پرەزيدەنت قاسىم-جومارت توقايەۆ حالىق ەڭ كوپ پايدالاناتىن الەۋمەتتىك جەلىلەردىڭ ءبىرى -Instagram-نان ءوز رەسمي پاراقشاسىن اشتى. بۇل تۋرالى مەملەكەت باسشىسىنىڭ باسپا ءسوز قىزمەتىنىڭ جەتەكشىسى بەرىك ءۋالي Facebook جەلىسىندەگى پاراقشاسىندا جاريالادى دەپ حابارلايدى Qamshy.kz اقپارات اگەنتتىگى.
"جاقىندا ءوڭىر اكىمدەرىنە جۇرتپەن ەتەنە بايلانىس ورناتۋ ءۇشىن زاماناۋي بايلانىس قۇرالدارىن ۇتىمدى پايدالانۋعا، ياعني حالىقپەن كەرى بايلانىس ورناتۋ ماقساتىندا الەۋمەتتىك جەلىلەردە بەلسەندى بولۋعا شاقىردىم. وزدەرىڭىزگە بەلگىلى، مەن بىرنەشە جىلدان بەرى Twitter جەلىسىن بەلسەندى قولدانىپ، مەملەكەتىمىز ءۇشىن ەڭ ماڭىزدى دەگەن دۇنيەلەرمەن ءبولىسىپ كەلەمىن. ەندىگى رەتتە وسى ءۇردىستى حالىق ەڭ كوپ شوعىرلانعان Instagram جەلىسىندە دە جالعاستىرۋدى ءجون دەپ تاپتىم" - دەپ جازادى مەملەكەت باسشىسى Instagram پاراقشاسىنداعى جازباسىندا.
"ەسكە سالايىق، سوڭعى ۋاقىتتا Instagram جەلىسىندە پرەزيدەنتتىڭ اتىنان اشىلعان پاراقشالار كوبەيىپ كەتتى، ءبىراق ولاردىڭ ەشقايسىسى دا رەسمي ەمەس. بۇدان بىلاي رەسمي پاراقشا بىرەۋ، ونىڭ مەكەن-جايى @tokayev_online"، - دەدى بەرىك ءۋالي.
ۇسىنعان: ماقپال سەمباي
