قازىرگى ۋاقىتتا الەۋمەتتىك جەلىدەگى پاراقشالاردا، يۋتۋب ارنالاردا قالىڭ قارالىم جيناپ، ميلليونداعان قولدانۋشىلاردى اقپاراتپەن قامتاماسىز ەتىپ وتىراتىن بلوگەرلەردىڭ ءباسى ارتىپ كەلەدى دەپ جازادى Qamshy.kz اقپارات اگەنتتىگى.

"ءوز ويىمعا" وكپە ارتىپ جۇرگەندەر ەندى نازارىن باسقا باعىتقا بۇرا باستادى. ارىن جانىنىڭ ساداعاسى ەتكەندەردىڭ اقپاراتتىق ءدۇمپۋى سايابىر تاۋىپ، بەلدەن تومەن بەيادەپ سوزدەرمەن بەدەرلەنگەن باعدارلامانىڭ تانىمالدىلىعى ارتىپ كەلەدى.

ناقتىراق ايتساق، دينارا ءساتجان جۇرگىزەتىن "نەميشلەن" يۋتۋب ارناسى ەلگە بەت-الپەتى تانىمال بلوگەرلەردى، شوۋ-بيزنەس وكىلدەرىن، سپورتشىلاردى قوناق ەتىپ، ولارمەن ويىن ويناۋ كەزىندە جىنىستىق قاتىناستان  ۇزامايتىن دۇنيەلەردى ەش قىسىلماستان اسپەتتەپ ءجۇر.

اتاپ ايتساق، بەلگىلى بوكسشى، مەملەكەتتىك قىزمەت اتقارىپ جۇرگەن ازامات، وليمپيادا چەمپيونى دا باعدارلامانىڭ العاشقى قوناقتارىنىڭ ءبىرى بولدى. باعدارلامانىڭ نەگىزگى باعىتى – بەلگىلى ادامدارمەن اس ءمازىرىن دايىنداۋ.

بەينەنىڭ سوڭىنا قاراي جۇرگىزۋشى قوناعىنا ەرەكشە ويىن تۋرالى ۇسىنىس جاسايدى. ەگەر قاتىسۋشى ويىن شارتىن ورىنداي الماسا، وعان دينارا ءساتجاننىڭ ارنايى "جازاسى" دا جوق ەمەس.

وسىنداي سوراقى باعدارلامادا سۇمدىق جازالانعان تۇلعالاردىڭ ءبىرى – سەرىك ساپييەۆ. دينارا حانىمنىڭ فانتاستيكالىق فيلمدەردەگى باس قاھارمانداردىڭ كوستيۋمىن كيۋدەن باس تارتقان وليمپيادا چەمپيونى "سەكس-ينسترۋكتور" دەگەن جازۋى بار جەيدەنى كيۋدەن باس تارتپادى. بۇل – ءبىر.

ەكىنشى سوراقى جاعداي تۋرالى جەلىدە، عالامتوردا كەڭىنەن اقپارات تاراپ جاتىر. ءدال وسى باعدارلاماعا قاتىسقان بايان الاگوزوۆا ويىنعا كەزەك كەلگەندە دينارا حانىمنىڭ ۇسىنىسىمەن قاراقات ءابىلديناعا حابارلاسىپ، سۇيىسەتىن ەپيزودى بار كينوعا ۇسىنىس جاسايدى. ادەپ قاعيدالارىن بۇزاتىن ەڭ قيسىنسىز ارەكەتتىڭ ءبىرى – تەلەفونداعى اڭگىمەنىڭ ەفيرگە جازىلىپ جاتقاندىعى.

بەلگىلى پروديۋسەر ءوزىنىڭ "تۇسىرمەك" كينوسىنا قاراقاتتى قوماقتى اقشا ۇسىنىپ كوندىرمەكشى بولادى. ءبىراق قاراقاتتىڭ باعىنا وراي، قۇداي ونى اۋىزدان قاقپادى.

كۇللى ەل بولىپ، ءلايلا سۇلتان قىزى مەن الماس التايدىڭ ارىنىن باسا الماي وتىرعاندا، دينارا ءساتجاننىڭ بۇل قىلىعى شىندىعىندا "مۇرتقا وكپەلەپ جۇرگەندە ساقال شىقتىنىڭ" كەرى بولدى.