قازاقستاندىق وقۋشىلار ابۋ-دابيدە وتكەن دجيۋ-دجيتسۋدان الەم بىرىنشىلىگىنەن التىن مەدال الىپ كەلدى دەپ حابارلايدى Qamshy.kz اقپارات اگەنتتىگى ktk.kz سايتىنا سىلتەمە جاساپ. 

ولاردىڭ جەتىستىگىنە بۇكىل قازاقستان قۋانىپ جاتىر. سەبەبى، اننا ۆودولازوۆا مەن ليۋبوۆ تەمنيكوۆا - تۇل جەتىم بالالار. مەكەمەنىڭ ديرەكتورى گۇلميرا قوندىبايەۆانىڭ ايتۋىنشا، بالالار ءۇيىنىڭ تاربيەلەنۋشىلەرى بوس ۋاقىتتارىندا ءتۇرلى ۇيىرمەلەرگە قاتىسادى، دەپ جازادى قازاقپارات. ولاردىڭ ءبىرى - 12 جاستاعى اننا ۆودولازوۆا، بالالار ۇيىنە كىشكەنتاي كەزىندە باۋىرىمەن بىرگەن ورنالاستىرىلعان. اتا-اناسى ەرتەرەكتە قايتىس بولعان.

«انيا 1 جىلدان بەرى دجيۋ-دجيتسۋمەن اينالىسىپ كەلەدى. وسى ۋاقىت ارالىعىندا وبلىستىق، قالالىق جارىستاردا كوپ جەتىستىككە جەتكەن. بۇل قىزىمىز باا-دە وتكەن الەم چەمپيوناتىندا ەكى قارسىلاسىن مەرزىمىنەن بۇرىن تىزە بۇكتىرىپ، التىن مەدالگە قول جەتكىزدى. ەكىنشى قىزىمىز تەمنيكوۆا ليۋبوۆ 3-ورىنعا تابان تىرەپ، قول جۇلدەگە قول جەتكىزدى. بۇل قىزىمىز دا بالالار ءۇيىنىڭ تاربيەلەنۋشىسى. اعالارى بىزدە تاربيەلەنىپ، ءوسىپ، ەر جەتتى. اتا-اناسى ليۋبوۆتىڭ ءسابي كەزىندە كوز جۇمعان. قاپشاعاي قالاسىندا تۇرعان. ليۋبوۆ تا فۋتبول، باسكەتبول جانە تاعى باسقا سپورت تۇرلەرىمەن شۇعىلدانادى. قازاق مەكتەبىنە بارادى. باۋىرلارىنىڭ ءبارىنىڭ ءتىلى قازاقشا شىققان. ال انيا ۆودولازوۆا حورەوگرافيامەن اينالىسادى. ەكى قىزىمىزدىڭ دا بولاشاعىنان كوپ ءۇمىت كۇتەمىز»، - دەدى بالالار ءۇيىنىڭ ديرەكتورى گۇلميرا قوندىبايەۆا.    

اننا ۆودولازوۆا چەمپيوناتقا بارعانداردىڭ ىشىندە اق بەلبەۋلى جالعىز سپورتشى بولعان. ونىڭ قارسىلاستارىنىڭ كوپشىلىگى سۇر بەلبەۋدىڭ يەگەرلەرى ەكەن (سۇر بەلبەۋ اق بەلبەۋدەن جوعارى تۇراتىن دارەجە). وزىنەن وق بويى وزىق تۇرعان قارسىلاستارىن انيا وپ-وڭاي جەڭگەن. قىزداردى "SAMURAI" اكادەمياسىندا البەرت الدياروۆ باپتاپ كەلەدى. 

ۇسىنعان: ماقپال سەمباي