اتاۋلى الەۋمەتتىك كومەك الۋعا وتىنىشتەردى قاراۋ ءتارتىبى جاريالاندى دەپ حابارلايدى Qamshy.kz اقپارات اگەنتتىگى enbek.gov.kz  سايتىنا سىلتەمە جاساپ.

قازاقستان رەسپۋبليكاسىنىڭ تۇڭعىش پرەزيدەنتى - ەلباسىنىڭ تاپسىرماسىنا سايكەس، 2019 جىلدىڭ 1 ساۋىرىنەن باستاپ اتاۋلى الەۋمەتتىك كومەك كورسەتۋدىڭ جاڭا فورماتى ەنگىزىلگەنى بەلگىلى.

العاشقى ەكى كۇن ىشىندە جەرگىلىكتى اتقارۋشى ورگاندارعا 73 364 ادام ءوتىنىش ءبىلدىردى، ونىڭ ىشىندە 33 432 ادام ااك تاعايىنداۋعا ءوتىنىش بەردى. بۇل رەتتە ازاماتتاردىڭ باسىم بولىگى حالىقتى جۇمىسپەن قامتۋ ورتالىقتارىنا جۇگىندى. نۇر-سۇلتان جانە الماتى قالالارىندا اۋداندىق اكىمدىكتەردە وتىنىشتەردى قابىلداۋ بويىنشا قوسىمشا پۋنكتتەر اشىلدى.

العاشقى كۇندەر ءوتىنىش بەرگەن ادامداردىڭ سانىن ەسكەرە وتىرىپ، ااك تاعايىنداۋ ءتارتىبىن ءتۇسىندىرۋ قاجەت دەپ سانايمىز.

1-كەزەڭ: قۇجاتتاردى قابىلداۋ جانە قالىپتاستىرۋ

جۇمىسپەن قامتۋ ورتالىقتارىنىڭ قىزمەتكەرلەرى وتىنىشتەردى قابىلدايدى جانە مەملەكەتتىك ورگانداردىڭ ەلەكتروندىق بازاسىن پايدالانا وتىرىپ، قاجەتتى قۇجاتتاردى دەربەس جينايدى. اقپاراتتىق جۇيەلەردە مالىمەتتەر بولماعان جاعدايدا مەملەكەتتىك ورگاندارعا جازباشا سۇراۋ سالۋ جىبەرىلەدى. بۇل رەتتە ءوتىنىش بەرۋشىلەر قاجەتتى قۇجاتتاردى ءوز بەتىنشە ۇسىنا الادى.

2-كەزەڭ: قۇجاتتاردى ۋچاسكەلىك كوميسسياعا تاپسىرۋ

ءبىر جۇمىس كۇنى ىشىندە جينالعان قۇجاتتار ۋچاسكەلىك كوميسسياعا جىبەرىلەدى. كوميسسيا قۇرامىنا جەرگىلىكتى مەملەكەتتىك باسقارۋ ورگاندارىنىڭ، قوعامدىق بىرلەستىكتەردىڭ، ءۇي-جايلاردىڭ (پاتەرلەردىڭ) مەنشىك يەلەرى كووپەراتيۆتەرىنىڭ، حالىقتىڭ، ءبىلىم بەرۋ، دەنساۋلىق ساقتاۋ، الەۋمەتتىك قورعاۋ ۇيىمدارى مەن ۋاكىلەتتى ورگانداردىڭ، قۇقىق قورعاۋ ورگاندارىنىڭ وكىلدەرى كىرەدى.

3-كەزەڭ: ءوتىنىش بەرۋشىنىڭ ماتەريالدىق جاعدايىن تەكسەرۋ

قۇجاتتار كەلىپ تۇسكەن كۇننەن باستاپ ءۇش جۇمىس كۇنى ىشىندە كوميسسيا ءوتىنىش بەرۋشىنىڭ (وتباسىنىڭ) ۇيىنە بارىپ، ونىڭ ماتەريالدىق جاعدايىنا تەكسەرۋ جۇرگىزەدى. اتاپ ايتقاندا، تۇرعىن ءۇي-تۇرمىستىق جاعداي، جەكە قوسالقى شارۋاشىلىقتىڭ بولۋى جانە مۇقتاجدىقتىڭ باسقا دا بەلگىلەرى ەسكەرىلەدى.

تەكسەرۋ ناتيجەلەرى بويىنشا ماتەريالدىق جاعداي اكتىسى جاسالادى، ونىڭ نەگىزىندە جۇمىسپەن قامتۋ ورتالىعىنا اتاۋلى الەۋمەتتىك كومەك ۇسىنۋ قاجەتتىلىگى تۋرالى قورىتىندى بەرىلەدى.

سونىمەن بىرگە، اۋداندىق كوميسسيالار ءوتىنىش بەرۋشىنىڭ (وتباسىنىڭ) ماتەريالدىق جاعدايىن زەرتتەگەن كەزدە فوتو- ۆيدەوفيكساسيا قۇرالدارىن پايدالانۋ قاراستىرىلماعان.

ايتا كەتۋ كەرەك، جەرگىلىكتى اتقارۋشى ورگاندار جەكە قوسالقى شارۋاشىلىقتى تابىس كوزى رەتىندە انىقتاۋعا قۇقىلى.

4-كەزەڭ: ااك تاعايىنداۋ تۋرالى شەشىمنىڭ جوباسىن دايىنداۋ

جۇمىسپەن قامتۋ ورتالىعى الىنعان قۇجاتتار مەن ۋچاسكەلىك كوميسسيانىڭ قورىتىندىسى نەگىزىندە ااك تاعايىنداۋ تۋرالى شەشىمنىڭ جوباسىن دايىندايدى جانە ونى جۇمىسپەن قامتۋ جانە الەۋمەتتىك باعدارلامالار بولىمدەرىنە جىبەرەدى.

5-كەزەڭ: ۋاكىلەتتى ورگاندا قاراۋ

ۋاكىلەتتى ورگان ءۇش جۇمىس كۇنى ىشىندە قۇجاتتاردى تەكسەرەدى جانە اتاۋلى الەۋمەتتىك كومەك تاعايىنداۋ نە ودان باس تارتۋ تۋرالى شەشىم قابىلدايدى. مالىمەتتەر جەتىسپەگەن جاعدايدا قۇجاتتار جۇمىسپەن قامتۋ ورتالىعىنا قايتارىلادى، ول ءوتىنىش بەرۋشىمەن بىرگە ءۇش جۇمىس كۇنى ىشىندە قۇجاتتار پاكەتىن دۇرىستايدى.

6-كەزەڭ: ءوتىنىش بەرۋشىگە حابارلاما بەرۋ

شەشىم قابىلدانعان كۇننەن باستاپ بەس جۇمىس كۇنى ىشىندە جۇمىسپەن قامتۋ ورتالىعى ءوتىنىش بەرۋشىنى حاباردار ەتەدى.

بۇدان بۇرىن اتاۋلى الەۋمەتتىك كومەك العان ادامدارعا قۇجاتتاردى قايتا تاپسىرۋدىڭ قاجەتى جوق ەكەنىن اتاپ وتكەن ءجون. جەرگىلىكتى اتقارۋشى ورگاندار شامامەن 60 مىڭ وتباسىنىڭ نەمەسە 300 مىڭ ادامنىڭ دەرەكتەرىن وزەكتەندىردى، ولارعا بۇرىن تاعايىندالعان ااك سومالارىن قايتا ەسەپتەۋ جۇرگىزىلەدى.

ۇسىنعان: ماقپال سەمباي