اقش-تىڭ پرەزيدەنتى دونالد ترامپ   ۇستانعان پوزيسياسى مەن كوزقاراسىن  ءوزىنىڭ twitter-دەگى جازباسىندا ءبىلدىرىپ وتىرادى.

العاشقىدا مۇنى امەريكالىق قوعام قابىلداي قويعان جوق. ءتىپتى ترامپتى مازاق ەتكەندەر دە تابىلدى. اڭگىمە ءبىراق باسقادا. اتاپ ايتساق، تۆيتتەرگە نە جازساڭ دا، ول بايىپتى بايلام مەن سالماقتى كوزقاراسقا بايلانىستى عوي.

بۇرىن قازاقستاندا جوعارى بيلىك ءۇشىن الەۋمەتتىك جەلىلەردە اشىق كوزقاراسىن ءبىلدىرۋ بولعان جوق. مۇنى توقايەۆ  سەنات ءتوراعاسى رەتىندە بىرنەشە جىلدان بەرى جۇزەگە اسىرىپ كەلەدى. پرەزيدەنت قىزمەتىنە كىرىسكەندە دە Twitter ارقىلى توقايەۆ اتقارۋشى بىيلىككە تاپسىرمالار بەرە باستادى. ءقازىر اقيقاتى كەرەك، اقپاراتتىق پورتالدارعا ەمەس، الدىمەن تاڭ ازاندا توقايەۆتىڭ Twitter-ىنە قارايتىن بولدىق. بۇل پرەزيدەنتتىڭ ءابجىل قيمىلىن، كەز كەلگەن وقيعاعا تەز باعا بەرىپ، جەدەل كوزقاراس بىلدىرە الاتىنىن كورسەتەدى. بۇرىن جابىق بولىپ كەلگەن قازاق بيلىگى ءۇشىن بۇل وتە قاجەت نارسە.

ونىڭ ۇستىنە پرەزيدەنت توقايەۆتىڭ باسپا ءسوز حاتشىسى بولىپ جۋرناليست بەرىك ءۋاليدىڭ كەلگەنى دە جالپى وقىرمان قاۋىم ءۇشىن ءتيىمدى بولدى دەپ ايتۋعا تولىق نەگىز بار. حالىق توقايەۆتىڭ  كەز كەلگەن وقيعاعا كوزقاراسىن تۆيتتەردەگى جازباسى ارقىلى  ءبىلىپ جاتسا، وندا كوڭىلدە ەش كۇمان قالمايدى. مۇنداي جاعدايدا حالىقتىڭ دا بيلىككە سەنىمى ارتادى.

وسىدان بىرنەشە كۇن بۇرىنعى مي-8 تىكۇشاعىنىڭ اپاتىنا بايلانىستى توقايەۆ اتقارۋشى بيلىككە تەز تاپسىرما بەردى. «تەرگەۋ جۇمىستارى جۇرگىزىلەدى. قايتىس بولعانداردىڭ وتباسىنا ماتەريالدىق كومەك بەرىلەدى»،- دەدى. ال كەشە..

پرەزيدەنت تەلەارنالاردان كورسەتىلگەن لەڭگەردەگى كوپپاتەرلى تۇرعىن ءۇيدىڭ وتكىر ماسەلەسىن (ۆيدەوسى-تومەندە) شۇعىل تۇردە شەشۋدى پرەمەر-مينيستر اسقار مامين مەن تۇركىستان وبلىسىنىڭ اكىمى ءومىرزاق شوكەيەۆكە تاپسىردى.

دەمەك،  بۇدان شىعاتىن قورىتىندى نە؟ تىكەلەي تاپسىرما بەرۋ ارقىلى ماسەلە تەز شەشىلەدى. ايتپەسە، ءبىزدىڭ اتقامىنەرلەر تاپسىرمانى بىر-بىرىنە سىلتەپ، ماسەلەنى ءسوزبۇيداعا سالىپ جۇرە بەرەدى. بيلىكتىڭ قاشان دا اشىق بولعانى دۇرىس. مۇنىڭ اكىمدەرگە دە تىكەلەي قاتىسى بار. ال پرەزيدەنتتىككە كەلگەنىنە ون كۇن بولعان قاسىم-جومارت كەمەل ۇلى  قارا حالىققا قانشالىقتى جاقىن بولادى؟ اينالاسىنداعىلار ونى وقشاۋلاندىرىپ، تەك قانا جاعىمدى اقپاراتپەن شەكتەپ قويماي ما؟  ارينە ونى ۋاقىت كورسەتەر. ءبىراق ازىرگە توقايەۆ Twitter ارقىلى ءبىراز ماسەلەنى شەشىپ وتىر...