن. كوڭىل-كۇي كوتەرىڭكى، ولار كونسەرتتىڭ جوعارى دەڭگەيدە وتەتىنىنە سەنىمدى.

"وتكەن جىلى جەلتوقساندا ماسكەۋدە ديماشتىڭ كونسەرتى وتەتىنىن ەستىگەن ۋاقىتتان باستاپ دايىندالا باستادىق. بۇل ءبىز ءۇشىن وتە ەرەكشە وقيعا. 17 جەلتوقساندا بيلەتتەر ساتىلىمعا شىققان كەزدە 20 مينۋتتىڭ ىشىندە فاناتتار زالدىڭ ورتاسىنداعى جاقسى ورىنداردى الىپ قويدى. كەيىن ديماشتىڭ ەكىنشى كونسەرتى وتەتىنى بەلگىلى بولدى. ءبىز ديماشقا قولداۋ كورسەتۋ ءۇشىن ەكى كونسەرتىنە دە بارامىز. ۇنەمى جانىندا بولۋعا تىرىسامىز، اۋەجايدان ءوزىن دە، وتباسىن دا قارسى الىپ، قانشالىقتى جاقسى كورەتىنىمىزدى كورسەتىپ ءجۇرمىز"، - دەدى نورا ەسىمدى ەۋرازيا فان-كلۋبىنىڭ ماسكەۋدەگى بولىمشەسىنىڭ مۇشەسى.

ماسكەۋلىك انتونينا سميرنوۆا دا ەۋرازيا فان-كلۋبىنىڭ مۇشەسى. ايتۋىنشا، ديماشتان اسىپ تۇسەتىن ءانشى ءقازىر الەمدە جوق.

"اۋەلى ستۋدەنت قىزىم ديماشتىڭ ونەرىنە ءتانتى بولىپ، كەيىن ماعان ينتەرنەتتەن كورسەتتى. ول ماسكەۋدەگى فان-كلۋبتى تاۋىپ الىپ، ەكەۋمىز ءبىر جىلدان بەرى مۇشەمىز. ديماش ءاندى كەرەمەت ايتادى، مۇنداي داۋىستى بۇرىن-سوڭدى ەستىگەن ەمەسپىن. ول ءان شىرقاعان كەزدە دەنەمىز تۇرشىگىپ، كوزىمىزگە جاس ۇيىرىلەدى"، - دەيدى ول.

ال ولگا تەرەكوف جۇبايىمەن گەرمانيانىڭ فۋلدا قالاسىنان ارنايى ديماشتىڭ كونسەرتىنە كەلگەن. بۇعان دەيىن لوندونداعى كونسەرتىندە بولىپ، ۇمىتىلماس اسەر العان ەكەن.  

"كەشە الەمنىڭ تۇكپىر-تۇكپىرىنەن كونسەرتكە كەلگەن فاناتتار كەزدەستىك. التى ساعاتقا سوزىلعان كەشكە اتا-اجەسى، اناسى، دوستارى كەلدى. بىرگە ءان شىرقاپ، بايقاۋلار وتكىزىپ، تاماشا كەزدەسۋ وتكىزدىك. ديماشتىڭ شىعارماشىلىعىمەن ءبىر جىل بۇرىن تانىستىم. سودان بەرى ۇزبەي باقىلاپ كەلەمىن. قازاقستاندا ءالى بولعان جوقپىن، بيىل استانادا وتەتىن كونسەرتىنە بارىپ قالۋىم مۇمكىن"، - دەدى ديماشتىڭ تىڭدارمانى.

ماسكەۋلىك سۆەتلانا گۋرسكايا ديماش قۇدايبەرگەننىڭ كرەملدەگى كونسەرتىنەن كەرەمەت اسەر الاتىنىنا سەنىمدى. ايتۋىنشا، جاس ءانشىنىڭ ەشكىمگە ۇقسامايتىن قايتالانباس داۋىسى كەز كەلگەن ادامدى تەبىرەنتپەي قويمايدى.  

 "مەن ديماشتى تىڭداعان سايىن مادەني "شوك" الامىن، وراسان كەڭ داۋىسپەن ايتا وتىرىپ، وسىنشا ەموسيا كورسەتەتىنى تاڭعالدىرماي قويمايدى. ۆوكالدىق مۇمكىندىگى زور، ءبىراق ماسەلە تەك ونىڭ تەڭدەسسىز داۋىسى مەن ءاندى شەبەر ورىنداۋىندا عانا ەمەس، ول شىنايى. مۋزىكاداعى ەموسيانى ءوزى ارقىلى وتكىزىپ، ءاندى بۇكىل جان-دۇنيەسىمەن، جۇرەگىمەن ورىندايدى. كەرەمەت! كەيبىر انشىلەر سەكىلدى ساحناعا شىعىپ، ايتەۋىر بىردەمە ايتىپ، اقشاسىن الۋدى ويلامايدى. وسى قاسيەتى ءۇشىن جاقسى كورەمىز"، - دەيدى ول.

