21 مىڭ تەڭگەنى بەرگەننەن بەرەدىسى جىر بولدى. بۇگىن ەلورداداعى كوپبالالى انالار تاعى باس كوتەرىپ، بۇل جولى بالالارىن سۇيرەپ، مينيسترلىككە وزدەرى باردى. ولار الەۋمەتتىك كومەككە ىلىگە الماي، مەملەكەت كومەگىنە مۇقتاج ەكەنىمىزدى دالەلدەۋدەن شارشادىق دەپ اشىندى دەپ جازادى Qamshy.kz اقپارات اگەنتتىگى 31 ارناعا سىلتەمە جاساپ.

جاردەماقىعا ءىلىنۋىمىز كەرەك دەپ تابانى تاۋسىلعان كوپبالالى انالار شىعىن مەن كىرىستى ەسەپتەپ، قۇجاتپەن ساندالتىپ ەستى شىعارعانشا سول 21 مىڭ تەڭگەنى بارلىق بالاعا بىردەي، اي سايىنعى جاردەماقى ەتىپ بەرسىن دەگەن تالاپ قويۋدا.

شەنەۋنىكتەر جاردەماقى، الەۋمەتتىك كومەك، ءۇي ماسەلەسىنە قاتىستى ۋادەنى ۇيىپ-توگەدى، ءبىراق ءۇش اي بويى كومەكتىڭ ءبىر ءتۇرىن كورمەدىك دەپ اشىنعان انالار جاردەماقىنى تەزدەتىپ بەرۋدى تالاپ ەتىپ، الەۋمەتتىك قورعاۋ مينيسترلىگىنىڭ الدىندا جينالدى.

"قاراماي ما! مىنا 8-10 بالاسى بار كوپبالالى انالارعا نەگە قارامايدى. ءاربىر ۇيگە باس سۇعىپ قاراماي ما؟" - دەيدى اشىنعان كوپبالالى انا فەرۋزا ءابىزوۆا.

ءبىراق، مامانداردىڭ سوزىنشە، كوميسسيا مۇشەلەرى كوپبالالالى وتباسىلاردى ءالى تولىق ارالاپ بىتپەگەن سوڭ، كەسىمدى ءسوز ايتۋ قيىن.

"ۋچاسكەلىك كوميسسيالار بارلىق وتباسىنى ارالاپ ۇلگەرگەن جوق. سوندىقتان، مىنالار الادى، مىنالار المايدى دەگەن پىكىر ايتۋعا بولمايدى"، - دەدى ساراپشى مامان عاليا جاباعينا.

الايدا، مامانداردىڭ سوزىنە كوڭىلى تولماعان انالار ءارى قاراي دەپۋتاتتارعا جولىعامىز دەپ تۋرا تارتتى. ولاردى ماجىلىستەگى ەكى دەپۋتاتپەن بىرگە ەلدىڭ الەۋمەتتىك قورعاۋ ءمينيسترىنىڭ ورىنباسارى قارسى الدى. جانايقايىن جەتكىزۋگە اسىققان انالاردىڭ ىشىندە پاتەر اقىسىن تولەي الماي، دالادا قالعاندارى دا بار.

سونىمەن، 1-ساۋىردە بەرىلەتىن جاردەماقىعا قۇجاتتار ەندى قابىلدانىپ جاتىر دەگەن ۆيسە-مينيستر ءبارى زاڭ شەڭبەرىندە بولادى دەپ، انالاردى سابىرعا شاقىردى. ءبىراق، پروسەدۋرانى راسىمدەۋگە ءبىر عانا قۇجات جەتەدى دەگەن انالاردىڭ ءۇمىتى اقتالمادى.

"قۇجات سۇراتىپ، جازباشا تۇردە ءوتىنىش جازدىرتقان جاعدايلار بولدى"، - دەيدى ەڭبەك جانە حالىقتى الەۋمەتتىك قورعاۋ ۆيسە-مينيسترى سۆەتلانا جاقىپوۆا.

ۆيسە-مينيستر سونداي-اق، ەرتەڭنەن باستاپ جۇمىسپەن قامتۋ ورتالىقتارىنا تىكەلەي ءوزى بارىپ، ءبارىن ءوز كوزىمەن كورىپ شىعۋعا ۋادە بەردى. الايدا، ابدەن كوڭىلى قالعان انالار شەنەۋنىكتەردىڭ بۇل ۋادەسىنە سەنبەدى.