ەلىمىزگە بەلگىلى قوعام بەلسەندىسى، زاڭگەر ايگۇل ورىنبەك ءانشى ءابدىجاپپار ءالقوجانىڭ ۇستىنەن قىلمىستىق ءىس قوزعالۋىن تالاپ ەتۋدە، دەپ جازادى Qamshy.kz اقپارات اگەنتتىگى.

الەۋمەتتىك جەلىدەگى پاراقشاسىندا ءانشىنىڭ "قوجا" رۋىنا قاتىستى ايتقان سوزىنە بايلانىستى ءوز پىكىرىن ءبىلدىردى.

"ۇلتتىڭ قاۋىپسىزدىك قىزمەتى قايدا قاراپ وتىر؟
مىنا ءانشىنىڭ ۇستىنەن قىلمىستىق ءىس قوزعالسىن!
ق ر قىلمىستىق كودەكسىنىڭ 174-باپ. الەۋمەتتiك، ۇلتتىق، رۋلىق، ءناسiلدiك، تەكتىك-توپتىق نەمەسە دiني الاۋىزدىقتى قوزدىرۋ بابىمەن جازالانسىن!

سوندا قازاقتىڭ ەلىندە، جەرىندە تۇرىپ ءبىز ولاردى بۇزىپ جاتىرمىز با؟
سوندا قازاقتىڭ قانى تازا ەمەس بۇزىلعان دەپ ايىپ تاعىپ وتىر ما؟
سوندا قازاقتىڭ قىزدارى بۇزىلعان با؟
نەگە وسىنداي ەل الدىندا جۇرگەن جۇلدىزسىماقتار اۋىزدارىنا بايقاپ سويلەمەيدى؟! 
ءبىز اراب ەلىنە بارىپ بۇزعان جوقپىز، وزدەرى دۋانا سياقتى قاڭعىپ كەلىپ، قازاقتار كەڭپەيىل جايلى بولعان سوڭ وسىندا قالىپ قويدى! ولاي رۋعا ءبولىپ، ءبىزدى مەنسىنبەي قاراۋدى توقتاتىڭدار!
سوسىن قازاقتى اركىم باسىنىپ ءبىتتى عوي! شارشاتتى وسىلاي جوعارىدان مەنسىنبەي قارايتىندار! اۋىزدارىڭا بايقاپ سويلەڭدەر!
"ءاربىر قازاق جالعىزىم"-دەگەن سابىر ادايدىڭ ۇلى ءسوزىن ۇمىتپاڭدار!
ءابدىجاپپار ءالقوجا، حالىق الدىندا كەشىرىم سۇرا، ايتپەسە زاڭ الدىندا وسى سوزدەرىڭ ءۇشىن جاۋاپ بەرەسىڭ!" - دەپ جازادى ايگۇل ورىنبەك.

ايتا كەتەيىك، بىرنەشە كۇن بۇرىن ءانشى ءابدىجاپپار ءالقوجا "31" ارنانىڭ "ونەر مەن ءومىر" باعدارلاماسىندا قوجالار جايلى ەل اراسىندا ايتىلا بەرمەيتىن جايتتاردى اتاپ بەرگەن بولاتىن. 

"ءقازىر قوجالاردىڭ كوپ جىگىتتەرى قارادان قىز الىپ جاتىر. ءبىراق، مەنىڭ اعالارىمنىڭ ءبارى قوجادان قىز العان. ءبىزدىڭ اۋلەتتە تەك روزا اپكەم عانا البان جىگىتىنە تۇرمىسقا شىقتى. قالعان ەكى اپكەم قوجاعا تۇرمىسقا شىقتى. ءتۇبى ارابتان شىققاننان كەيىن يشان دەگەن نارسە، ۇلكەن سوپىلاردان كەيىنگى مۇسىلماننىڭ دارەجەسى. ءىلىمنىڭ، ءبىلىمنىڭ دارەجەسى. يشاندار تەك قوجالاردان شىعادى. سوپىلار دا سونداي. قازاقتان شىققاندى مولدا دەپ ايتادى. ءپىر بەكەت بار قازاقتان شىققان. قالعانىنىڭ ءبارى قوجادان شىققان. ارىستان باب پەن شاكىرتى قوجا احمەت ياسساۋي دە قوجادان شىققان. يشاندار ءبىر قۇران مەن سۇرەنى ايتقاندا، جىنىن سۋىرىپ الاتىن بولعان. وندايلار ءقازىر جوق. سونىڭ ازايىپ كەتۋى. اتالارىمىز ءۇش جۇزدەن، قازاقتان الىپ قويدى. ءسويتىپ قان بۇزىلدى. ەگەر قازاقتان ارالاسقان بولسا، ولاردان يشان شىعۋ قيىن"، - دەگەن ءانشى حالىقتىڭ سىنىنا ۇشىراعان بولاتىن.

ۇسىنعان: نازەركە لابيحان