بۇل تۋرالى بۇگىن پارتيانىڭ ورتالىق اپپاراتىندا وتكەن ءىس-شارادا بەلگىلى بولدى دەپ حابارلايدى Qamshy.kz اقپارات اگەنتتىگى.
ناقتى ايتار بولساق، پارتيانىڭ كەزەكتى XVIII سەزىندە ەلباسى، پارتيا ءتوراعاسى نۇرسۇلتان نازاربايەۆ «Nur Otan»-عا ءار ماۋسىم سايىن مەملەكەتتىك باعدارلامالاردىڭ جۇزەگە اسىرىلۋ بارىسى تۋرالى ورتالىق مەملەكەتتىك ورگان باسشىلارىن تىڭداۋدى تاپسىرعان بولاتىن. وسىعان وراي پارتيانىڭ باستاماسىمەن مەملەكەتتىك باعدارلامالار مەن رەفورمالاردى جۇزەگە اسىرۋدىڭ تيىمدىلىگىن باعالاۋ جانە مونيتورينگ جۇرگىزۋ ورتالىعى قۇرىلدى. بۇگىن اتالعان ورتالىقتىڭ العاشقى وتىرىسى ءوتىپ، وندا بيزنەستى قولداۋعا جانە دامىتۋعا ارنالعان «بيزنەستىڭ جول كارتاسى-2020» مەملەكەتتىك باعدارلاماسىنىڭ جۇزەگە اسىرىلۋ بارىسى تۋرالى ەسەپ تىڭدالدى.
ءسوز باسىندا «Nur Otan» پارتياسى ءتوراعاسىنىڭ ءبىرىنشى ورىنباسارى ەلباسىنىڭ سەزدە بەرگەن تاپسىرماسىنا نازار اۋدارىپ، ونى ورىنداۋ ءۇشىن پارتيا جۇيەلى جۇمىستى باستاپ كەتكەنىن ايتتى.
– بۇل جۇمىستاردىڭ ماقساتى پارتيانىڭ مەملەكەتتىك ورگانداردان ەسەپ تالاپ ەتۋ ەمەس، كەرىسىنشە باعدارلامالاردى ءتيىمدى ءارى ۋاقىتىلى جۇزەگە اسىرۋعا ىقپال ەتىپ، ەلىمىزدىڭ ستراتەگيالىق قۇجاتتارىندا كورسەتىلگەن ءتيىستى شارالاردى قولعا الۋ. وسىنداي تىڭداۋلاردىڭ «بيزنەستىڭ جول كارتاسى-2020» باعدارلاماسىنان باستالعانى دا تەگىن ەمەس. ويتكەنى ەل ەكونوميكاسى مەن حالىقتىڭ ءال-اۋقاتى كاسىپكەرلىكپەن تىكەلەي بايلانىستى، – دەدى ماۋلەن اشىمبايەۆ.
سونداي-اق ول اتالعان تىڭداۋلاردىڭ جاڭا فورماتتا وتكىزىلە باستاعانىن تىلگە تيەك ەتىپ، كوتەرىلگەن تاقىرىپتىڭ اشىق تالقىلاناتىنىن اتاپ ءوتتى. وسى رەتتە تىڭداۋلار الەۋمەتتىك جەلىلەردە تىكەلەي ەفيردە كورسەتىلەتىنىن ايتا كەتكەن ءجون. سول ارقىلى تالقىلاۋعا كەز كەلگەن ازاماتتىڭ قاتىسىپ، ءوز پىكىرىن بىلدىرۋىنە مول مۇمكىندىك بار.
سونىمەن بىرگە پارتيا ءتوراعاسىنىڭ ءبىرىنشى ورىنباسارى مۇنداي تىڭداۋلاردىڭ ناتيجەسىندە ۇتىمدى ۇسىنىستار دايىندالاتىنىن جەتكىزدى.
– وسىنداي تىڭداۋلاردىڭ قورىتىندىسى بويىنشا پارتيا جانىنان قۇرىلعان جاڭا ورتالىقپەن بىرگە ءبىرقاتار ۇسىنىستار دايىنداپ، ونى ەلدىڭ باسشىلىعى مەن ۇكىمەتكە جولدايمىز. سوندىقتان بۇگىنگى تالقىلاۋلار ناقتى ۇسىنىستار دايارلاۋعا ءوز سەپتىگىن تيگىزىپ، ەلىمىزدەگى كاسىپكەرلىك سالاسىن دامىتۋعا تىڭ سەرپىن بەرەدى دەپ سەنەمىن، – دەدى ماۋلەن اشىمبايەۆ.
وتىرىس بارىسىندا ۇلتتىق ەكونوميكا ءمينيسترى رۋسلان دالەنوۆ، «اتامەكەن» ۇكپ-نىڭ باسقارما ءتوراعاسى ابىلاي مىرزاحمەتوۆ، «Nur Otan» پارتياسى مەملەكەتتىك باعدارلامالار مەن رەفورمالاردى جۇزەگە اسىرۋدىڭ تيىمدىلىگىن باعالاۋ جانە مونيتورينگ جۇرگىزۋ ورتالىعىنىڭ ديرەكتورى راحىم وشاقبايەۆ جانە تاعى باسقا ماماندار ءسوز الىپ، اتقارىلعان جۇمىستار جونىندە ايتتى.
