كەشە اقتوبەدە قوبدا تاس جولىندا كولىك قاعىپ قايتىس بولعان توعىزىنشى سىنىپ وقۋشىسىن جەرلەدى دەپ جازادى Qamshy.kz اقپارات اگەنتتىگى Timeskz.kz سايتىنىڭ دەرەگىنە سۇيەنىپ.

24 ناۋرىزدا ءۇش سىنىپتاس باسسەينگە بارادى. اقتوبە قالاسىنىڭ وڭتۇستىك باتىسىندا تۇراتىن بوزبالالار №10 ورتا مەكتەپتىڭ 9-سىنىبىندا وقيدى. باسسەيننەن ۇيلەرىنە كەشكى 20:00-دە قايتادى.

بالالار جاياۋ جۇرگىنشىلەر جولىمەن ءوتىپ بارا جاتقاندا ەكى بالانى كولىك قاعىپ كەتەدى. ال ءبىرى ءوتىپ ۇلگەرگەن. نۇرجان جازىقوۆ وقيعا ورنىندا مەرت بولىپ، ەكىنشى بالا جانساقتاۋ بولىمىنە جەتكىزىلگەن.

№10 ورتا مەكتەپ بەلسەندى وقشىنىڭ قازاسىنا قايعىرىپ وتىر.

«ءبىز مەكتەپتىڭ ەڭ ۇزدىك وقۋشىسىنان ايىرىلدىق. نۇرجان بەلسەندى ەدى. سوۆەت وداعىنىڭ باتىرى قوجاباي جازىقوۆتىڭ ۇرپاعى. ال رەانيماسيادا جاتقان وقۋشىمىز ءۇشىن ءبارىمىز دۇعا جاساپ ءجۇرمىز، اۋرۋحاناعا ەكىنشى مارتە بارىپ كەلدىك»، - دەدى مەكتەپ ديرەكتورى.

پوليسيا دەپارتامەنتى كامەلەتكە تولماعان بالانىڭ قايتىس بولعانىن راستادى.

«24 ناۋرىزدا قوبدا جولىندا "وپەل-ۆەكترا" اۆتوكولىگىنىڭ جۇرگىزۋشىسى ەدىگە باتىر داڭعىلىمەن قوزعالىپ كەلە جاتىپ، رەتتەلمەيتىن جاياۋ جۇرگىنشىلەر جولىندا  كامەلەتكە تولماعان ەكى  ءجاسوسپىرىمدى قاعىپ كەتتى. جول-كولىك وقيعاسى سالدارىنان ءبىر بالا وقيعا بولعان جەردە قايتىس بولدى، ەكىنشىسى وبلىستىق بالالار اۋرۋحاناسىنىڭ جانساقتاۋ بولىمىنە جەتكىزىلدى. سوت-مەديسينالىق جانە اۆتوتەحنيكالىق ساراپتامالار تاعايىندالدى. 20 جاستاعى كولىك جۇرگىزۋشىسى مەديسينالىق ساراپتامانىڭ قورىتىندىسىنا سايكەس ساۋ بولعان. جۇرگىزۋشى ۋاقىتشا ۇستاۋ يزولياتورىنا قامالدى. سوتالدى تەرگەۋ باستالدى»، - دەلىنگەن دەپارتامەنت تاراتقان اقپاراتتا.

پوليسيا دەرەگىنە سۇيەنسەك، جىل باستالعالى وبلىستا بالالاردىڭ قاتىسۋىمەن 30 جول اپاتى بولدى، 27 بالا ءتۇرلى جاراقات الدى.

ۇسىنعان: گۇلىم جاقان