جىل سايىن 24 ناۋرىزدا الەمدە دۇنيەجۇزىلىك تۋبەركۋلەزگە قارسى كۇرەس كۇنى اتاپ وتىلەدى. دۇنيەجۇزىلىك دەنساۋلىق ساقتاۋ ۇيىمىنىڭ مۇرىندىق بولۋىمەن وتەتىن ءداستۇرلى شارا بيىل «تۋبەركۋلەزدى جويۋ، سىرقاتتاردى تولىق ەمدەپ جازۋ» دەگەن ۇرانمەن وتپەك دەپ حابارلايدى Qamshy.kz اقپارات اگەنتتىگى.

قازاقستاندا تۋبەركۋلەز تەگىن ەمدەلەدى. تۋبەركۋلەزدىڭ الدىن الۋ، انىقتاۋ مەن ەمدەۋ كەپىلدەندىرىلگەن تەگىن مەديسينالىق كومەك شەڭبەرىندە جۇرگىزىلەدى. 2019 جىلى اتالعان دەرتكە شالدىققان ازاماتتاردى ەمدەۋ مەن الەۋمەتتىك كومەك كورسەتۋگە مەملەكەتتىك بيۋدجەتتەن استانا قالاسى بويىنشا 1،954 ملرد تەڭگە ءبولىندى.

رەسمي ستاتيستيكاعا سۇيەنسەك، 2018 جىلى استانادا 867 پاسيەنت ديسپانسەرلىك ەسەپتە تۇرعان تۋبەركۋلەزدىڭ بەلسەندى تۇرىمەن اۋىراتىندار بولاتىن. 2018 جىلى 523 ادام پاسيەنتتەر قاتارىنا جاڭادان قوسىلعاندار. پاسيەنتتەردىڭ باسىم بولىگى تۇركىستان وبلىسى مەن شىمكەنت قالاسىندا (3604)، الماتى وبلىسىندا (3311)، شىعىس قازاقستان (2860) جانە قىزىلوردا (2495) وبلىستارىندا تۇرادى.

دەر كەزىندە انىقتالىپ، ءتيىستى ەم-دوم جاسالسا تۋبەركۋلەزدى تولىق ەمدەپ جازۋعا بولادى. سوندىقتان اۋرۋدى اسقىندىرماي، ەمدەۋشى دارىگەردىڭ نۇسقاۋلارىن ورىنداۋدىڭ ماڭىزى زور. دۇنيەجۇزىلىك دەنساۋلىق ساقتاۋ ۇيىمىنىڭ مالىمەتىنشە، 2000 جانە 2016 جىلدار ارالىعىندا تۋبەركۋلەزدى ەرتە انىقتاۋ مەن ەمدەۋ ناتيجەسىندە الەم دارىگەرلەرى 53 ميلليوننان استام ادامنىڭ ءومىرىن ساقتاپ قالعان.

تۋبەركۋلەزدىڭ قاراپايىم ءتۇرىن ەمدەۋگە شامامەن 6 ايعا جۋىق ۋاقىت كەتەدى. قازاقستاندا بۇل اۋرۋ ينتەگراسيالانعان باقىلاۋ ستراتەگياسى بويىنشا ەمدەلەدى. باقىلاۋدىڭ بۇل ءتۇرى تۋبەركۋلەزدىڭ جابىق تۇرىمەن اۋىراتىن ناۋقاستاردىڭ ەمحانادا امبۋلاتورلىق ەم قابىلداۋىنا مۇمكىندىك
بەرەدى.

تۋبەركۋلەزدىڭ الدىن الۋ ءۇشىن ەمحانادا تۇراقتى تەكسەرۋدەن ءوتىپ تۇرۋ قاجەت. تەكسەرۋ مەن ەكپە ەگۋ كەپىلدەندىرىلگەن مەديسينالىق كومەك شەڭبەرىندە تەگىن جۇرگىزىلەدى:

• بسج ۆاكسيناسى – تۋعاننان كەيىن بىرنەشە كۇن ىشىندە سالىنادى؛

• 7 مەن 14 جاس ارالىعىندا بسج-دان ريەۆاكسيناسيا جاسالادى (ەكپە ەكپەس بۇرىن – مانتۋ سىناماسىن سالىپ، ورگانيزمنىڭ رەاكسياسىن تەكسەرەدى)؛

• فليۋوروگرافيالىق سكرينينگ (ەرەسەكتەرگە، جىل سايىن)؛

• كورسەتىلىمدەر بولسا: رەنتگەنوگرافيا جاساۋ.

ۇسىنعان: فاريزا جومارت قىزى