ال ماسكەۋ تۇرعىنى مارۋسيا سۆەتلوۆا ديماشتىڭ سيقىرلى داۋىسىن العاش رەت ەستىگەندە قانداي سەزىمدە بولعانىن ايتىپ بەردى.

"ديماشتى العاش رەت YouTube-تاعى روليكتەن كورىپ، اۋزىم اشىلىپ قالدى. جاپ-جاس جىگىتتىڭ وسىنشا وكتاۆادا ءان ايتۋى مۇمكىن ەمەستەي كورىندى. ودان كەيىن ينتەرنەتتەگى بارلىق كونسەرتتەردى، بايقاۋلاردى كورىپ شىقتىم. ال بىرنەشە ايدان كەيىن اپكەم ماسكەۋدە ديماشتىڭ جەكە كونسەرتى وتەتىنىن ايتقان كەزدە قۋانىشىمدا شەك بولمادى. دارىندى، تانىمال، ماسكەۋلىك جۇلدىزدى ەليتادان ەمەس، ول جۇلدىزداردىڭ ءبارىن كولەڭكەسىندە قالدىردى"، - دەدى ول.

قىتايدان ديماشتىڭ 300-دەن استام فاناتى ماسكەۋگە ات تەرلەتىپ كەلىپتى.

"ديماش قاي ەلدە ونەر كورسەتپەسىن، ءبىز ىلعي قولداۋ كورسەتۋگە دايىنبىز. ءبىز ونى "I am singer" جوباسىنداعى العاشقى انىنەن بەرى جاقسى كورەمىز، ميلليونداعان "dears" ونىڭ ونەرىنە ءتانتى. ءبىز ءۇشىن ونىڭ مۋزىكاسى، ونىڭ اندەرى وتە ماڭىزدى. ديماشتىڭ ماسكەۋدەگى ەكى كونسەرتى دە كەرەمەت وتەتىنىن بىلەمىز"، - دەدى قىتايلىق فاناتتار.

ديماشقا قولداۋ كورسەتۋگە ءانشى، كومپوزيتور ۇلىقپان جولداسوۆ وتباسىمەن ارنايى كەلگەن.  

"بۇرىن تەك قىتايدا كونسەرت بەرەدى دەپ ءبارى ايتۋشى ەدى. قۇدايعا شۇكىر، ەۋروپانى شارلادى. امەريكاعا بارىپ شۋلاتىپ قايتتى. ول جاقتا دا كونسەرتى بولادى دەپ كۇتىلۋدە. ماسكەۋدەگى كونسەرتى قۇتتى بولسىن دەيمىز. بۇدان كەيىن استاناداعى "ارناۋ" كونسەرتىن كۇتەمىز. بۇگىنگى كەشى جاقسى وتەتىنىنە ءجۇز پايىز سەنىمدىمىن"، - دەدى ءانشى.

ايتا كەتسەك، 19 ناۋرىزدا ديماش قۇدايبەرگەننىڭ ءتۇرلى ەلدەن كەلگەن فاناتتارى ءانشىنى ماسكەۋ اۋەجايىنان زور قوشەمەتپەن قارسى الدى. رەسەيلىكتەر ورىس حالقىنىڭ داستۇرىمەن ءقادىرلى قوناعىنا نان مەن تۇزدان اۋىز تيگىزدى. ديماشتىڭ ونەرىنە ءتانتى جۇرت قولتاڭباسىن الىپ، سۋرەتكە ءتۇسىپ، سىيلىقتارىن تارتۋ ەتىپ، مارە-سارە بولعان ەدى. كەلەسى كۇنى ءانشىنىڭ تىڭدارماندارى ونىڭ وتباسىن دا اۋەجايدان قۇشاق جايا قارسى الدى.

ديماش قۇدايبەرگەننىڭ ماسكەۋدەگى D-Dynasty كونسەرتى يگور كرۋتويدىڭ پروديۋسەرلىك ورتالىعىنىڭ قولداۋىمەن ءوتتى. بۇعان دەيىن كونسەرتتىڭ ءۇزىلىسسىز ءۇش ساعات بولاتىنى ايتىلعان ەدى.

وتكەن جىلدىڭ جەلتوقسان ايىندا ءانشى كرەمل سارايىنىڭ ساحناسىندا ونەر كورسەتەتىنىن حابارلاعان ەدى. اۋەلى ديماش ءبىر كونسەرت بەرۋى ءتيىس ەدى، ءبىراق بيلەتتەر جىلدام ساتىلىپ كەتىپ، رەسەيلىك تاراپتىڭ وتىنىشىمەن قازاقستاندىق ءانشى كەلەسى كۇنى دە ساحناعا شىعۋعا كەلىسىم بەرەدى.

 ۇسىنعان: فاريزا جومارت قىزى