بيولوگيادا «ميميكريا» دەگەن قۇبىلىس بار. بەلگىلى ءبىر جانۋار، نە جاندىك ءوزىن قورشاعان ورتاعا ساي ءوڭى مەن ءتۇسىن وزگەرتەدى دەپ جازادى Qamshy.kz اقپارات اگەنتتىگى.  ياعني، سىرتقى قالىبىن وزگەرتۋى.

ايتپاعىمىز، پسيەۆدوسالافيلەر تۋرالى ەدى. وزدەرىن سالافيتتەر دەگەن اتپەن يدەولوگياسىن تاراتىپ جۇرگەن ۋاحابيلەر، قازىرگى سىرتقى تونىن وزگەرتتى. ولار قوعام اراسىندا ۋاحابيلەر مادحاليلەر، سۋرۋريدتەر، بايسالدى سالافيتتەر دەگەن اتپەن بەلگىلى. بۇلاردىڭ اراسىندا ءوزارا كەلىسپەۋشىلىكتەرى بولعانىمەن، كىتاپتارى مەن عالىمدارى ورتاق (بۇرىننان بار اقپارات). ەندى قازىرگى تاڭدا اتتارىن قالاي وزگەرتتى دەيسىزدەر عوي. وزدەرىن "حانافي مازحابىمىن" دەپ، تاقيا كيىپ الدى (تاقيا دەگەن وزدەرىنىڭ ماقساتىنا جەتكەنشە قوعامنىڭ فورماسىندا بولۋى). وڭالتۋ جۇمىستارىندا تەولوگتاردىڭ ىڭعايىنا جىعىلعان بولىپ كورىنگەنىمەن، ۇيلەرىنە بارىپ ءوز سەنىمدەرى بويىنشا ارەكەت ەتە بەرەدى. "2013-2015 جىلدارى رەسپۋبليكا بويىنشا ءداستۇرلى باعىتقا ءوتتى" دەگەن كەيبىر دىنشىلدەر، شەكارا اسىپ سيريا جەرىندەگى وتقا جونەلدى. بۇل جەردەگى ماسەلە ولاردىڭ سىرتقى ءتۇرىن وزگەرتىپ، ىشكى سەنىمىندە قالا بەرۋى. بۇگىنگى بۇل سەنىمدەگىلەر قوعامنىڭ وزدەرىنە ارازدىعىن، قولدامايتىنىن بىلگەن سوڭ، اقىرىن ايلاعا كوشتى. ونىڭ اتى – ميميكريا. ياعني، ساياساتتى قولداۋ، بيلىكتى اشىق قولداۋ، پىكىرتالاسقا تۇسپەۋ، سىرتقى قالىپتى وزگەرتۋ، الەۋمەتتىك جەلىدە جالعان توپتار اشىپ، تاسادان تاس اتۋ. ولاردىڭ تاراپىنان مۇنداي قۇبىلىس بايقالعاسىن بيلىكتە اشىق كۇرەستى باياۋلاتتى. ياعني جەڭدىك دەگەن سىڭاي كوبىمىزدە بايقالعانعا ۇقسايدى. الايدا بۇلاردىڭ بۇل تىرلىگى كەزىندەگى ورىس گەنەرالى كۋتۋزوۆتىڭ تىرلىگىنە ۇقسايدى.

فەلدمارشال كۋتۋزوۆ ناەولوندى جەڭۋ ءۇشىن ورىس پاتشاسىن ماسكەۋدى تاستاۋعا كوندىرىپ ەدى عوي. ارتىنشا ۇلكەن كۇشپەن كەلىپ، ناپەولون اسكەرىن ويسىراتتى. ارينە ايتپاعىمىز ورىس گەنەرالى ەمەس ەدى. ايتپاعىمىز، ءادىس ايلادا بولىپ وتىر. سەبەبى سوعىس تەك عانا قولمەن عانا ەمەس، اقپاراتتىق سوعىس تا ءجۇرىپ جاتقانى بەلگىلى. ءبىز سالافيلەردىڭ وسى شەگىنىسىن پايدالانىپ، ۇلتتىق تاريحي سانامەن ۇشتاسقان ءداستۇرلى تۇسىنىككە قىراۋار اقشا ءبولىپ، قازاق قوعامىن يدەيالىق كوركەم تارتىمدىلىقپەن باۋراپ الۋىمىز قاجەت. كوپتىڭ قولداۋى ەندى كەلەر جات يدەيالاردى جۇتىپ الىپ، ونىڭ ورنىنا كوك شوپتەگى فوتوسينتەز پروسەسى سياقتى جاقسى يدەيالار ۇسىنىپ وتىرار ەدى. كەزىندەگى كەڭەس ۇكىمەتىنىڭ ساياساتى قازاق دالاسىنا قاراپايىم شارۋانى قۇقىعىن قورعاۋ جەلەۋىمەن كەلگەن ەدى. سالافيلەردىڭ دە ۋاقىتى تولعاندا باسقاشا ءادىس شارالارمەن كەلۋىنە ەشكىم كۇمان كەلتىرە الماس. ويتكەنى كەز-كەلگەن يدەولوگيا حالىققا تارتىمدى ادىسپەن كەلەرى حاق. ولاي بولماسا، حالىقتان قولداۋ بولمايتىنىن جاقسى تۇسىنەدى. ءبىر ايتارىمىز، 90 - جىلدارى جىبەرگەن قاتەمىزدەي، سانىمىزدى تاعى دا سوعىپ قالماساق بولعانى. ءبىزدىڭ وزىمىزگە دە رۋحاني جاڭعىرىپ، اقىلدى قوزعاپ، سانانى بيلەر يدەيالىق تارتىمدىلىعى مول ءادىس قاجەت.

وكىنىشكە قاراي ءبىزدىڭ كوپ جۇمىستارىمىز حالىقتى ساقتاندىرعانىمەن، ولارعا تارتىمدىلىق جاعىن ۇسىنا الماي جاتقانىمىز. ونىڭ ءبىر عانا سەبەبى بار. ول — مامان. حاكىم اباي ايتپاقشى «اقىل، قايرات، جۇرەكتى بىردەي ۇستايتىن» ماماندار تاپشىلىعى. ءبىزدىڭ يدەولوگيا سالاسىنداعى باسشىلىقتاعى ماماندارىمىزدىڭ راسيونالدى پىكىرلەرى، ياعني  تەك عانا «سۋىق اقىلدى» (سۋىق اقىل جۇرەكتى قوزعار يدەيالىق تارتىمدىلىقتا بولۋى قاجەت) باعىتتارى حالىقتىڭ كوڭىلىنەن شىقپاي جاتىر. سوندىقتان، جەكەلەگەن يدەولوگتاردىڭ (جات باعىتتاعى) حالىققا وتىمدىلىگى ارتىپ وتىر.

جاراس احان، تاريحشى