ءماجىلىس دەپۋتاتى باقىتبەك سماعۇل نۇر-سۇلتان اتاۋىنا قاتىستى ءقازىر كوپتى الاڭداتىپ وتىرعان ماسەلەنى كوتەرىپ، ەلىمىزدىڭ باستى كوشەلەرى مەن داڭعىلدارىنىڭ اتاۋىن اسىعىس وزگەرتۋگە نارازى ەكەنىن جەتكىزدى. بۇل تۋرالى ول دەموكراتيالىق كۇشتەردىڭ "قازاقستان-2050" جالپىۇلتتىق كواليسياسىنىڭ وتىرىسىندا ايتتى، دەپ حابارلايدى Qamshy.kz اقپارات اگەنتتىگى sputniknews.kz سايتىنىڭ دەرەگىن نەگىزگە الىپ. 

ونىڭ پىكىرىنشە، كوشە اتاۋلارىن اسىعىس اۋىستىرۋ ابىروي الىپ بەرمەيدى.

"كەيبىر وڭىرلەردىڭ اسىعىستىققا سالىنىپ، تاريح تورىنەن ورىن العان حاندارىمىز، توبە بيلەرىمىز، ۇلى اقىنىمىز اتىمەن اتالعان، ءتىپتى ءتاۋ ەتەر كيەلەرىمىزدىڭ ءبىرى – تاۋەلسىزدىك ۇعىمى ۇلىقتالعان وبلىستار ورتالىعىنداعى باستى كوشەلەر مەن داڭعىلداردىڭ اتاۋىن اسىعىس وزگەرتۋى جەرگىلىكتى جۇرتشىلىقتىڭ نارازىلىعىن تۋعىزادى. بۇل ابىرويلى ءىس ەمەس. جاراستىعىمىزدى جارامساقتىقپەن بۇزبايىق!"، - دەيدى دەپۋتات.

دەپۋتات ەل ۇلىقتاعان اتتارى بار ەسكى كوشەلەرگە جاۋداي تيە بەرمەي، ءار وبلىس ورتالىعىندا زاماناۋي ستيلدە جاڭا كوشەلەر سالۋدى ۇسىنادى.

"ورتالىق كوشە، نە داڭعىلدى جاڭادان جوبالاپ تۇرعىزىپ، سوعان ەلباسىنىڭ اتىن بەرگەن ءجون. ءار وبلىس ورتالىعىنداعى جاسىل تەحنولوگيالارعا قۇرىلعان، قازىرگى الەمدەگى قالا سالۋدىڭ ەڭ وزىق تاجىريبەلەرى ەندىرىلگەن ءدال وسى جاڭا داڭعىلدار وزگە كونە كوشەلەرگە جاڭعىرۋدىڭ ۇلگىسىن كورسەتىپ، ولاردى جاڭا دەڭگەيلەرگە جەتەلەيتىن بولادى"، - دەيدى ول.

وسىنداي ۇسىنىستى ورتاعا تاستاعان دەپۋتات قالىڭ قاۋىمدى جاق-جاق بوپ تايتالاسپاۋعا شاقىردى.

".. ءبىز، قازاقستاندىقتار، ەڭ الدىمەن، قازاقتار، ءدال ءقازىر ەكىگە جارىلىپ، ءبىر-بىرىمىزدى قارسىلاس كورىپ، جاق-جاق بولىپ تايتالاسپاۋىمىز كەرەك.

قالا اتاۋىن وزگەرتۋ ءۇشىن عانا قازاقتار ءوزارا قىرعي-قاباق بولىپ، قارسىلاسسا، مۇنى ەرتەڭ بولاشاق ۇرپاق تۇسىنبەيدى. تەككە دوسقا كۇلكى، دۇشپانعا تابا بولمايىق"،- دەدى ول.

ايتۋىنشا، قالانىڭ استانا اتالۋى دا كەزىندە قۇلاققا وعاش ەستىلدى. "نۇر-سۇلتان" اتاۋى ءقازىر توسىن كورىنگەنىمەن، سىنالا، سىرلانا كەلە، الدەنەشە ۇرپاقتىڭ سانا سەزىمىن ارالاپ، اقىرى كوپتىڭ كوكەيىنە قوناقتارى ءسوزسىز.

"سونىمەن بىرگە، قازاق تىلىندە استانا ءسوزى قالاتىنىن دا ۇمىتپاعان ءجون، ولاي بولسا، "جان-جۇرەگىم استانا"، "قازاق ەلىنىڭ استاناسى"، "استانالىقتار" سوزدەرى سينونيم رەتىندە ارى قاراي دا قولدانىستا جۇرە بەرەدى. استانا ءسوزىنىڭ ورىس تىلىندە جويىلاتىنىنا قامىققاندارعا: "مەملەكەتتىك ءتىلدى ۇيرەنىڭىزدەر. سوندا استانا ءسوزىن اۋىزەكى تىلدە ارى قاراي دا پايدالانا بەرەسىزدەر"" دەگەن ءجون"، - دەدى ول.

ايتا كەتەيىك، قازاقستان پرەزيدەنتى قاسىم-جومارت توقايەۆ استانا اتاۋىن نۇر-سۇلتان دەپ وزگەرتۋ تۋرالى جارلىققا قول قويدى. بۇدان كەيىن ەلىمىزدىڭ كەيبىر وڭىرلەرى باستى كوشەلەرگە ەلباسىنىڭ اتىن بەرگەنىن جاريالاي باستاعان ەدى.